കേരളത്തിന്റെ തലസ്ഥാനമെന്നതിനുപരി വിനോദ സഞ്ചാരികളെ കൂടി ആകർഷിക്കുന്ന നഗരമാണ് തിരുവനന്തപുരം. മ്യൂസിയവും മൃഗശാലയും മുതൽ ചരിത്ര സ്മാരകങ്ങൾ വരെ നീളുന്ന നിരവധി കാഴ്ചകൾ നഗരത്തിലുണ്ട്. നഗരത്തിന്റെ കാഴ്ചകൾ വ്യത്യസ്ത രീതിയിൽ കാണാൻ പുതിയ ഒരു വഴി തുറന്നിരിക്കുകയാണ് ഇപ്പോൾ. കെഎസ്ആർടിസി ആണ് ഈ പുതിയ സേവനം ആരംഭിച്ചിരിക്കുന്നത്.

മുകൾ വശം തുറന്നിട്ടുകൊണ്ടുള്ള ഡബിൾ ഡെക്കർ ബസിലുള്ള യാത്രക്കാണ് കെഎസ്ആർടിസി ഇപ്പോൾ തിരുവനന്തപുരം നഗരത്തിൽ അവസരമൊരുക്കിയത്. തലസ്ഥാന നഗരത്തിലെ സായാഹ്ന രാത്രി കാഴ്ചകൾ ആസ്വദിക്കുവാൻ സഞ്ചാരികൾക്ക് അവസരമുണ്ട്. തുറന്ന ഡബിൾ ഡെക്കർ ബസ്സിലിരുന്ന് നഗരക്കാഴ്ചകൾ കാണുവാനാണ് കെഎസ്ആർടിസി തിരുവനന്തപുരത്ത് അവസരം ഒരുക്കുന്നത്. മേൽക്കൂരയില്ലാത്ത ഡബിൾ ഡെക്കർ ബസ്സുകളുടെ മുകൾഭാഗത്ത് ഇരുന്ന് യാത്ര ചെയ്ത് വിശാലമായ ആകാശക്കാഴ്ചകളും നഗര കാഴ്ചകളും നേരിട്ട് കാണാം.

കെഎസ്ആർടിസി 'സിറ്റി റൈഡ് 'എന്ന് പേരിൽ സർവീസിൽ വിനോദസഞ്ചാരികൾക്ക് ഏറ്റവും ആകർഷണീയമായ രീതിയിൽ നഗരക്കാഴ്ചകൾ തടസ്സങ്ങളില്ലാതെ കാണാനുള്ള അവസരമാണ് ഒരുക്കുന്നത്തിരുവനന്തപുരം നഗരത്തിന്റെ സായാഹ്ന, രാത്രി കാഴ്ചകൾ കാണുന്നതിന് വിനോദ സഞ്ചാരികൾക്ക് സൗകര്യപ്രദമായ രീതിയിലാണ് ബസിനുള്ളിലെ സീറ്റുകൾ ക്രമീകരിച്ചിരിക്കുന്നത്. പത്മനാഭസ്വാമി ക്ഷേത്രം, സെക്രട്ടേറിയറ്റ്, നിയമസഭ, മ്യൂസിയം, കനകക്കുന്ന് കൊട്ടാരം, വെള്ളയമ്പലം, കോവളം, ലുലുമാൾ റൂട്ടിലാണ് രാത്രി സർവീസ് നടത്തുന്നത്. നിലവില്‍ വൈകുന്നേരം 5 മണി മുതല്‍ 10 മണിവരെ നീണ്ടു നില്‍ക്കുന്ന നൈറ്റ് സിറ്റി റൈഡും, രാവിലെ 9 മുതല്‍ 4 വരെ നീണ്ടു നില്‍ക്കുന്ന ഡേ സിറ്റി റൈഡുമാണ് നടത്തുന്നത്. ഈ രണ്ട് സർവീസിലും ടിക്കറ്റ്‌ നിരക്ക് 250 രൂപയാണ്.

പ്രാരംഭ ഓഫര്‍ എന്ന നിലയ്ക്ക് 200 രൂപയ്ക്ക് ടിക്കറ്റ് ലഭിക്കും.ഡേ ആൻഡ് നൈറ്റ് റൈഡ് ഒരുമിച്ച് ടിക്കറ്റ്‌ എടുക്കുന്നവര്‍ക്ക് പ്രാരംഭ ഓഫര്‍ എന്ന നിലയ്ക്ക് ഒരു ദിവസം 350 രൂപയുട് ടിക്കറ്റും ലഭ്യമാകും. ടിക്കറ്റ് ബുക്കിം​ഗ് വേണ്ടി 9447479789 ( മൊബൈൽ & വാട്ട്സ് അപ്പ്), 8129562972 ( സോഷ്യൽ മീഡിയ സെൽ വാട്ട്സ് അപ്പ്) എന്നീ നമ്പറുകളിൽ ബന്ധപ്പെടാം.

കഴിഞ്ഞ ദിവസമാണ് ശിശു​ക്ഷേമ സമിതിയിലെ 30 കുട്ടികളുമായാണ് ആദ്യ സർവീസ് നടത്തിയത്.കുറഞ്ഞ കാലം കൊണ്ട് വിനോദ സഞ്ചാരികള്‍ക്കിടയില്‍ പ്രചാരം നേടിയ കെ.എസ്.ആര്‍.ടി.സി ബഡ്ജെറ്റ് ടൂര്‍സ് ആണ് സഞ്ചാരികള്‍ക്ക് ഈ സൗകര്യം ഒരുക്കുന്നത്. വൻ നഗരങ്ങളിലും വിദേശരാജ്യങ്ങളിലും ഉള്ളതുപോലെ ഇരുനില ബസിലെ മുകൾ ഭാഗത്തെ മേൽക്കൂര ഒഴിവാക്കിയ ഡബിൾ ഡെക്കർ ഓപ്പൺ ഡെക്ക് ബസ് കേരളത്തിൽ തന്നെ ആദ്യത്തേതാണ്.