തൃശൂരില്‍ ചരക്ക് തീവണ്ടി പാളം തെറ്റി. വെള്ളിയാഴ്ച ഉച്ചയ്ക്ക് 2.15ഓടെ പുതുക്കാട് റെയില്‍വേ സ്റ്റേഷന് സമീപം തെക്കേ തുറവ് ഭാഗത്തുവെച്ചാണ് അപകടമുണ്ടായത്. ഇരുമ്പനം ബിപിസിഎല്ലിൽ നിന്നും ഇന്ധനം നിറയ്‌ക്കാൻ പോയ ചരക്ക് തീവണ്ടിയാണ് അപകടത്തിൽ പെട്ടത്. തൃശൂർ - എറണാകുളം റൂട്ടിൽ ട്രെയിൻ ഗതാഗതം ഭാഗികമായി തടസപ്പെട്ടിരിക്കുകയാണ്. റെയിൽവേ ഉദ്യോഗസ്ഥരും വിദഗ്ദ്ധരും സ്ഥലത്ത് എത്തിയിട്ടുണ്ട്. അപകടകാരണം വ്യക്തമല്ല.

നിലവിൽ ഒരു വരിയിലൂടെ ട്രെയിൻ വിട്ടു തുടങ്ങിയിട്ടുണ്ട്. കൊച്ചുവേളി എക്സ്പ്രസും,​ മംഗള എക്സ്പ്രസും അല്പസമയം മുമ്പ് ഇതുവഴി കടത്തി വിട്ടു. ഗതാഗത തടസ്സത്തെ തുടര്‍ന്ന് ന്യൂഡല്‍ഹി-തിരുവനന്തപുരം കേരള എക്‌സ്പ്രസ് ഒറ്റപ്പാലത്ത് നിര്‍ത്തിയിട്ടു, ബാംഗ്ലൂര്‍-എറണാകുളം ഇന്റര്‍സിറ്റി മാന്നാനൂരില്‍ നിര്‍ത്തിയിട്ടു. നിലമ്പൂര്‍ - കോട്ടയം ട്രെയിന്‍ യാത്ര പുറപ്പെട്ടില്ല. കോഴിക്കോട്-തിരുവനന്തപുരം ജനശതാബ്ദി ഷൊര്‍ണൂരില്‍ നിര്‍ത്തിയിടും, വേണാട് എക്‌സ്പ്രസ് ഷൊര്‍ണൂരില്‍ നിര്‍ത്തി. കൂടുതല്‍ ട്രെയിനുകള്‍ വൈകുമെന്നാണ് വിവരം.