സ്വിഫ്റ്റ് ബസ് വീണ്ടും അപകടത്തിൽ‍പെട്ടു. ലോറിയുമായി കൂട്ടിയിടിച്ചാണ് അപകടമുണ്ടായത്. രാവിലെ ആറരയോടെയാണ് സംഭവം നടക്കുന്നത്. താമരശ്ശേരിക്കടുത്ത് കൈതപ്പൊയിലിൽ വച്ച് ലോറിയുടെ പിന്നിൽ ബസ് ഇടിച്ചത്. തിരുവനന്തപുരം- മാനന്തവാടി ബസ് ആണ് അപകടത്തിൽപ്പെട്ടത്.

മുന്നിൽ പോവുകയായിരുന്ന ലോറി ബ്രേക്ക് ഇട്ടപ്പോൾ പിന്നിലുണ്ടായിരുന്ന സ്വിഫ്റ്റ് ബസ് ലോറിയുടെ പിൻഭാഗത്ത് ഇടിക്കുകയായിരുന്നു. യാത്രക്കാർക്ക് ആർക്കും പരുക്കില്ല. അപകടത്തിൽ ബസിന്റെ മുൻഭാഗത്തെ ചില്ലിനും വാതിലിനും കേടുപാടുണ്ടായി.

രണ്ടു ദിവസം മുൻപ് മാവൂർ റോഡിലെ കെഎസ്ആർടിസി ടെർമിനലിൽ സ്വിഫ്റ്റ് ബസ് പിറകോട്ട് ഉരുണ്ടു പോയി എസി ലോഫ്ലോർ ബസിന്റെ ചില്ല് തകർത്തിരുന്നു. ഇത് തുടർച്ചയായി മൂന്നാം തവണയാണ് ജില്ലയിൽ കെഎസ്ആർടിസിയുടെ സ്വിഫ്റ്റ് സർവീസുകൾ അപകടത്തിൽപെടുന്നത്. നേരത്തേ, അപകടത്തിൽപ്പെട്ട സ്വിഫ്റ്റ് ബസിലെ താൽക്കാലിക ഡ്രൈവർമാരെ പിരിച്ചു വിട്ടിരുന്നു.

അതേസമയം, മാവൂർ റോഡ് കെഎസ്ആർടിസി ടെർമിനലിൽ സ്വിഫ്റ്റ് ബസുകൾ കൂട്ടിയിടിച്ച് ചില്ലുകൾ തകർന്നിട്ടുണ്ടായിരുന്നു. ബെംഗളൂരുവിലേക്ക് പോവാൻ നിർത്തിയിട്ട ബസിൽ, ബത്തേരിയിൽനിന്ന് വന്ന ബസ് ഇടിക്കുകയായിരുന്നു. കെഎസ്ആർടിസി സ്വിഫ്റ്റ് ബസുകൾ സർവീസ് ആരംഭിച്ച അന്നു തന്നെ അപകടത്തിൽപെട്ടിരുന്നു.

ഏപ്രിൽ 11ന് തിരുവനന്തപുരം ഡിപ്പോ, കല്ലമ്പലം എന്നിവിടങ്ങളും ഏപ്രിൽ 12ന് മലപ്പുറം ജില്ലയിലെ കോട്ടയ്ക്കൽ വച്ചും അപകടം ഉണ്ടായി. ഏപ്രിൽ 14ന്, തൃശൂർ കുന്നംകുളം മലായ ജംക്‌ഷനു മുന്നിൽ വാനിടിച്ചു വീണ തമിഴ്നാട് സ്വദേശി പരസ്വാമി (55) യുടെ കാലിൽ കൂടി സ്വിഫ്റ്റ് ബസ് കയറിയിറങ്ങിയിരുന്നു. പരസ്വാമിയെ ആശുപത്രിയിലെത്തിച്ചെങ്കിലും രക്ഷിക്കാനായില്ല.

എന്നാൽ ഈ മുട്ടലും ഉരസലുമൊക്കെ വിവാദമായെങ്കിലും കെഎസ്ആര്‍ടിസി സ്വിഫ്റ്റ് ഭേദപ്പെട്ട ലാഭം കൊണ്ടുവന്നെന്ന് കണക്കുകൾ. സർവീസുകൾ ആരംഭിച്ച 11 മുതൽ 17വരെ ലഭിച്ചത് 35,38,291രൂപ. 78,415 കിലോമീറ്ററാണ് സ്വിഫ്റ്റ് ബസുകൾ ഈ ദിവസങ്ങളിൽ സർവീസ് നടത്തിയത്. ബെംഗളൂരുവിലേക്കുള്ള സർവീസുകളാണ് കലക്‌ഷനിൽ ഒന്നാമത്. 

2021 ഫെബ്രുവരി 19നാണ് കെഎസ്ആർടിസി സ്വിഫ്റ്റ് കമ്പനി രൂപീകരിക്കാൻ തീരുമാനിച്ചത്. കെഎസ്ആർടിസിക്ക് സ്വിഫ്റ്റ് സർവീസ് ലാഭമാണോ എന്ന് കുറച്ചു കാലത്തെ പ്രവർത്തനം നിരീക്ഷിച്ച ശേഷമേ പറയാൻ കഴിയൂ എന്ന് മാനേജ്മെന്റ് വ്യക്തമാക്കി. എന്നാൽ സർവീസുകൾ ലാഭമാണെന്ന് കെഎസ്ആർടിസി പറയുന്നു.