തിരുവനന്തപുരത്തു നിന്നും വിദേശത്തേക്ക് സര്‍വിസ് നടത്തുന്ന വിമാനങ്ങളുടെ എണ്ണം കൂടുന്നു. മാര്‍ച്ച് 27 മുതല്‍ ആരംഭിക്കുന്ന വേനല്‍ക്കാല ഷെഡ്യൂള്‍ അനുസരിച്ച് തിരുവനന്തപുരത്ത് നിന്നുള്ള പ്രതിവാര ഓപറേഷന്‍ നിലവിലുള്ള 348ല്‍ നിന്ന് 540 ആയി ഉയരും.

അന്താരാഷ്ട്ര ലക്ഷ്യസ്ഥാനങ്ങളിലേക്കുള്ള പ്രതിവാര ഫ്‌ലൈറ്റ് സര്‍വിസുകള്‍ നിലവിലുള്ള 95ല്‍ നിന്ന് 138 ആയി വര്‍ധിക്കും. 30 പുറപ്പെടലുകളുമായി ഷാര്‍ജയാണ് ലക്ഷ്യസ്ഥാനങ്ങളില്‍ ഒന്നാമത്. ദോഹ (18), മസ്‌കറ്റ്, ദുബൈ (17 വീതം) എന്നിവയാണ് മറ്റ് പ്രധാന ലക്ഷ്യസ്ഥാനങ്ങള്‍.

ബാങ്കോക്ക്, സലാല, ഹാനിമാധു (മാലദ്വീപ്) എന്നിവയാണ് പട്ടികയിലെ പുതിയ ലക്ഷ്യസ്ഥാനങ്ങള്‍. ഇതിനൊപ്പം പ്രതിവാര ആഭ്യന്തര വിമാന സര്‍വിസുകള്‍ നിലവിലുള്ള 79ല്‍ നിന്ന് 132 ആയി ഉയരും.

ബംഗളൂരു (27), മുംബൈ (23), ചെന്നൈ, ഡല്‍ഹി (14 വീതം) എന്നിവയാണ് കൂടുതല്‍ സര്‍വിസുകളുള്ള ലക്ഷ്യസ്ഥാനങ്ങള്‍. കൊല്‍ക്കത്ത, പുണെ, ദുര്‍ഗാപൂര്‍ എന്നിവയാണ് പട്ടികയിലെ പുതിയ ലക്ഷ്യസ്ഥാനങ്ങള്‍.

തിരുവനന്തപുരം അന്താരാഷ്ട്ര വിമാനത്താവളത്തില്‍ ഗതാഗതം സുഗമമാക്കാന്‍ എല്ലാ ക്രമീകരണങ്ങളും ചെയ്തിട്ടുണ്ട്. യാത്രക്കാരുടെ സുരക്ഷക്ക് മുന്‍ഗണന നല്‍കാന്‍ പ്രത്യേക ടീമുകള്‍ വിമാനത്താവളത്തില്‍ സജ്ജമാണന്നും വിമാനത്താവള നടത്തിപ്പിന്റെ ചുമതലയുള്ള അദാനി ഗ്രൂപ്പ് അധികൃതര്‍ അറിയിച്ചു.