മുഖ്യമന്ത്രിക്കെതിരായ ആരോപണത്തില്‍ ഉറച്ച് നില്‍ക്കുന്നതായി സ്വപ്ന സുരേഷ്. താന്‍ ജയിലില്‍ കിടന്ന കാലത്ത് തന്നെ അറിയില്ലെന്ന് മുഖ്യമന്ത്രി പിണറായി വിജയന്‍ പറഞ്ഞത് കള്ളമെന്ന് സ്വര്‍ണക്കടത്ത് കേസ് പ്രതി സ്വപ്ന സുരേഷ്. മുഖ്യമന്ത്രിയും അദ്ദേഹത്തിന്റെ കുടുംബാംഗങ്ങളും തമ്മില്‍ പല കാര്യങ്ങളും ചര്‍ച്ച ചെയ്തു. ക്ലിഫ് ഹൗസില്‍ നടന്ന ചര്‍ച്ചയുടെ കാര്യങ്ങള്‍ വേണ്ട സമയത്ത് ഓര്‍മിപ്പിച്ചു നല്‍കും.

തന്റെ രഹസ്യമൊഴി സി.പി.എം നേതാവ് ചോര്‍ത്തിയതായി സംശയം. സ്വാധീനം ഉപയോഗിച്ച് മൊഴി മുഖ്യമന്ത്രിയോ സി.പി.എം നേതാവോ എടുത്തിരിക്കുന്നു. മൊഴിയിലെ വൈരുദ്ധ്യം എങ്ങനെയാണ് ഈ നേതാവ് അറിഞ്ഞതെന്നും സ്വപ്ന ചോദിച്ചു. എല്ലാ പൊലീസ് സ്‌റ്റേഷനിലും കേസെടുത്താലും രഹസ്യമൊഴിയില്‍ നിന്ന് പിന്‍മാറില്ല. രഹസ്യമൊഴിയില്‍ ഉറച്ചുനില്‍ക്കുന്നു, പിന്‍മാറണമെങ്കില്‍ കൊല്ലണമെന്നും സ്വപ്ന മാധ്യമങ്ങളോട് പറഞ്ഞു.

മുഖ്യമന്ത്രിക്കെതിരായ ആരോപണത്തില്‍ ഉറച്ച് നില്‍ക്കുന്നതായി സ്വപ്ന സുരേഷ്. തെളിവുകളുടെ അടിസ്ഥാനത്തിലാണ് കോടതിയില്‍ രഹസ്യമൊഴി നല്‍കിയത്. മുഖ്യമന്ത്രിയുടെ ദുബായ് യാത്രക്കിടെ കറന്‍സി നിറച്ച ബാഗ് തന്നെയാണ് കൊണ്ട് വന്നതെന്നും സ്വപ്ന പറഞ്ഞു. ഇക്കാര്യങ്ങളെല്ലാം അന്വേഷണ ഏജന്‍സികളോട് നേരത്തെ പറഞ്ഞിട്ടുണ്ട്.

തന്റെ മൊഴിയില്‍ അന്വേഷണം വേണമെന്നും സ്വപ്ന സുരേഷ് ആവശ്യപ്പെട്ടു. ഇപ്പോള്‍ പുറത്ത് വന്നത് ചെറുത് മാത്രമെന്നും ഇനിയും ഏറെ പറയാനുണ്ടെന്നും സ്വപ്ന വ്യക്തമാക്കി. രഹസ്യ മൊഴി ആയതിനാല്‍ കൂടുതല്‍ തുറന്ന് പറയാന്‍ കഴിയില്ല. മുഖ്യമന്ത്രിയും കുടുബവും സുരക്ഷിതരാണ്. തനിക്ക് മാത്രമാണ് പ്രശ്‌നം. വെളിപ്പെടുത്തലിന് പിന്നില്‍ രാഷ്ട്രീയ അജണ്ടയില്ല.