ഈ പാവപ്പെട്ട കര്‍ഷക സമൂഹം നല്‍കുന്ന നികുതിപ്പണമാണ് ലക്ഷം ശമ്പളം പറ്റുന്ന ഉദ്യോഗസ്ഥ തൊഴിലാളികളുടെ വരുമാനമെന്ന് തിരിച്ചറിയാനുള്ള സാമാന്യ ബുദ്ധി നമ്മുടെ തന്നെ ജനങ്ങള്‍ക്കില്ലാതെ പോയി. ഇതാണ് ഈ സമൂഹത്തിന്റെ ​ഗതികേട്. ലക്ഷം രൂപ ശമ്പളത്തിനൊപ്പം ലക്ഷക്കണക്കിന് രൂപ കിമ്പളവും കോഴയും കമ്മീഷനും പറ്റുന്ന ലക്ഷക്കണക്കിന് ഉദ്യോഗസ്ഥര്‍ക്ക് പണി മുടക്കാന്‍ എന്ത് അവകാശം എന്നു കര്‍ഷ സമൂഹവും തൊഴില്‍ രഹിതരും പാവങ്ങളും ചോദിക്കുന്നതില്‍ തെറ്റൊന്നുമില്ല. ഇതേ ചോദ്യമാണ് ജനങ്ങൾക്ക് വേണ്ടി കോടതി ഇന്നലെ ചോദിച്ചതും പിന്നാലെ ഉത്തരവ് ഇറക്കിയതും.

എന്നാൽ കോടതിയുടെ പരാമർശം നിലനിൽക്കുന്ന സാഹചര്യത്തിൽ വ്യാപാരികൾ ഇന്നത്തെ സമരത്തെ ബഹിഷ്കരിച്ച് മുന്നോട്ട് നീങ്ങാനാണ് തീരുമാനിച്ചത്. സർക്കാർ ഉദ്യോ​ഗസ്ഥർ ബന്ധപ്പെട്ട ഓഫീസുകളിൽ ഹാദരാകണം എന്ന് നിർബന്ധമായി പറയുമ്പോൾ അവർക്ക് പോകാനുള്ള വഴിയൊരുക്കണം എന്ന് നിർദ്ദേശമുള്ളപ്പോൾ എന്ത് കൊണ്ട് സാധാരണ ജനത്തിന് ഈ സുരക്ഷ ലഭിക്കുന്നില്ല എന്ന ചോദ്യമാണ് പലരും ഉയർത്തുന്നത്.

എന്നാൽ വ്യാപാരികളെ വിരട്ടുന്ന നയമാണ് സിപിഎം പിന്തുടരുന്നത് എന്നാണ് ഇപ്പോൾ മനസ്സിലാക്കാൻ സാധിക്കുന്നത്. സിപിഎം നേതാക്കളുടെ ചില പരാമർശമാണ് അതിന് ആധാരമായി ഉള്ളതും. കോടതിയെ ധിക്കരിക്കും വിധത്തിലും കോടതി ഉത്തരവിനെ വിമർശിച്ചുമാണ് സോഷ്യൽ മീഡിയയിലും മറ്റ് കുട്ടി നേതാക്കൾ പട പൊരുതുന്നത്.

വ്യാപാരി വ്യവസായി ഏകോപന സമിതിക്കെതിരെ സിഐടിയു നേതാവ് ആനത്തലവട്ടം ആനന്ദൻ രം​ഗത്ത് എത്തിയ ഒരു കാഴ്ചയും കാണുവാൻ സാധിക്കുന്നുണ്ട്. സമിതി പലപ്പോഴും സമരവിരോധികളാണെന്ന് മുതിർന്ന സിപിഎം നേതാവ് കുറ്റപ്പെടുത്തി. ഇന്നും പണിമുടക്കുമെന്നാണ് ആനത്തലവട്ടത്തിന്‍റെ പ്രഖ്യാപനം. എന്നാൽ കടകൾ അടപ്പിക്കില്ലെന്നും സിഐടിയു നേതാവ് പറഞ്ഞിട്ടുണ്ട്.

തുറന്ന കടകൾ നിർബന്ധമായി അടപ്പിക്കില്ലെന്നാണ് ആനത്തലവട്ടത്തിന്‍റെ പ്രഖ്യാപനം. എന്നാൽ കട തുറന്നാലും വാങ്ങാൻ ആളുവേണ്ടേ എന്നാണ് ചോദ്യം. അതായത് ആളുകളെ നിരത്തിൽ ഇറങ്ങാൻ സമ്മതിക്കാത്തിടത്തോളം കടകളിൽ കച്ചവടം നടക്കില്ല എന്ന് സാരം. ഓലപ്പാമ്പ് കാണിച്ചാൽ തൊഴിലാളികൾ പേടിക്കില്ല. സമരവിരോധികളായ സംഘടനകൾ ചിലതുണ്ടെന്നാണ് കുറ്റപ്പെടുത്തിയിരിക്കുന്നത്.

എന്നാൽ കടകൾ തുറന്നു കഴിഞ്ഞാൽ ജനങ്ങൾ ഇറങ്ങും എന്നുള്ള കാര്യം മുതിർന്ന നേതാവ് മറന്നു പോയിരിക്കുന്നു എന്നാണ് വിമർശനം. പണിമുടക്കിന്‍റെ രണ്ടാം ദിവസം സംസ്ഥാനത്തെ മുഴുവൻ കടകളും തുറക്കുമെന്ന് വ്യാപാരി വ്യവസായി ഏകോപന സമിതി പ്രഖ്യാപിച്ചിരുന്നു. സമരം പ്രഖ്യാപിച്ച ജീവനക്കാർ തന്നെ ജോലിക്കു പോകുമ്പോൾ വ്യാപാരികൾ മാത്രം അടച്ചിടേണ്ടതില്ലെന്നായിരുന്നു സംസ്ഥാന പ്രസിഡന്റ് പി കുഞ്ഞാവു ഹാജിയുടെ പ്രഖ്യാപനം.

എന്നാൽ കോടതി വിധിയെ ചോദ്യം ചെയ്ത് മറ്റൊരു നേതാവും രം​ഗത്ത് എത്തിയിരുന്നു. ഹൈക്കോടതി ഉത്തരവിനെതിരെ രൂക്ഷ വിമർശനവുമായി സിപിഎം കണ്ണൂർ ജില്ലാ സെക്രട്ടറി എം വി ജയരാജൻ ആണ് രം​ഗത്ത് എത്തിയത്. തൊഴിലാളികളുടെയും ജീവനക്കാരുടെയും സമരത്തെ വിലക്കുന്ന നടപടി ദൗർഭാഗ്യകരമാണ്. തൊഴിലാളികൾക്ക് പണിയെടുക്കാനും പണിമുടക്കാനുമുള്ള അവകാശമുണ്ട്. സമരം തൊഴിലാളിയുടെ അവകാശമാണെന്നും അത് കോടതിയുടെ ഔദാര്യമല്ലെന്നും ജയരാജൻ പറഞ്ഞു.

സമരത്തെ വിലക്കിയത് അങ്ങേയറ്റം തെറ്റാണ്. കോടതിയുടെ വിധി പരിഷ്‌ക്രിത സമൂഹത്തിന് യോജിച്ചതല്ല. ജീവനക്കാർക്ക് സമരം ചെയ്യാൻ സാധിക്കില്ലെന്ന് പറയാൻ ഇത് വെള്ളരിക്കാപ്പട്ടണമല്ലെന്നും ജയരാജൻ പറഞ്ഞു. ജഡ്ജിമാർ ഉൾപ്പടെ ഇപ്പോൾ രാജ്യത്ത് ജോലി ചെയ്യുന്നത് സ്വാതന്ത്ര്യം കിട്ടിയതു കൊണ്ടാണ്. സമരം ചെയ്താണ് രാജ്യത്തിന്റെ സ്വാതന്ത്ര്യം നേടിയെടുത്തത്. ജീവനക്കാരുടെ സമരത്തെ വിലക്കിയ കോടതിക്ക് ബ്രിട്ടീഷ് പ്രേതം കൂടിയെന്ന് പറയേണ്ടി വരും. കോടതിയുടേത് പഴയ ബ്രിട്ടീഷ് രാജിന്റെ ശബ്ദമാണ്. ജനങ്ങളുടെ ജീവിത പ്രശ്നങ്ങളിലാണ് കോടതി ഇടപെടൽ വേണ്ടതെന്നും ജയരാജൻ കൂട്ടിച്ചേർത്തു.

സർക്കാർ ജീവനക്കാർ പണിമുടക്കരുതെന്ന് കോടതി നിർദ്ദേശിച്ചതിനെ തുടർന്ന് ഇന്നലെ രാത്രിയോടെ സമരത്തിൽ പങ്കെടുക്കുന്നവർക്ക് ഡയസ്‌നോൺ ബാധകമാക്കി ചീഫ് സെക്രട്ടറി ഉത്തരവിറക്കിയിരുന്നു. അതേസമയം പണിമുടക്കുമെന്ന നിലപാടിൽ ഉറച്ചു നിൽക്കുകയാണ് സർവീസ് സംഘടനകൾ.

അതേസമയം, സമരം സർക്കാർ സ്പോൺസേഡ് അല്ലെന്നാണ് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍. തൊഴിലാളികളുടെ സമരമാണിത്. ജീവനക്കാർക്ക് പണിമുടക്കാനുള്ള അവകാശം നിഷേധിക്കാനാകില്ലെന്നും കോടിയേരി പറഞ്ഞു. സര്‍ക്കാര്‍ ജീവനക്കാരുടെ സമരത്തെ എതിര്‍ക്കുന്ന കോടതി ഉത്തരവ് ദൂരവ്യാപക പ്രത്യാഘാതം ഉണ്ടാക്കുന്നതാണ്. ജനാധിപത്യപരമായി പ്രതിഷേധിക്കാനുള്ള അവകാശം നിഷേധിക്കുന്നത് ജനാധിപത്യ സംവിധാനത്തിന് തന്നെ വെല്ലുവിളിയാണ്. ഹര്‍ത്താല്‍ അല്ല കടകള്‍ തുറക്കാമെന്നും കടകള്‍ ബലംപ്രയോഗിച്ച് അടപ്പിക്കില്ലെന്നും കോടിയേരി പറഞ്ഞു. 

എറണാകുളം ജില്ലയിലെ വ്യാപാര സ്ഥാപനങ്ങള്‍ തുറന്ന് പ്രവര്‍ത്തിക്കുമെന്ന് സംയുക്ത വ്യാപാരി സംഘടനകള്‍ അറിയിച്ചിരുന്നു. തൊഴിലാളി സമരത്തിന്റെ പേരില്‍ സംസ്ഥാനത്തെ ചെറുകിട ഇടത്തരം വ്യാപാര സ്ഥാപനങ്ങളെ നിര്‍ബന്ധമായി അടപ്പിച്ചപ്പോള്‍, കുത്തക മുതലാളിമാരായ യൂസഫലിയുടെ ലുലുമാളും, അംബാനിയുടെ റിലയന്‍സ് സൂപ്പര്‍മാര്‍ക്കറ്റ് ശൃംഖലയും നിര്‍ബാധം തുറന്ന് പ്രവര്‍ത്തിച്ചുവെന്ന് അവർ കുറ്റപ്പെടുത്തിയിരുന്നു. 

പണിമുടക്കിന്റെ ആദ്യദിനമായ ഇന്നലെ സംസ്ഥാനത്ത് അങ്ങിങ്ങ് അക്രമമുണ്ടായി. കടകൾക്കും ആശുപത്രി വാഹനങ്ങൾക്കു നേരെയും ആക്രമണമുണ്ടായി. ബിജെപിയുടെ പോഷക സംഘടനയായ ബിഎംഎസ് ഒഴികെ ഇരുപതോളം തൊഴിലാളി സംഘടനകളാണു പണിമുടക്കുന്നത്. തൊഴില്‍ കോഡ് റദ്ദാക്കുക, അവശ്യ പ്രതിരോധ സേവന നിയമം പിന്‍വലിക്കുക, സ്വകാര്യവല്‍ക്കരണവും സര്‍ക്കാര്‍ ആസ്തി വിറ്റഴിക്കല്‍ പദ്ധതിയും നിര്‍ത്തിവയ്ക്കുക, കൃഷി, വിദ്യാഭ്യാസം, ആരോഗ്യം എന്നീ മേഖലകളിലെ സര്‍ക്കാര്‍ നിക്ഷേപം വര്‍ധിപ്പിക്കുക, തൊഴിലുറപ്പ് പദ്ധതി വിഹിതം ഉയര്‍ത്തുക തുടങ്ങിയ ആവശ്യങ്ങൾ ഉന്നയിച്ചാണ് പണിമുടക്ക്.