പോക്‌സോ കേസ് പ്രതിയെ തൂങ്ങിമരിച്ച നിലയിൽ കണ്ടെത്തിയതായി റിപ്പോർട്ട്. അഞ്ചൽ കോട്ടുക്കൽ സ്വദേശി മണി രാജൻ ആണ് തൂങ്ങി മരിച്ചത്. എട്ട് വയസുകാരിയെ പീഡിപ്പിച്ച കേസിൽ വിചാരണ നേരിടുന്ന പ്രതിയാണ് ഇയാൾ എന്നാണ് ലഭ്യമാകുന്ന വിവരം. ഇന്ന് രാവിലെയോടെയാണ് സംഭവം നടന്നത്. കിളിമാനൂർ അടയം വെയിറ്റിംഗ് ഷെഡ്ഡിന് സമീപം മറ്റൊരു ഷെഡ്ഡിലാണ് ഇയാളെ തൂങ്ങിമരിച്ച നിലയിൽ കണ്ടെത്തിയിരിക്കുന്നത്.

അതോടൊപ്പം തന്നെ രാവിലെ ജോലിക്ക് പോയവരാണ് ഇത് ആദ്യം കണ്ടത്. നാട്ടുകാർ പോലീസിനെ വിവരം അറിയിച്ചതിനെ തുടർന്ന് ഉദ്യോഗസ്ഥർ എത്തിയിരുന്നു. മൃതദേഹം പരിശോധിച്ചപ്പോൾ തന്നെ കിട്ടിയ കത്തിൽ ഒരു ഫോൺ നമ്പറാണ് ഉണ്ടായിരുന്നത്. നമ്പറിൽ വിളിച്ച് അന്വേഷിച്ചപ്പോഴാണ് ഇത് പോക്‌സോ കേസ് പ്രതിയാണെന്ന് മനസിലാക്കാൻ കഴിഞ്ഞത്.

അതേസമയം ആറ് മാസം മുൻപ് എട്ട് വയസുകാരിയെ പീഡിപ്പിക്കാൻ ശ്രമിച്ചെന്ന പരാതിയിൽ ഇയാളെ പോലീസ് അറസ്റ്റ് ചെയ്തിരുന്നു. ജയിലിലായിരുന്ന മണിരാജന് കഴിഞ്ഞ ദിവസമാണ് ജാമ്യം ലഭിച്ചിരുന്നത്. പുറത്തിറങ്ങിയ ഇയാൾ വീട്ടിലേക്ക് എത്തിയിരുന്നില്ല. കേസുമായി ബന്ധപ്പെട്ട വിചാരണ ഇപ്പോൾ നടക്കുന്നതിനിടെയാണ് ആത്മഹത്യ. സംഭവത്തിൽ പോലീസ് അന്വേഷണം ആരംഭിക്കുകയുണ്ടായി.