യുവതിക്ക് അശ്ലീലസന്ദേശം അയച്ച യുവാവിനെ കാമുകനും സുഹൃത്തുക്കളും ചേര്‍ന്ന് മര്‍ദ്ദിച്ചു. സംഭവത്തില്‍ കമുകനെയും സുഹൃത്തുക്കളേയും പോലീസ് അറസ്റ്റ് ചെയ്തു. കാമുകിക്ക് അശ്ലീലസന്ദേശം അയച്ചതിനാണ് മര്‍ദ്ദിച്ചതെന്ന് പോലീസിനോട് പറഞ്ഞു. എന്നാല്‍ മര്‍ദ്ദനമേറ്റ യുവാവും യുവതിയുടെ മറ്റൊരു കാമുകനാണെന്നാണ് പറയുന്നത്. ബുധനാഴ്ച ഉച്ചക്ക് രണ്ടോടെയായിരുന്നു ദേശീയപാതയില്‍ വെച്ച് യുവാവിനെ തട്ടിക്കൊണ്ടുപോയത്.

യുവതിയുടെ ഇന്‍സ്റ്റഗ്രാം അക്കൗണ്ടിലൂടെ യുവാവിനെ ചോറ്റിയില്‍ വിളിച്ചുവരുത്തി നിര്‍ബന്ധിച്ച് കാറില്‍ കയറ്റി മുണ്ടക്കയം ഭാഗത്തേക്ക് കൊണ്ടുപോകുകയായിരുന്നു.സംഭവത്തില്‍ പാലാ വള്ളിച്ചിറ മാങ്കൂട്ടത്തില്‍ ഷെമില്‍ തോമസ് (20), പാലാ മംഗലത്ത് ഇമ്മാനുവേല്‍ ജോസഫ് (29), പാലാ ചെത്തിമറ്റം പെരുമ്ബള്ളി കുന്നേല്‍ മിഥുന്‍ സത്യന്‍ (23) എന്നിവരെ കാഞ്ഞിരപ്പള്ളി പൊലീസ് അറസ്റ്റ് ചെയ്തു.

മുണ്ടക്കയം വണ്ടന്‍പതാല്‍ സ്വദേശിയായ യുവാവ് ഇന്‍സ്റ്റഗ്രാമിലൂടെ പാലാ കുറിച്ചിത്താനം സ്വദേശിനിയായ നഴ്‌സിങ് വിദ്യാര്‍ഥിനിയെ പരിചയപ്പെടുകയും അശ്ലീലസന്ദേശങ്ങളും പടങ്ങളും അയച്ചുകൊടുത്തുവെന്ന കാരണം പറഞ്ഞാണ് തട്ടിക്കൊണ്ടുപോയി മര്‍ദിക്കുകയും ശേഷം കാറില്‍നിന്ന് ചോറ്റിക്ക് സമീപം ഇറക്കിവിടുകയും ചെയ്തത്.

യാത്രയില്‍ മര്‍ദിച്ച് അവശനാക്കിയതിനുശേഷം മൂന്നംഗസംഘം പാലായിലേക്ക് തിരികെ പോകുംവഴിയാണ് കാഞ്ഞിരപ്പള്ളി ടൗണില്‍വെച്ച് എസ്.ഐ അരുണ്‍ തോമസിന്റെ നേതൃത്വത്തിലുള്ള സംഘം പിടികൂടിയത്. ഇവരെ കോടതിയില്‍ ഹാജരാക്കി റിമാന്‍ഡ് ചെയ്തു.

കുറച്ച് ദിവസം മുമ്പ് എട്ടാം ക്ലാസ് വിദ്യാര്‍ത്ഥിനിക്ക് നിരന്തരമായി അശ്ലീല സന്ദേശം അയച്ച പരാതിയില്‍ നാല് യുവാക്കള്‍ അറസ്റ്റിലായിരുന്നു. കല്ലമ്പലം സ്വദേശി അല്‍ അമീന്‍, ഒറ്റപ്പാലം സ്വദേശികളായ ഫര്‍ഹത്തുള്ള, ഇബ്രാഹിം ബാദുഷ, ഷിനാസ് എന്നിവരാണ് പിടിയിലായത്. പോക്‌സോ നിയമപ്രകാരം റൂറല്‍ സൈബര്‍ പൊലീസാണ് പ്രതികളെ അറസ്റ്റ് ചെയ്തത്.