കേരളത്തില്‍ ഏറെ കോളിളക്കം സൃഷ്ടിച്ച വിവാദമാണ് സോളാര്‍ കേസ്. ചെറിയ ഇടവേളക്ക് ശേഷം സോളാര്‍ കേസ് വീണ്ടും ചര്‍ച്ചാവിഷയമായിരിക്കുകയാണ്. സിബിഐ സംഘം കെബി ഗണേഷ് കുമാര്‍ എംഎല്‍എയുടെ മൊഴിയെടുത്തു. മൂന്നു ദിവസം മുമ്പ് തിരുവനന്തപുരത്ത് വച്ചാണ് ഗണേഷ് കുമാറിന്റെ മൊഴിയെടുത്തത്.

സോളാര്‍ കേസിലെ പരാതിക്കാരിയുമായി എന്തെങ്കിലും ബന്ധമുണ്ടോ എന്നും മുന്‍ മുഖ്യമന്ത്രിയായിരുന്ന ഉമ്മന്‍ ചാണ്ടി ഉള്‍പ്പെടെ ഉള്ളവര്‍ക്കെതിരെ പരാതിക്കാരി ഉയര്‍ത്തിയ പരാതിയില്‍ എന്തെങ്കിലും കഴമ്പുണ്ടോ എന്നു തുടങ്ങിയ കാര്യങ്ങളെ കുറിച്ചാണ് സിബിഐ സംഘം ആരാഞ്ഞത്.

ഗണേഷിന് പുറമെ അദ്ദേഹത്തിന്റെ മുന്‍ പിഎയെയും സിബിഐ സംഘം ചോദ്യം ചെയ്യും. ഒരാഴ്ചയ്ക്കകം ചോദ്യം ചെയ്യലിന് ഹാജരാകണം എന്ന് ആവശ്യപ്പെട്ട് ഗണേഷിന്റെ മുന്‍ പിഎയായ പ്രദീപ് കോട്ടത്തലക്ക് നോട്ടീസ് നല്‍കിയിട്ടുണ്ട്.

കഴിഞ്ഞ ദിവസം ഹൈബി ഈഡന്‍ എംപിയേയും സോളാര്‍പീഡന കേസുമായി ബന്ധപ്പെട്ട് സിബിഐ ചോദ്യം ചെയ്തിരുന്നു. കൊച്ചിയില്‍ വെച്ചായിരുന്നു ഒരു മണിക്കൂര്‍ നീണ്ടുനിന്ന ചോദ്യം നടന്നത്. ഹൈബി ഈഡന്റെ വിശദീകരണം പരിശോധിച്ച ശേഷം ആവശ്യമെങ്കില്‍ വീണ്ടും ചോദ്യം ചെയ്യുമെന്നാണ് റിപ്പോര്‍ട്ടുകള്‍ പുറത്തുവരുന്നത്. ഈ കേസില്‍ പ്രതിപ്പട്ടികയില്‍ നില്‍ക്കുന്നതിനാല്‍ എംഎല്‍എ ഹോസ്റ്റലിലെ ഹൈബി ഈഡന്റെ മുറി സിബിഐ നേരത്തെ പരിശേധിച്ചിരുന്നു.

ഹൈബി ഈഡന്‍ എംഎല്‍എയായിരുന്നപ്പോള്‍ മണ്ഡലത്തിലെ സോളാര്‍ പദ്ധതി ചര്‍ച്ച ചെയ്യാന്‍ പരാതിക്കാരി ചെന്നിരുന്നു. അപ്പോള്‍ തന്നെ എംഎല്‍എ ഹോസ്റ്റല്‍ മുറിയിലേക്ക് ക്ഷണിക്കുകയും പിന്നീട് പീഡിപ്പിക്കുകയും ചെയ്തു എന്നാണ് കേസ്.

2012 ഡിസംബര്‍ 9നാണ് ഈ പീഡനം നടന്നത് എന്നാണ് പരാതിയില്‍ പറയുന്നത്. പരാതിക്കാരിയുടെ സാനിധ്യത്തിലാണ് ഈ മുറിയില്‍ പരിശോധന നടത്തിയത്.

സോളാര്‍ പീഡനക്കേസില്‍ ആറു കേസുകളാണ് സിബിഐ നിലവില്‍ രജിസ്റ്റര്‍ ചെയ്തിട്ടുള്ളത്. സോളാര്‍ പദ്ധതിയ്ക്ക് സഹായം വാഗ്ദാനം ചെയ്ത് ജനപ്രതിനിധികളക്കമുള്ള രാഷ്ട്രീയക്കാര്‍ തന്നെ പീഡനിച്ചുവെന്നാണ് പരാതിക്കാരി പറയുന്നത്. മുന്‍ മുഖ്യമന്ത്രി ഉമ്മന്‍ചാണ്ടി, എഐസിസി ജനറല്‍ സെക്രട്ടറി, ബിജെപി നേതാവ് അബ്ദുള്ളകുട്ടി എന്നിവരെല്ലാം ഈ കേസില്‍ പ്രതികളാണ്.