അടുക്കളയില്‍ പാചകം ചെയ്യുന്നതിനിടെ ഭര്‍ത്താവ് ബക്കറ്റില്‍ പെട്രോളുമായി എത്തി ഭാര്യയായ ശരണ്യയുടെ ശരീരത്തിലേക്ക് ഒഴിച്ച് തീ കൊളുത്തി... വീട്ടുകാരും നാട്ടുകാരും ചേര്‍ന്ന് യുവതിയെ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല...

നീണ്ടകര നീലേശ്വരം തോപ്പ് ശരണ്യ ഭവനില്‍ ശരണ്യ (35) ആണ് മരിച്ചത്. ശരണ്യയെ കൊലപ്പെടുത്തിയ കേസില്‍ ഭര്‍ത്താവ് എഴുകോണ്‍ ചീരങ്കാവ് ബിജു ഭവനില്‍ ബിനു (40) ആണ് അറസ്റ്റിലായത്.

ഇന്നലെ രാവിലെ ആറരയോടെയാണ് സംഭവം. ശരണ്യ അടുക്കളയില്‍ പാചകം ചെയ്യുന്നതിനിടെ ബക്കറ്റില്‍ പെട്രോളുമായി എത്തി ബിജു ഇത് ശരണ്യയുടെ ശരീരത്തിലേക്ക് ഒഴിക്കുകയും തീ കൊളുത്തുകയുമായിരുന്നുവെന്നു പൊലീസ് . തീ പിടിച്ചു കത്തിയ ശരണ്യയെ വീട്ടുകാരും അയല്‍ക്കാരും ചേര്‍ന്ന് ആശുപത്രിയില്‍ എത്തിക്കുകയായിരുന്നു.

ആശുപത്രിയിലെത്തിക്കുമ്പോള്‍ തന്നെ ഇവരുടെ നില അതീവ ഗുരുതരമായിരുന്നു. നീണ്ടകര ഗവ.താലൂക്ക് ആശുപത്രിയിലും പിന്നീട് കൊല്ലത്ത് സ്വകാര്യ ആശുപത്രിയിലും പ്രവേശിപ്പിച്ചെങ്കിലും വൈകിട്ട് ഏഴിനു മരിച്ചു. ശരണ്യയ്ക്ക് തീ കൊളുത്തിയതിന് പിന്നാലെ സ്ഥലത്തു നിന്നും കടന്നു കളഞ്ഞ ബിജു ചവറ പൊലീസ് സ്റ്റേഷനില്‍ എത്തി കീഴടങ്ങുകയായിരുന്നു. ഭാര്യയ്ക്ക് അവിഹിത ബന്ധമുണ്ടെന്ന ബിജുവിന്റെ സംശയമാണ് കൊലപാതകത്തിലേക്ക് നയിച്ചത്.

ഇയാളുടെ കൈയ്ക്കു പൊള്ളലേറ്റിട്ടുണ്ട്. വിദേശത്തായിരുന്ന ബിജു ഏതാനും ദിവസം മുന്‍പാണ് നാട്ടിലെത്തിയത്. ശരണ്യയ്ക്കു മറ്റാരോടോ അടുപ്പമുണ്ടെന്ന സംശയത്തിലായിരുന്ന ബിജു ശരണ്യയെയും കൂട്ടി ചീരങ്കാവിലെ വീട്ടില്‍ പോയെങ്കിലും അവിടെ നിന്നു ശരണ്യയെ കാണാതാവുകയായിരുന്നു. ഇതു സംബന്ധിച്ചു ചവറ പൊലീസ് സ്റ്റേഷനില്‍ പരാതിയുമായി എത്തിയ ബിജുവിനെ എഴുകോണ്‍ പൊലീസില്‍ പരാതി നല്‍കാന്‍ നിര്‍ദേശിച്ച് മടക്കി അയച്ചിരുന്നു.
എഴുകോണ്‍ പൊലീസാണ് ശരണ്യയെ കണ്ടെത്തിയത്. തുടര്‍ന്ന് നീണ്ടകരയിലെ വീട്ടിലേക്കു വന്ന ശരണ്യയെ കൊലപ്പെടുത്തുക എന്ന ഉദ്ദേശ്യത്തോടെ ഇന്നലെ പെട്രോള്‍ വാങ്ങി ബിജു വീട്ടിലെത്തുകയായിരുന്നുവെന്നു പൊലീസ് . ശരണ്യയ്ക്ക് രണ്ടു മക്കളുണ്ട്.