ഒരേമനസോടെ വീട്ടില് നിന്നും... ആറ്റുകാലമ്മയെ മനസില് ധ്യാനിച്ച് ഇന്ന് വീട്ടുമുറ്റത്ത് പൊങ്കാല; പണ്ടാര അടുപ്പില് 10.50ന് തീ കൊളുത്തുമ്പോള് ടിവിയില് ലൈവായി കണ്ട് വീട്ട് മുറ്റത്തെ അടുപ്പില് തീ കൊളുത്താം; നിവേദ്യ സമര്പ്പണം ഉച്ചയ്ക്ക് 1.20ന്
ആറ്റുകാല് അമ്മയ്ക്ക് ഇന്ന് ലക്ഷക്കണക്കിന് അമ്മമാര് വീട്ടുമുറ്റത്ത് പൊങ്കാല അര്പ്പിക്കും. ദേവിയെ കാപ്പുകെട്ടി കുടിയിരുത്തിയ നാള്മുതല് വ്രതപുണ്യമനുഷ്ഠിച്ച് ശുദ്ധിനേടിയ മനസുമായി കാത്തിരിക്കുകയാണ് സ്ത്രീജനങ്ങള്. രാവിലെ 10.50ന് ആറ്റുകാലമ്മയുടെ തിരുനടയിലെ പണ്ടാര അടുപ്പില് അഗ്നി ജ്വലിപ്പിക്കുന്ന നേരം വീട്ടുമുറ്റങ്ങളിലെ അടുപ്പുകളിലും തീ പകരും. ടിവിയില് ചാനലുകളില് ലൈവുള്ളതിനാല് ഇതെളുപ്പമറിയാം.
നഗരം യാഗശാലപോലെ ആകുന്ന പതിവിന് കൊവിഡ് കഴിഞ്ഞ വര്ഷവും ഭംഗം വരുത്തിയിരുന്നു. അന്നും വ്രതനിഷ്ഠയോടെ ഭക്തര് വീടുകളിലാണ് പൊങ്കാല അര്പ്പിച്ചത്. വീടുകളില് കുടുംബസമേതമുള്ള പ്രാര്ത്ഥനയായി പൊങ്കാല അര്പ്പണം മാറും.
'അമ്മേ നാരായണ, ദേവീ നാരായണ, ലക്ഷ്മീ നാരായണ, ഭദ്രേ നാരായണ' മന്ത്രങ്ങള് വീടുകളില് മുഴങ്ങും. ക്ഷേത്രത്തില് തന്ത്രി തെക്കേടത്ത് പരമേശ്വരന് വാസുദേവന് ഭട്ടതിരിപ്പാട് ശ്രീകോവിലില് നിന്നു ദീപം പകര്ന്ന് മേല്ശാന്തിക്ക് കൈമാറും. വലിയ തിടപ്പള്ളിയിലെ അടുപ്പ് കത്തിച്ച ശേഷം മേല്ശാന്തി ദീപം സഹ മേല്ശാന്തിക്ക് നല്കും. ചെറിയ തിടപ്പള്ളിയിലെ അടുപ്പ് ജ്വലിപ്പിച്ച ശേഷം പണ്ടാര അടുപ്പിലേക്ക് തീ പകരുമ്പോള് ചെണ്ടമേളം മുഴങ്ങും. ഒപ്പം വെടിക്കെട്ടും ഉണ്ടാകും.സമൂഹ മാദ്ധ്യമങ്ങളിലൂടെയും ചടങ്ങ് ലൈവായി കാണാന് കഴിയും.പതിവിലും നേരത്തെ ഉച്ചയ്ക്ക് 1.20നാണ് പൊ?ങ്കാല നിവേദ്യം. ആ നിമിഷം പതിവുപോല സെസ്ന വിമാനം നഗരത്തില് വട്ടം പറന്ന് പൂക്കള് വര്ഷിക്കും. ഈ സമയം ഭക്തര്ക്ക് പൂവും ജലവും തളിച്ച് നിവേദ്യം ദേവിക്ക് സമര്പ്പിക്കാം.
വീട്ടില് പൊങ്കാലയിടുമ്പോള് പ്രധാനമായും ചില കാര്യങ്ങള് ശ്രദ്ധിക്കണം.
· പുറത്ത് നിന്നുള്ളവര് വീടുകളില് എത്തുന്നുണ്ടെങ്കില് എല്ലാവരും മാസ്ക് ധരിക്കുക
· പ്രായമായവരുമായും മറ്റസുഖമുള്ളവരുമായും അടുത്തിടപഴകരുത്
· പുറത്ത് നിന്നും വരുന്നവര് കുഞ്ഞുങ്ങളെ എടുത്ത് ലാളിക്കുന്നത് ഒഴിവാക്കുക
· തൊണ്ടവേദന, മൂക്കൊലിപ്പ്, ജലദോഷം, പനി തുടങ്ങിയ അസുഖമുള്ളവര് സന്ദര്ശനങ്ങള് ഒഴിവാക്കുക
· സോപ്പുപയോഗിച്ച് കൈ കഴുകാതെ വായ്, കണ്ണ്, മൂക്ക് എന്നിവ സ്പര്ശിക്കരുത്
· ചൂടുകാലമായതിനാല് തീപിടിക്കാതിരിക്കാന് അതീവ ശ്രദ്ധ വേണം
· സാനിറ്റൈസര് തീയുടെ അടുത്ത് സൂക്ഷിക്കരുത്.
· കുട്ടികളെ തീയുടെ അടുത്ത് നിര്ത്തരുത്
· കോട്ടന് വസ്ത്രങ്ങള് ഉപയോഗിക്കുക
· അലക്ഷ്യമായി വസ്ത്രം ധരിക്കരുത്
· ഇടക്കിടയ്ക്ക് വെള്ളം കുടിക്കണം
· അടുപ്പിനടുത്ത് പെട്ടെന്ന് തീപിടിക്കുന്ന സാധനങ്ങള് വയ്ക്കരുത്
· വീട്ടില് നിര്ത്തിയിട്ട വാഹനങ്ങള്ക്ക് തൊട്ടടുത്ത് അടുപ്പ് കൂട്ടരുത്
· തൊട്ടടുത്ത് ഒരു ബക്കറ്റ് വെള്ളം കരുതി വയ്ക്കണം
· അടുപ്പില് തീ അണയും വരെ ശ്രദ്ധിക്കണം
· ചടങ്ങുകള് കഴിഞ്ഞ് അടുപ്പില് തീ പൂര്ണമായും അണഞ്ഞു എന്നുറപ്പാക്കണം
· തീപൊള്ളലേറ്റാല് പ്രഥമ ശുശ്രൂഷ ചെയ്യേണ്ടതാണ്
· പൊള്ളലേറ്റ ഭാഗം വെള്ളം ഉപയോഗിച്ച് തണുപ്പിക്കേണ്ടതാണ്
· വസ്ത്രമുള്ള ഭാഗമാണെങ്കില് വസ്ത്രം നീക്കാന് ശ്രമിക്കരുത്
· പൊള്ളലേറ്റ ഭാഗത്ത് അനാവശ്യ ക്രീമുകള് ഉപയോഗിക്കരുത്
· ആവശ്യമെങ്കില് ഡോക്ടറുടെ സേവനം തേടുക
· ദിശ 104, 1056, ഇ സഞ്ജീവനി എന്നിവ വഴി ഡോക്ടറുടെ ഉപദേശം തേടാവുന്നതാണ്.
https://www.facebook.com/Malayalivartha
