വിദ്യാര്ത്ഥികള്ക്കെതിരെ പൊലീസ് അതിക്രമത്തില് കേന്ദ്ര സര്ക്കാരിനും പൊലീസിനും നോട്ടീസയച്ച് ഹൈക്കോടതി
കോക്രോച്ച് ജനത പാര്ട്ടിയുടെ പാര്ലമെന്റ് മാര്ച്ചിനിടെ വിദ്യാര്ത്ഥികള്ക്കെതിരെ പൊലീസ് അതിക്രമം നടത്തിയെന്നാരോപിച്ചുള്ള ഹര്ജികളില് കേന്ദ്ര സര്ക്കാരിനും ഡല്ഹി പൊലീസിനും നോട്ടീസയച്ച് ഹൈക്കോടതി. സംഭവവുമായി ബന്ധപ്പെട്ട എല്ലാ സിസിടിവി ദൃശ്യങ്ങളും, ബോഡി ക്യാമറ റെക്കോര്ഡിംഗുകളും, മറ്റ് ഡിജിറ്റല് രേഖകളും നടപടിക്രമങ്ങള്ക്കനുസൃതമായി സൂക്ഷിക്കാന് കോടതി സര്ക്കാരിനോട് നിര്ദ്ദേശിച്ചു. കേസ് അടുത്ത വാദം കേള്ക്കുന്നതിനായി സെപ്തംബര് 11ലേയ്ക്ക് മാറ്റി.
ചീഫ് ജസ്റ്റിസ് ദേവേന്ദ്ര കുമാര് ഉപാദ്ധ്യായ, ജസ്റ്റിസ് തേജസ് കരിയ എന്നിവരടങ്ങിയ ഡിവിഷന് ബെഞ്ചാണ് ഹര്ജി പരിഗണിച്ചത്. അടുത്ത നാല് ആഴ്ചയ്ക്കുള്ളില് എതിര്സത്യവാങ്മൂലം സമര്പ്പിക്കാന് സര്ക്കാരിനോടും പൊലീസിനോടും കോടതി ആവശ്യപ്പെട്ടു. ഡല്ഹി പൊലീസിനും കേന്ദ്ര സര്ക്കാരിനും വേണ്ടി അഡീഷണല് സോളിസിറ്റര് ജനറല് എസ് വി രാജു ആണ് ഹാജരായത്. ഹര്ജിക്കാര്ക്കുവേണ്ടി മുതിര്ന്ന അഭിഭാഷകരായ എന് ഹരിഹരന്, ഗോപാല് ശങ്കരനാരായണന്, വികാസ് സിംഗ് എന്നിവര് ഹാജരായി.
കേന്ദ്ര വിദ്യാഭ്യാസ മന്ത്രി ധര്മേന്ദ്ര പ്രധാന്റെ രാജിയാവശ്യപ്പെട്ടുള്ള സിജെപിയുടെ പാര്ലമെന്റ് മാര്ച്ചിനെ തുടര്ന്ന് ജന്തര് മന്ദറിനു ചുറ്റുമുള്ള അഞ്ച് കിലോമീറ്റര് മേഖല യുദ്ധക്കളമായി മാറിയിരുന്നു. നൂറില്പ്പരം വിദ്യാര്ത്ഥികള്ക്കും പൊലീസുകാര്ക്കും പരിക്കേറ്റു. നൂറുകണക്കിനു പേരെ അറസ്റ്റ് ചെയ്തു നീക്കി. പാര്ലമെന്റിന്റെ വര്ഷകാല സമ്മേളനം ആരംഭിച്ചതിനാല് കനത്ത സുരക്ഷാ വലയമായിരുന്നു. ഇതിനെയെല്ലാം മറികടന്നാണ് പ്രതിഷേധക്കാര് പാര്ലമെന്റ് കവാടത്തിന് സമീപത്തേക്ക് ഇരമ്പിയെത്തിയത്.
https://www.facebook.com/Malayalivartha
