മറ്റൊരു താര വിവാഹത്തിന് കൂടി കേരളം സാക്ഷിയാകുകയാണ്. മലയാളികളുടെ സ്‌നേഹത്തിന് പാത്രമായ പ്രായം കുറഞ്ഞ മേയര്‍ ആര്യ രാജേന്ദ്രനും എസ്എഫ്‌ഐയില്‍ നിന്നും വന്ന ബാലുശേരി എംഎല്‍എയായ സച്ചിന്‍ ദേവുമായുള്ള വിവാഹ വാര്‍ത്തയെ മലയാളികള്‍ ഇരുകൈയ്യും നീട്ടിയാണ് സ്വീകരിച്ചത്. സോഷ്യല്‍ മീഡിയ നിറയെ ഇവരുടെ ഫോട്ടോകള്‍ വച്ചുള്ള പ്രണയ ഗാനങ്ങളാണ്.

തലസ്ഥാനത്തെ മേയര്‍ക്ക് ബാലുശേരിക്കാരന്‍ എം.എല്‍.എ വരനാവുന്ന വാര്‍ത്ത നിറഞ്ഞ് നില്‍ക്കുകയാണ്. തിരുവനന്തപുരം മേയര്‍ ആര്യരാജേന്ദ്രനും ബാലുശേരി എം.എല്‍.എ കെ.എം. സച്ചിന്‍ദേവും തമ്മിലുള്ള വിവാഹത്തിന് ഇരു കുടുംബങ്ങളും ധാരണയായതായി സച്ചിന്റെ പിതാവ് കെ.എം. നന്ദകുമാര്‍ അറിയിച്ചു. സി.പി.എം സംസ്ഥാന സമ്മേളനത്തിന്റെ തിരക്കുകള്‍ കഴിഞ്ഞാലുടന്‍ വിവാഹം ഉണ്ടാകും.

കഴിഞ്ഞ ദിവസം സച്ചിന്‍ദേവിന്റെ കുടുംബാംഗങ്ങള്‍ മേയര്‍ ആര്യയുടെ തിരുവനന്തപുരത്തെ വീട്ടിലെത്തി കാര്യങ്ങള്‍ തീരുമാനിക്കുകയായിരുന്നു. രാജ്യത്തെ ഏറ്റവും പ്രായം കുറഞ്ഞ മേയറാണ് 22കാരി ആര്യ. സംസ്ഥാനത്തെ ഏറ്റവും പ്രായം കുറഞ്ഞ എം.എല്‍.എയാണ് 28കാരന്‍ സച്ചിന്‍ദേവ്. ബാലസംഘം, എസ്.എഫ്.ഐ എന്നിവയിലെ പ്രവര്‍ത്തനങ്ങള്‍ക്കിടയിലുള്ള സൗഹൃദമാണ് വിവാഹത്തിലേക്ക് എത്തിച്ചത്. ഇരുവരും ഇക്കാര്യം സംസാരിച്ചശേഷമാണ് കുടംബത്തെ അറിയിച്ചത്.

സച്ചിന്‍ദേവുമായുള്ള വിവാഹ വാര്‍ത്തയില്‍ പ്രതികരണവുമായി ആര്യ രാജേന്ദ്രന്‍ രംഗത്തെത്തി. രണ്ടു പേരും തമ്മില്‍ സംസാരിച്ച ശേഷമാണ് വീട്ടിലും പാര്‍ട്ടിയിലും അറിയിച്ചത്. കുടുംബങ്ങള്‍ തമ്മില്‍ ചര്‍ച്ച നടത്തി. പാര്‍ട്ടി ഉള്‍പ്പടെ അറിഞ്ഞ് തീരുമാനിക്കേണ്ട കാര്യമാണ്. കുടുംബത്തിനും പാര്‍ട്ടിക്കും ഒരേ പ്രാധാന്യം ആണ്. ഒരേ രാഷ്ട്രീയം തന്നെയാണ് തമ്മില്‍ മനസിലാക്കാന്‍ സാഹായിച്ചത്. വിവാഹം ഉടനേ ഉണ്ടാകില്ലെന്നും ആര്യ പ്രതികരിച്ചു.

കല്യാണം എന്ന ആലോചനയിലേക്ക് എത്തിയിട്ടില്ല. വീട്ടില്‍ സംസാരിച്ചിരുന്നു. നിലവില്‍ വിവാഹ തീയതി സംഹന്ധിച്ച് തീരുമാനമൊന്നും എടുത്തിട്ടില്ല. രണ്ടു പേരും ജനപ്രതിനിധി കൂടി ആയിരിക്കുന്ന സാഹചര്യത്തില്‍ പാര്‍ട്ടി കൂടി ഇടപെടേണ്ടതുണ്ട്. രണ്ട് കുടുംബങ്ങളും ഇതിനോടകം സംസാരിച്ചിട്ടുണ്ട്. കുടുംബം ആലോചിക്കുന്ന തരത്തിലായിരിക്കും ബാക്കി കാര്യങ്ങള്‍ തീരുമാനിക്കുന്നത്. രണ്ടു പേരും ഒരേ രാഷ്ട്രീയത്തില്‍ വിശ്വസിക്കുന്നവരാണ്. തമ്മില്‍ മനസിലാക്കാന്‍ സാധിക്കുന്നു എന്നത് തന്നെ വലിയ കാര്യം. ജീവിതത്തില്‍ പ്രാധാന്യമുള്ളത് കുടുംബവും പാര്‍ട്ടിയുമാണ്. അവിടുന്നുള്ള തീരുമാനം അനുസരിച്ച് മുന്നോട്ടു പോകും. നല്ല സൗഹൃദമാണ് സച്ചിനുമായി ഉള്ളതെന്നും ആര്യ പറയുന്നു.

നിയമസഭയിലെ പ്രായം കുറഞ്ഞ എംഎല്‍എയായ സച്ചിനും രാജ്യത്തെ പ്രായം കുറഞ്ഞ മേയറായ ആര്യയും തമ്മിലുള്ള വിവാഹ വാര്‍ത്ത പുറത്തുവന്നതിനു ശേഷമാണ് ആര്യയുടെ പ്രതികരണം. വിവാഹം സംബന്ധിച്ച് ഇരുകുടുംബങ്ങളും തമ്മില്‍ ധാരണയായതായി സച്ചിന്റെ പിതാവ് കെ.എം നന്ദകുമാര്‍ അറിയിച്ചിരുന്നു. ബാലസംഘത്തില്‍ ഒന്നിച്ചു പ്രവര്‍ത്തിച്ചതു മുതലുള്ള സംഘടനാ പരിചയമാണ് വിവാഹത്തിലെത്തുന്നത്. വിവാഹ തീയതി ഉള്‍െപ്പടെയുള്ള കാര്യങ്ങള്‍ തീരുമാനിച്ചിട്ടില്ലെന്ന് സച്ചിന്‍ദേവ് പ്രതികരിച്ചു.

ബാലുശ്ശേരിയില്‍ സച്ചിന്‍ദേവ് മത്സരിച്ചപ്പോള്‍ പ്രചാരണത്തിനായി മേയര്‍ ആര്യ രാജേന്ദ്രന്‍ എത്തിയിരുന്നു. എസ്.എഫ്.ഐ സംസ്ഥാന സെക്രട്ടറിക്കു വേണ്ടി എസ്.എഫ്.ഐ സംസ്ഥാന സമിതി അംഗമെന്ന നിലയില്‍ ആര്യ അന്ന് പ്രചാരണത്തിന് എത്തിയത് ശ്രദ്ധ നേടിയിരുന്നു. കോഴിക്കോട് നെല്ലിക്കോട് സ്വദേശിയായ സച്ചിന്‍ദേവ് എസ്.എഫ്.ഐ സംസ്ഥാന സെക്രട്ടറിയും അഖിലേന്ത്യാ ജോയിന്റ് സെക്രട്ടറിയുമാണ്. എസ്.എഫ്.ഐ സംസ്ഥാന സെക്രട്ടറി ആയിരിക്കെയാണ് ബാലുശേരി മണ്ഡലത്തില്‍ നിന്ന് വിജയിച്ചത്. സി.പി.എം കോഴിക്കോട് ജില്ലാ കമ്മിറ്റിയംഗവുമാണ്. കോഴിക്കോട് ഗവ. ആര്‍ട്‌സ് ആന്‍ഡ് സയന്‍സ് കോളേജ് മുന്‍ ചെയര്‍മാനായിരുന്നു. നിയമബിരുദധാരിയാണ്.

തിരുവനന്തപുരം ഓള്‍ സെയിന്‍സ് കോളജില്‍ വിദ്യാര്‍ത്ഥിയായിരിക്കെ 21ാം വയസിലാണ് ആര്യ മേയറാകുന്നത്. എസ്.എഫ്.ഐ സംസ്ഥാന സമിതി അംഗവും സി.പി.എം ചാല ഏരിയ കമ്മിറ്റിയംഗവുമാണ്.