കെ റെയില്‍ വിഷയത്തില്‍ മുഖ്യമന്ത്രി പിണറായി വിജയന്റെ ഇഷ്ടക്കാരുമായല്ല ചര്‍ച്ച നടത്തേണ്ടത്, പകരം സര്‍വകക്ഷി യോഗം വിളിക്കണമെന്ന് ബിജെപി സംസ്ഥാന അദ്ധ്യക്ഷന്‍ കെ സുരേന്ദ്രന്‍. ബാലാവകാശ കമ്മീഷന്‍ സമരക്കാര്‍ക്കെതിരെയല്ല മറിച്ച് പൊലീസുകാര്‍ക്കെതിരെയാണ് കേസെടുക്കേണ്ടെതെന്നും കെ റെയില്‍ സമരം എല്ലായിടത്തും ബിജെപി ഏറ്റെടുക്കുമെന്നും സുരേന്ദ്രന്‍ പറഞ്ഞു.


കെ റെയില്‍ കാരണം ഭൂമിയും വീടും കടകളും മറ്റും നഷ്ടപ്പെടുന്നവരെ സംഘടിപ്പിച്ചുകൊണ്ടുള്‌ല വലിയ പോരാട്ടത്തിനാണ് ബിജെപി തയാറെടുക്കുന്നതെന്നും അദ്ദേഹം വ്യക്തമാക്കി. കേരളത്തിന് വലിയ ബുദ്ധിമുട്ടുണ്ടാക്കുന്ന പദ്ധതിയാണ് കെ റെയില്‍ എന്നും കുടിയൊഴിപ്പിക്കപ്പെടുന്നവരുടെ മാത്രം പ്രശ്‌നമല്ല ഇതെന്നും സുരേന്ദ്രന്‍ പറഞ്ഞു.'

ഏഴെട്ട് മീറ്റര്‍ ഉയരത്തില്‍ കേരളത്തെ രണ്ടായി ഭാഗിക്കുകയാണ്, പ്രളയക്കെടുതിയും മഴയുടെ ബുദ്ധിമുട്ടും അനുഭവിക്കുന്ന നാട്ടില്‍ ഇത്തരമൊരു പദ്ധതി കൊണ്ടുവരുന്നത് കേരളത്തിന് മുഴുവന്‍ ഭാവിയില്‍ വളരെ ദോഷം ചെയ്യുന്ന കാര്യമാണ്. നിലവില്‍ കല്ലിടുന്നതില്‍ യാതൊരു യുക്തിയുമില്ല.

സാമൂഹികാഘാത പഠനം നടത്താന്‍ ഇങ്ങനെ മഞ്ഞക്കല്ലുകള്‍ സ്ഥാപിക്കണോ? ഹൈക്കോടതിയെ സര്‍ക്കാര്‍ തെറ്റിദ്ധരിപ്പിച്ചതാണ്.