കണ്ണൂര് സ്ക്വാഡ് രണ്ടാം ഭാഗം അടുത്ത വര്ഷം ആദ്യം
മമ്മൂട്ടി നായകനായി റോബി രാജ് സംവിധാനം ചെയ്ത കണ്ണൂര് സ്ക്വാഡ് എന്ന സൂപ്പര്ഹിറ്റ് ചിത്രത്തിന്റെ രണ്ടാം ഭാഗം അടുത്ത വര്ഷം ചിത്രീകരണം ആരംഭിക്കും. നിതീഷ് സഹദേവന്റെയും ഖാലിദ് റഹ്മാന്റെയും ചിത്രങ്ങള് പൂര്ത്തിയാക്കിയ ശേഷം കണ്ണൂര് സ്ക്വാഡ് 2 എന്ന പേരിട്ട ചിത്രത്തില് അടുത്തവര്ഷം ജനുവരിയില് അഭിനയിക്കാനാണ് മമ്മൂട്ടി ഒരുങ്ങുന്നത്. മമ്മൂട്ടി കമ്പനിയുടെ ബാനറില് ആണ് രണ്ടാം ഭാഗത്തിന്റെയും നിര്മ്മാണം.
2023ല് റിലീസ് ചെയ്ത ചിത്രത്തില് മമ്മൂട്ടിയോടൊപ്പം, റോണി ഡേവിഡ്രാജ്, ശബരീഷ്വര്മ്മ, അസീസ് നെടുമങ്ങാട് എന്നിവരായിരുന്നു സ്ക്വാഡ് അംഗങ്ങള്. രണ്ടു കേസുകളുടെ സാങ്കല്പിക കഥ പറഞ്ഞ ചിത്രം ആണ് കണ്ണൂര് സ്ക്വാഡ്. ഗ്രേറ്റ് ഫാദര്, വെള്ളം, ജോണ് ലൂഥര് തുടങ്ങിയ സിനിമകളുടെ ഛായാഗ്രാഹകനായ റോബിരാജിന്റെ ആദ്യ സംവിധാന സംരംഭം കൂടി ആണ് കണ്ണൂര് സ്ക്വാഡ്.
റോണി ഡേവിഡ് രാജും മുഹമ്മദ് ഷാഫിയും ചേര്ന്നാണ് ത്രില്ലിംഗ് ക്രൈം ഡ്രാമയ്ക്ക് തിരിക്കഥ എഴുതിയത്. കന്നട നടന് കിഷോര്, വിജയരാഘവന്, ഷെബിന് ബന്സണ്, മനോജ് കെ.യു തുടങ്ങിയ നീണ്ട താരനിരയുണ്ടായിരുന്നു. സുഷിന് ശ്യാം സംഗീതം ഒരുക്കി. എ.എസ്.ഐ ജോര്ജായി മമ്മൂട്ടി അഴിഞ്ഞാട്ടം നടത്തുന്ന കാഴ്ചയായിരുന്നു ചിത്രത്തില്. ഇക്കുറി സ്ഥാനക്കയറ്റം ലഭിക്കുമോ അതോ എ.എസ്.ഐ തന്നെയാണോ എന്നേ അറിയാനുള്ളൂ. വേഫെറര് ഫിലിംസാണ് വിതരണം.
https://www.facebook.com/Malayalivartha
