നേതാവിനെ കാട്ടിലേക്ക് തട്ടി... ലാഭത്തില് പോകുന്ന കെഎസ്ഇബിയെ ഒരു വനിതാ ജീവനക്കാരിക്ക് വേണ്ടി യൂണിയന്കാര് കുത്തുപാളയെടുപ്പിക്കാന് നോക്കി; കടുത്ത നടപടിയിലൂടെ നേതാവിന്റെ തന്നെ ഫ്യൂസൂരി ചെയര്മാന് ബി അശോക് നടപടിയെടുത്തു; മന്ത്രിയും ചെയര്മാന്റെ പിന്നിലായി; മന്ത്രിയ്ക്കെതിരെ നേതാക്കള് നീങ്ങിയപ്പോള് എല്ലാം ശുഭം
എന്തിനായിരുന്നു കെഎസ്ഇബിയിലെ ഈ സമരമെന്ന് ഇനിയെങ്കിലും നേതാക്കന്മാര് സാധാരണക്കാരോട് പറയണം. സമരം ഞങ്ങളുടെ അവകാശമാണെന്ന് വീമ്പിളക്കുന്നവര് ഈ സമരം കൊണ്ട് എന്ത് നേടിയെന്നും പറയണം. അനധികൃതമായി ജോലിയില് നിന്നും വിട്ടുനിന്ന വനിതാ നേതാവിന് വേണ്ടിയാണ് നേതാക്കള് സമരം പ്രഖ്യാപിച്ചത്. അത് അവസാനം അവര്ക്ക് തന്നെ വിനയായി. സസ്പെന്ഷനും കിട്ടി പ്രൊമോഷനും പോയിക്കിട്ടി.
ചെയര്മാന് ബി അശോക് ശക്തമായ നടപടിയെടുത്തു. കെ.എസ്.ഇ.ബി. ഓഫീസേഴ്സ് അസോസിയേഷന് പ്രസിഡന്റിനെ തന്നെ സസ്പെന്ഡ് ചെയ്തു. ചരിത്രത്തിലാദ്യമായാണ് ഒരു നേതാവിനെ തന്നെ സസ്പെന്ഡ് ചെയ്യുന്നത്. ഇതോടെ സിഐടിയുക്കാരും രംഗത്തെത്തി. എന്നാല് മന്ത്രി ചെയര്മാനൊപ്പം നിന്നു. അതിന് പഴി മന്ത്രിയും കേട്ടു.
ഭരിക്കാനറിയില്ലെങ്കില് ഇട്ടിട്ട് പോകണമെന്ന സി.ഐ.ടി.യു.സംസ്ഥാന സെക്രട്ടറി കെ.എസ്.സുനില്കുമാറിന്റെ പരിഹാസത്തിന് അതേനാണയത്തില് വൈദ്യുതി മന്ത്രി കെ. കൃഷ്ണന്കുട്ടി മറുപടി പറഞ്ഞു. ഞാന് സാധാരണക്കാരന്, അവരുടെ നിലയിലേക്ക് വളര്ന്നിട്ടില്ല. അവരെല്ലാം വലിയ വിവരമുള്ളയാളുകള് .മിഡില് ക്ളാസുകാരനായ എനിക്ക് അത്രയും വിവരമില്ല. സാധാരണക്കാരുടെ താത്പര്യമനുസരിച്ചാണ് വൈദ്യുതിബോര്ഡിലെ കാര്യങ്ങളില് തീരുമാനമെടുക്കുക.
കെ.എസ്.ഇ.ബി. ഓഫീസേഴ്സ് അസോസിയേഷന് നേതാക്കളുടെ സസ്പെന്ഷന് പിന്വലിക്കണമെന്നാവശ്യപ്പെട്ട് വൈദ്യുതി ഭവന് മുന്നില് നടത്തിയ റിലേസത്യഗ്രഹം ഉദ്ഘാടനം ചെയ്തുകൊണ്ടാണ് സുനില്കുമാര് മന്ത്രിയെ പരിഹസിച്ചത്. ചിറ്റൂരില് മാത്രം കൊതുമ്പിന് മീതെയാണ് കൊച്ചങ്ങ, മറ്റെല്ലായിടത്തും അത് കൊതുമ്പിന് താഴെയാണെന്നായിരുന്നു പരിഹാസം.
പൊതുമേഖലാ സ്ഥാപനങ്ങള് കാര്യക്ഷമമായും ലാഭകരമായും പ്രവര്ത്തിക്കണമെന്ന സി.പി.എം പാര്ട്ടി കോണ്ഗ്രസിലെ നയരേഖയും അതിനനുസരിച്ചുള്ള മുഖ്യമന്ത്രിയുടെ നിലപാടും മനസ്സിലാക്കാതെ, മാനേജ്മെന്റിനെതിരെ സമരത്തിനിറങ്ങിയ ഭരണാനുകൂല സംഘടനയായ കെ.എസ്.ഇ.ബി ഓഫീസേഴ്സ് അസോസിയേഷന് നേതാക്കള് പാഠം പടിച്ചു.
ചെയര്മാന് ബി അശോക് സമരത്തിന്റെ ഫ്യൂസ് ഊരിയിരിക്കുകയാണ്. സ്പെന്ഷനിലായിരുന്ന എക്സിക്യൂട്ടീവ് എന്ജിനീയറും അസോസിയേഷന് പ്രസിഡന്റുമായ എം.ജി.സുരേഷ് കുമാറിനെ തിരിച്ചെടുത്തെങ്കിലും മലപ്പുറം പെരിന്തല്മണ്ണ ഡിവിഷനിലേക്ക് സ്ഥലം മാറ്റി. അസോസിയേഷന് ജനറല് സെക്രട്ടറിയും അസിസ്റ്റന്റ് എക്സിക്യൂട്ടീവ് എന്ജിനീയറുമായ ബി.ഹരികുമാറിന്റെ എക്സിക്യൂട്ടീവ് എന്ജിനീയറായുള്ള പ്രമോഷന് തടഞ്ഞു.
സസ്പെന്ഷന് പിന്വലിക്കാന് തീരുമാനിച്ചെങ്കിലും പോസ്റ്റിംഗ് നിശ്ചയിച്ചിട്ടില്ല. ലീവിന് അപേക്ഷിക്കാതെയും ചുമതല കൈമാറാതെയും യാത്രപോയ എക്സിക്യൂട്ടീവ് എന്ജിനീയര് ജാസ്മിന് ബാനുവിന്റെ സസ്പെന്ഷന് പിന്വലിച്ചു. ഇവരെ പത്തനംതിട്ട സീതത്തോടിലേക്ക് മാറ്റി. ഹൈക്കോടതി നിര്ദ്ദേശ പ്രകാരമാണ് ജാസ്മിന്റെ കാര്യത്തില് തീരുമാനമെടുത്തത്.
ഒരാഴ്ച മുമ്പ് ജാസ്മിന് ബാനുവിന്റെ സസ്പെന്ഷനെതിരെ തുടങ്ങിയ പ്രതിഷേധം സംഘടനാ നേതാക്കളുടെ സസ്പെന്ഷനില് കലാശിച്ചതോടെ കെ.എസ്.ഇ.ബി ചെയര്മാന് ബി.അശോകിനെ പുറത്താക്കണമെന്ന നിലപാടിലായിരുന്നു അസോസിയേഷന്. വൈദ്യുതി മന്ത്രി കെ. കൃഷ്ണന്കുട്ടി ചെയര്മാനെ പിന്തുണച്ചതോടെ അദ്ദേഹത്തിനെതിരെയും അസോസിയേഷന് തിരിഞ്ഞു. ഇതോടെ ഇവരുമായി ചര്ച്ചയ്ക്കില്ലെന്ന് വ്യക്തമാക്കിയ വൈദ്യുതി മന്ത്രി പ്രശ്നം പരിഹരിക്കാന് ചെയര്മാനെയും ഡയറക്ടര് ബോര്ഡിനെയും ചുമതലപ്പെടുത്തി.
ചെയര്മാന്റെ നിര്ദ്ദേശ പ്രകാരം ഇന്നലെ ഫിനാന്സ് ഡയറക്ടര് വി.ആര്.ഹരി ഒന്പത് ഓഫീസേഴ്സ് സംഘടനാ ഭാരവാഹികളുടെ യോഗം ഓണ്ലൈനായി വിളിച്ച് ചര്ച്ച ചെയ്തു. ചെയര്മാനും മാനേജിംഗ് ഡയറക്ടറുമായ ഡോ.ബി. അശോക് പങ്കെടുത്തില്ല. മാനേജ്മെന്റ് നിര്ദ്ദേശങ്ങള് സ്വീകാര്യമല്ലെന്ന് നേതാക്കള് വ്യക്തമാക്കിയതോടെ ധാരണയാവാതെ പിരിഞ്ഞു. എന്നാല്, തൊട്ടുപിന്നാലെ, സസ്പെന്ഷന് പിന്വലിച്ചും സ്ഥലംമാറ്റിയും ഉത്തരവ് ഇറങ്ങി. അതോടെ സമരത്തിന്റെ ഫ്യൂസും പോയി.
"
https://www.facebook.com/Malayalivartha
