മദ്യപിച്ച് ബഹളമുണ്ടാക്കിയ ചേട്ടനെ അനുജന്‍ കൊലപ്പെടുത്തിയ സംഭവത്തില്‍ ഇവരുടെ അമ്മയ്ക്കും പങ്കുണ്ടെന്ന നിഗമനത്തില്‍ പൊലീസ്. തൃശൂരില്‍ കഴിഞ്ഞ ശനിയാഴ്ചയായിരുന്നു പ്രതി സാബു സഹോദരന്‍ ബാബുവിനെ കൊന്ന് കുഴിച്ചുമൂടിയത്. ബാബുവിനെ കഴുത്തുഞെരിച്ച് കൊലപ്പെടുത്തിയ ശേഷം മൃതദേഹം വീടിന് മുന്നൂറ് മീറ്റര്‍ അകലെയുള്ള ആളൊഴിഞ്ഞ പറമ്പില്‍ കുഴിച്ചിടുകയായിരുന്നുവെന്നാണ് സാബു പൊലീസിനു മൊഴി നല്‍കിയത്. കേസ് അന്വേഷിക്കുന്ന ചേര്‍പ്പ് പൊലീസിനോടാണ് സാബു ഇക്കാര്യങ്ങള്‍ വെളിപ്പെടുത്തിയത്. എന്നാല്‍ ശവശരീരം ഒരാള്‍ക്ക് ഇത്രയും ദൂരം ഒറ്റയ്ക്ക് കൊണ്ടുപോയി മറവു ചെയ്യാന്‍ സാധിക്കില്ലെന്ന വിലയിരുത്തലിലാണ് പൊലീസ്.

സംശയത്തിന്റെഅടിസ്ഥാനത്തില്‍ സഹോദരങ്ങളുടെ മാതാവിനെ ഉടന്‍ ചോദ്യം ചെയ്യുമെന്നും പൊലീസ് അറിയിച്ചു. തൃശൂര്‍ ചേര്‍പ്പില്‍ മുത്തുള്ളി സ്വദേശികളാണ് കൊല്ലപ്പെട്ട ബാബുവും അനിയന്‍ സാബുവും. സഹോദരന്‍ മദ്യപിച്ച് ബഹളമുണ്ടാക്കിയപ്പോള്‍ അതില്‍ പ്രകോപിതനായാണ് കുറ്റകൃത്യം നടത്തിയതെന്നാണ് സാബു മൊഴി നല്‍കിയത്. കൊല നടക്കുമ്പോള്‍ സാബുവും മദ്യപിച്ചിരുന്നതായി പൊലീസ് പറഞ്ഞു.

ബാബുവിനെ കാണാനില്ലെന്ന് കാട്ടി പ്രതി സാബുവും അമ്മയുമാണ് പൊലീസില്‍ പരാതി നല്‍കിയത്. ബാബുവിനെ കാണാതായെന്ന പരാതി ലഭിച്ചതിനെ തുടര്‍ന്ന് പൊലീസ് നേരത്തെ തന്നെ വിശദമായ അന്വേഷണം നടത്തിയിരുന്നു. ഈ അന്വേഷണത്തില്‍ സഹോദന്മാര്‍ തമ്മില്‍ നിരന്തരം വഴക്ക് നടന്നിരുന്നതായി പൊലീസ് കണ്ടെത്തിയിരുന്നു.

ഇതിനിടെ പശുവിനെ മേയ്ക്കാനെത്തിയ സമീപവാസി ബാബുവിന്റെ വീടിന് സമീപത്തുള്ള പറമ്പില്‍ മണ്ണ് മാറി കിടക്കുന്നത് കണ്ട് സംശയം തോന്നി നാട്ടുകാരെ അറിയിച്ചു. അവര്‍ മണ്ണ് മാറ്റി നോക്കിയപ്പോള്‍ കൈയുടെ ഒരു ഭാഗം പുറത്തു കണ്ടു. തുടര്‍ന്ന് പൊലീസ് എത്തി നടത്തിയ പരിശോധനയിലാണ് കൊല്ലപ്പെട്ടത് ബാബുവാണെന്ന് തിരിച്ചറിഞ്ഞത്.