ഭാര്യയെ വെട്ടിക്കൊലപ്പെടുത്തിയശേഷം ഭര്‍ത്താവ് ജീവനൊടുക്കി... ബാങ്കില്‍ പോയി മടങ്ങുന്ന വഴിയിയില്‍ രമാവതി റബര്‍ തോട്ടത്തില്‍ വിറക് ശേഖരിക്കുന്നതിനിടെ പതുങ്ങിയിരുന്ന രാജന്‍ കൊടുവാളുകൊണ്ട് കഴുത്തിലും കൈയിലും കാലിലുമടക്കം ആറുതവണ വെട്ടി, തടയാന്‍ ശ്രമിച്ച അനുജത്തിയുടെ കൈപ്പത്തി വെട്ടിമാറ്റി, ഭാര്യയുടെ മരണം ഉറപ്പാക്കിയ ശേഷം സ്ഥലത്ത് നിന്നും മുങ്ങി.

കൊട്ടാരക്കര നെടുവത്തൂര്‍ പുല്ലാമല കല്ലുവിള താഴതില്‍ വീട്ടില്‍ രാജന്‍ (63), ഭാര്യ രമാവതി (58) എന്നിവരാണ് മരിച്ചത്. രമാവതിയുടെ അനുജത്തി രതിയുടെ കൈപ്പത്തിയാണ് അറ്റുപോയത്. ഇന്നലെ രാവിലെ 11 ഓടെയാണ് നാടിനെ നടുക്കിയ സംഭവം നടന്നത്.രാജനും രമാവതിയും ഏറെനാളായി പിണങ്ങിക്കഴിയുകയാണ്.

മക്കളായ രാജേഷ്, രമേശ് എന്നിവര്‍ക്കൊപ്പമാണ് രമാവതി താമസിച്ചിരുന്നത്. രാജന്‍ സമീപത്തുള്ള കുടുംബവീട്ടില്‍ ഒറ്റയ്ക്കാണ് കഴിഞ്ഞിരുന്നത്.
കുടുംബപ്രശ്‌നങ്ങള്‍ സംബന്ധിച്ച് പുത്തൂര്‍ പൊലീസില്‍ കേസ് നിലവിലുണ്ട്. ഇതേത്തുടര്‍ന്ന് വീട്ടില്‍ കയറുന്നത് പൊലീസ് വിലക്കിയിരുന്നു..ഇന്നലെ രാവിലെ കുറുമ്പാലൂരില്‍ താമസിക്കുന്ന അനുജത്തി രതിക്കൊപ്പം രമാവതി ഇസാഫ് ബാങ്കിന്റെ ആഴ്ചപ്പിരിവിനും ചിട്ടിപ്പിരിവിനുമായി പുറത്തുപോയിരുന്നു.

തിരികെ മടങ്ങും വഴി റബര്‍ തോട്ടത്തില്‍ നിന്ന് വിറക് ശേഖരിക്കുമ്പോഴാണ് പതിയിരുന്ന രാജന്‍ കൊടുവാളുമായി ചാടിവീണത്. രമാവതിയുടെ കഴുത്തിലും കൈയിലും കാലിലുമടക്കം ആറുതവണ വെട്ടി. കഴുത്തിന്റെ രണ്ട് ഭാഗങ്ങളിലായുള്ള വെട്ടാണ് മരണകാരണമെന്നാണ് സൂചന.

തടയാന്‍ ശ്രമിച്ചപ്പോഴാണ് രതിക്ക് വെട്ടേറ്റത്. നിലവിളിച്ചുകൊണ്ട് രതി റബര്‍തോട്ടം പിന്നിട്ട് റോഡിലിറങ്ങിയപ്പോഴാണ് നാട്ടുകാര്‍ ഓടിക്കൂടിയത്. രതിയെ കൊട്ടാരക്കര താലൂക്ക് ആശുപത്രിയിലും അവിടെ നിന്ന് തിരുവനന്തപുരം മെഡിക്കല്‍ കോളേജ് ആശുപത്രിയിലും എത്തിച്ചു. പുത്തൂര്‍ പൊലീസ് നടത്തിയ തെരച്ചിലിലാണ് രതിയുടെ കൈപ്പത്തി കുറ്റിക്കാട്ടില്‍ നിന്ന് കണ്ടെടുത്തത്. ഇതും മെഡിക്കല്‍ കോളേജ് ആശുപത്രിയില്‍ എത്തിച്ചെങ്കിലും സമയം അതിക്രമിച്ചതിനാല്‍ തുന്നിച്ചേര്‍ക്കാന്‍ പറ്റിയില്ല.

അതേസമയം രമാവതി മരിച്ചെന്ന് ഉറപ്പാക്കിയശേഷമാണ് രാജന്‍ സ്ഥലത്ത് നിന്ന് മുങ്ങിയത്. പൊലീസും നാട്ടുകാരും നടത്തിയ അന്വേഷണത്തിലാണ് കുടുംബ വീട്ടില്‍ രാജനെ തൂങ്ങിമരിച്ച നിലയില്‍ കണ്ടെത്തിയത്. രണ്ടു മൃതദേഹങ്ങളും ഇന്‍ക്വസ്റ്റിനുശേഷം പോസ്റ്റ്‌മോര്‍ട്ടത്തിനായി തിരുവനന്തപുരം മെഡിക്കല്‍ കോളേജ് ആശുപത്രിയിലേക്കു മാറ്റി.