ലോകത്തിലെ ഏറ്റവും വികസിത നാടുകൾക്കൊപ്പം കേരളത്തിന്റെ പേരും ഇടംപിടിക്കുമെന്ന് തദ്ദേശസ്വയംഭരണ വകുപ്പ് മന്ത്രി എം.വി.ഗോവിന്ദൻ മാസ്റ്റർ. അടുത്ത പത്തോ ഇരുപതോ വർഷത്തിനുള്ളിൽ ഇത് സാധ്യമാകുമെന്നും വ്യവസായം, ടൂറിസം, സാധാരണക്കാരുടെ ജീവിതം മെച്ചപ്പെടുത്താനുള്ള പ്രവർത്തനങ്ങൾ എന്നിവയെല്ലാം ഒത്തുചേരുമ്പോൾ കേരള മാതൃക ലോകശ്രദ്ധനേടുമെന്നും മന്ത്രി പറഞ്ഞു.

തിരുവനന്തപുരം കാട്ടക്കട നിയോജകമണ്ഡലത്തിലെ ജനകീയ പദ്ധതികളുമായി ബന്ധപ്പെട്ട് വെള്ളയമ്പലം പഞ്ചായത്ത് അസോസിയേഷൻ ഹാളിൽ നടന്ന ഏകദിന ശില്പശാല ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. എല്ലാ ജനവിഭാഗങ്ങളുടേയും ജീവിതം ഗുണമേന്മയുള്ളതാക്കി മാറ്റുകയെന്നതാണ് സർക്കാർ ലക്ഷ്യം. സന്തോഷമുള്ള ഒരു തലമുറയായിരിക്കണം ഇനി ഉണ്ടാകേണ്ടതെന്നും അടിസ്ഥാനപരമായ പ്രശ്‌നങ്ങളെല്ലാം പരിഹരിക്കപ്പെടുമ്പോൾ സന്തോഷമുള്ളവരുടെ നാടായി കേരളം മാറുമെന്നും മന്ത്രി കൂട്ടിച്ചേർത്തു.

ജലസമൃദ്ധമായ മണ്ഡലം എന്നതിനേക്കാൾ വികസനം എന്ന ആശയമാണ് കാട്ടാക്കട മാതൃകയിലൂടെ മുന്നോട്ടുവെച്ചതെന്നും റോഡുകളിലും കെട്ടിടങ്ങളിലും മാത്രമല്ല മനസിലാണ് വികസനം സാധ്യമാകേണ്ടതെന്നും അധ്യക്ഷത വഹിച്ച ഐ.ബി.സതീഷ് എം.എൽ.എ പറഞ്ഞു.

കാട്ടാക്കട നിയോജക മണ്ഡലത്തിൽ നടപ്പാക്കുന്ന ജലസമൃദ്ധി, ഒപ്പം, ജൈവസമൃദ്ധി, കാട്ടാൽ ഇൻഡസ്ട്രിയൽ ഡെവലപ്‌മെന്റ് കൗൺസിൽ, കാർബൺ ന്യൂട്രൽ കാട്ടാക്കട തുടങ്ങിയ പദ്ധതികളുടെ അവലോകനം, പദ്ധതികളുടെ കാര്യക്ഷമമായ നടപ്പാക്കൽ എന്നിവ ചർച്ച ചെയ്യുന്നതിനാണ് ശില്പശാല സംഘടിപ്പിച്ചത്. ശില്പശാലയിൽ ഉയർന്നു വരുന്ന നിർദേശങ്ങൾ ഉൾപ്പെടുത്തി അടുത്ത അഞ്ച് വർഷക്കേത്തുള്ള നിർവഹണ മാർഗരേഖ തയാറാക്കും.

ശുചിത്വ മിഷൻ എക്‌സിക്യൂട്ടീവ് ഡയറക്ടർ കെ.ടി ബാലഭാസ്‌കരൻ, ഭൂവിനിയോഗ കമ്മീഷണർ എ.നിസാമുദ്ദീൻ, കില റിസർച്ച് അസോസിയേറ്റ് ഡോ.കെ.പി.എൻ അമൃത, നെയ്യാറ്റിൻകര സർക്കിൾ എക്‌സൈസ് ഇൻസ്‌പെക്ടർ എ.പി.ഷാജഹാൻ, കാട്ടാൽ ഇൻഡസ്ട്രിയൽ ഡവലപ്‌മെന്റ് കൗൺസിൽ കോർഡിനേറ്റർ സി.എസ്.നിതിൻ ചന്ദ്രൻ, കെ.എസ്.ഇ.ബി സൗര പ്രോജക്ട് അസിസ്റ്റന്റ് എക്‌സിക്യൂട്ടീവ് എഞ്ചിനീയർ നൗഷാദ് തുടങ്ങിയവർ വിവിധ പദ്ധതികൾ അവലോകനം ചെയ്തു.

ജില്ലാ പഞ്ചായത്ത് പ്രസിഡന്റ് ഡി.സുരേഷ് കുമാർ മുഖ്യപ്രഭാഷണം നടത്തി. ജില്ലാ പഞ്ചായത്ത് ക്ഷേമകാര്യ സ്ഥിരം സമിതി ചെയർമാൻ വിളപ്പിൽ രാധാകൃഷ്ണൻ, വിവിധ ബ്ലോക്ക്-ഗ്രാമപഞ്ചായത്ത് അധ്യക്ഷന്മാർ, ത്രിതല പഞ്ചായത്ത് അംഗങ്ങൾ, മറ്റ് ജനപ്രതിനിധികൾ, വിവിധ പദ്ധതികളുടെ നോഡൽ ഓഫീസർമാർ എന്നിവരും ശില്പശാലയിൽ പങ്കെടുത്തു.