കോ‌ട്ടയം ഏറ്റുമാനുര്‍ തവളക്കുഴിയില്‍ നിയന്ത്രണം വിട്ട സ്വകാര്യ ബസ് സ്കൂട്ടര്‍ യാത്രികയുടെ തലയിലൂടെ കയറിയിറങ്ങി യുവതിയ്ക്ക് ദാരുണാന്ത്യം.കോട്ടയം-എറണാകുളം റോഡില്‍ തവളക്കുഴി ജംഗ്ഷനില്‍ വെള്ളിയാഴ്ച രാവിലെ പത്തു മണിയോടെയായിരുന്നു അപകടം.

കൂത്താട്ടുകുളം സ്വദേശിയായ യുവതിയാണ് മരിച്ചതെന്നാണ് പ്രാഥമിക വിവരം.സ്കൂട്ടര്‍ ഓടിച്ചിരുന്ന ഇവരുടെ സഹോദരനെ പരിക്കുകളോടെ കോട്ടയം മെഡിക്കല്‍ കോളേജില്‍ പ്രവേശിപ്പിച്ചു. മറ്റൊരു ബസിനെ മറികടക്കാന്‍ ശ്രമിക്കുന്നതിനിടയില്‍ ബസ് സ്കൂട്ടര്‍ യാത്രികരെ ഇടിച്ചുതെറിപ്പിക്കുകയായിരുന്നു.

ഇടിയുടെ ആഘാതത്തില്‍ സ്കൂട്ടറിനു പിന്നിലിരുന്ന യുവതി ബസ്സിനടിയിലേക്ക് വീഴുകയും ബസിന്റെ ടയര്‍ ഇവരുടെ തലയിലൂടെ കയറി ഇറങ്ങുകയുമായിരുന്നു.കോട്ടയം എറണാകുളം റൂട്ടില്‍ സര്‍വീസ് നടത്തുന്ന ആവേ മരിയ ബസ് ആണ് അപകടത്തിനിടയാക്കിയത്.