സില്‍വര്‍ ലൈന്‍ പദ്ധതിയുടെ കാര്യത്തില്‍ കേന്ദ്ര സര്‍ക്കാരിന്റെ ഭാഗത്ത് നിന്നും വരുന്നത് ഗുരുതര വെട്ട്. എന്നാല്‍ പദ്ധതിയുടെ സാധ്യതകള്‍ കേന്ദ്ര സര്‍ക്കാര്‍ തത്കാലം ഇല്ലാതാക്കില്ല. കാരണം പദ്ധതി നടപ്പിലാക്കുന്നതിന് മുന്നോടിയായി സംസ്ഥാനത്ത് ഉണ്ടാകാനിടയുള്ള കലാപങ്ങളില്‍ കേന്ദ്ര സര്‍ക്കാര്‍ അതീവ തത്പരരാണ്. എങ്ങനെയെങ്കിലും കുഴഞ്ഞാല്‍ മതിയെന്ന് മാത്രമാണ് കേന്ദ്ര സര്‍ക്കാര്‍ കരുതുന്നത്.

സിപിഎം കേന്ദ്രകമ്മിറ്റിയില്‍ പങ്കെടുക്കാന്‍ ദല്‍ഹിയില്‍ എത്തിയ മുഖ്യമന്ത്രി പിണറായി വിജയന്‍, പ്രധാനമന്ത്രിയെ കണ്ട് കേരളത്തിലെ പൊതുസമൂഹത്തെ തെറ്റിദ്ധരിപ്പിക്കാനാണ് ശ്രമിച്ചതെന്ന് ഡല്‍ഹിയിലെ ബി ജെ പി കേന്ദ്രങ്ങള്‍ പറയുന്നു.

ഇക്കാര്യത്തില്‍ മുഖ്യമന്ത്രി ദയനീയമായി പരാജയപ്പെട്ടെന്നാണ് ബി ജെ പി നേതാക്കള്‍ പറഞ്ഞത്. മുഖ്യമന്ത്രി മടങ്ങിയ ശേഷം പ്രധാനമന്ത്രി റയില്‍വേ മന്ത്രിയെ വിളിച്ചു വരുത്തി പദ്ധതിയുടെ സാധ്യതകള്‍ ചര്‍ച്ച ചെയ്തു. തീര്‍ത്തും പ്രതികൂലമായ സമീപനമാണ് റയില്‍വേ മന്ത്രിയുടെ ഭാഗത്ത് നിന്നുള്ളത്.പ്രധാനമന്ത്രി ഇടപെട്ടാല്‍ പോലും തീരാത്ത വിഷയങ്ങളാണ് ഇതിലുള്ളത്.

സ്വാധീനത്തിന്റെ പേരുപറഞ്ഞ് പദ്ധതി നേടികൊണ്ടുപോകാനാണ് കേരളം ശ്രമിക്കുന്നതെന്ന് റയില്‍ മന്ത്രി പ്രധാനമന്ത്രിയെ അറിയിച്ചു.ഗതിശക്തി പദ്ധതിയുടെ പേര് പറയുന്നത് കേന്ദ്ര സര്‍ക്കാരിനെ തെറ്റിദ്ധരിപ്പിക്കാനാണെന്നും റയില്‍ മന്ത്രി അറിയിച്ചതായിമനസിലാക്കുന്നു.

റെയില്‍വേ മന്ത്രിയുമായി സംസാരിക്കാമെന്ന് പ്രധാനമന്ത്രി പറഞ്ഞെന്നുമാത്രമാണ് മുഖ്യമന്ത്രി പറഞ്ഞത്. കൂടിക്കാഴ്ചയ്ക്കുശേഷം റെയില്‍വേമന്ത്രി രാജ്യസഭയില്‍ നിലപാട് വ്യക്തമാക്കിയിട്ടുണ്ട്. സില്‍വര്‍ ലൈനിന് ഒരു കാരണവശാലും അനുമതി നല്‍കാനാവില്ലെന്നാണ് മന്ത്രി പറഞ്ഞത്. മുഖ്യമന്ത്രിയുടെ സന്ദര്‍ശനം വ്യഥാവിലായി.താന്‍ പറഞ്ഞതെല്ലാം പ്രധാനമന്ത്രി കേട്ടിരുന്നുവെന്നാണ് മുഖ്യമന്ത്രി പറഞ്ഞത്. അതൊരു മാതൃകയാണ്. ഈ മാതൃക മുഖ്യമന്ത്രിക്കും സ്വീകരിക്കാവുന്നതാണ്. എല്ലാവരോടും പ്രധാനമന്ത്രി മാന്യമായാണ് പെരുമാറാറുള്ളത്.

തന്നെ സന്ദര്‍ശിക്കാന്‍ വരാറുള്ളവരോട് കടക്കൂപുറത്ത് എന്ന് പ്രധാനമന്ത്രി പറയാറില്ലെന്ന് ബി ജെപി നേതാവ് പി കെ കൃഷ്ണദാസ് പറഞ്ഞു.അത് മാതൃകയാക്കണം. പ്രധാനമന്ത്രിയുടെ പെരുമാറ്റം കൊണ്ട് മുഖ്യമന്ത്രിക്ക് തെറ്റിദ്ധാരണയുണ്ടോയെന്ന് അറിയില്ല. കേന്ദ്രകമ്മിറ്റിയില്‍ പങ്കെടുക്കാന്‍ വന്ന് ജനങ്ങളെ തെറ്റിദ്ധരിപ്പിക്കാമെന്നായിരുന്നു അദ്ദേഹത്തിന്റെ വ്യാമോഹം. കെറെയിലിന് കേരളത്തിലെ ജനങ്ങള്‍ അനുകൂലമാണെന്ന് പറയുന്ന മുഖ്യമന്ത്രി റഫറണ്ടം നടത്താന്‍ തയ്യാറാകണമെന്നും ബി ജെ പി ആവശ്യപ്പെട്ടു.

പാര്‍ലെമെന്റ് തെരഞ്ഞടുപ്പിന് ഇനി രണ്ടു വര്‍ഷം മാത്രമാണ് ഉള്ളത്. കേരളത്തില്‍ ഇടതുപക്ഷത്തെ തറപറ്റിക്കണമെങ്കില്‍ സില്‍വര്‍ ലൈന്‍ ധാരാളം മതി. കോണ്‍ഗ്രസ് ജയിക്കുന്നതിനോട് പക്ഷേ കേന്ദ്രത്തിന് താത്പര്യമില്ല. കോണ്‍ഗ്രസിനെക്കാള്‍ നല്ലത് സി പി എം ആണെന്ന് ബിജെപി കരുതുന്നു.എന്നാല്‍ കോണ്‍ഗ്രസിനും സി പി എമ്മിനും ഇടയില്‍ നിന്ന് എത്രത്തോളം നേടിയെടുക്കാം എന്നാണ് ബി ജെ പി ചിന്തിക്കുന്നത്. ശബരി മലപോലെ സില്‍വര്‍ ലൈനിനെ ആളി കത്തിക്കാനും ബി ജെ പി ക്ക് താത്പര്യമുണ്ട്.