ദിലീപിനെ വെള്ള പൂശാനായി മുന്‍ ഡിജിപി ആര്‍. ശ്രീലേഖ നടത്തിയ ശ്രമങ്ങള്‍ അവര്‍ക്ക് തന്നെ തിരിച്ചടിയാകുന്നു. ഉന്നത സ്ഥാനത്തിരുന്ന അവര്‍ അന്നൊന്നും ചെയ്യാതെയിരുന്ന ശേഷം ഇപ്പോള്‍ ദിലീപിന് വേണ്ടി മുന്നോട്ട് വരുന്നതെന്തിനെന്ന ചോദ്യമാണ് ഉയരുന്നത്. കേസിന്റെ വിചാരണയുടെ അന്തിമ ഘട്ടത്തില്‍ ഈ വെളിപ്പെടുത്തലിന് വലിയ പ്രധാന്യമുണ്ട്.

എന്തായാലും ശ്രീലേഖയ്‌ക്കെതിരെ നടപടി തുടങ്ങി. പള്‍സര്‍ സുനി നടത്തിയ കുറ്റകൃത്യങ്ങളെക്കുറിച്ച് ഇരകള്‍ പറഞ്ഞറിഞ്ഞിട്ടും നടപടിയെടുക്കാതെ പ്രതിയെ സംരക്ഷിക്കാന്‍ ആര്‍. ശ്രീലേഖ ശ്രമിച്ചെന്ന പരാതിയില്‍ റൂറല്‍ പൊലീസ് പ്രാഥമികാന്വേഷണം തുടങ്ങി. ആര്‍. ശ്രീലേഖയുടെ വെളിപ്പെടുത്തലിന്റെ യൂട്യൂബ് വിഡിയോ പുറത്തു വന്നതിനു പിന്നാലെ പ്രഫ.കുസുമം ജോസഫ് നല്‍കിയ പരാതിയുടെ അടിസ്ഥാനത്തിലാണു പ്രാഥമികാന്വേഷണം.

വിഡിയോ ദൃശ്യങ്ങളുടെ പരിശോധനയാണു തുടങ്ങിയത്. കേസെടുക്കുന്ന കാര്യത്തില്‍ നിയമോപദേശം തേടിയ ശേഷമേ തീരുമാനമുണ്ടാകൂ. വേറെയും നടിമാര്‍ പള്‍സര്‍ സുനിയുടെ അക്രമത്തിനിരയായിട്ടുണ്ടെന്നും ഇക്കാര്യം ഇരകള്‍ തന്നെ നേരിട്ടു തന്നോടു വെളിപ്പെടുത്തിയിട്ടുണ്ടെന്നും വിഡിയോയില്‍ ശ്രീലേഖ പറഞ്ഞിരുന്നു. കുറ്റകൃത്യത്തെക്കുറിച്ചറിഞ്ഞിട്ടും ശ്രീലേഖ നടപടിയെടുക്കാതിരുന്നതു പ്രതിയെ സംരക്ഷിക്കാനാണെന്നു പരാതിയില്‍ പറയുന്നു.

അതേസമയം ശ്രീലേഖയ്‌ക്കെതിരെ പല പ്രമുഖരും രംഗത്തെത്തി. നടിയെ ആക്രമിച്ച കേസില്‍ ആര്‍. ശ്രീലേഖയുടെ പരാമര്‍ശം ഉചിതമായില്ലെന്ന് വനിതാ കമ്മിഷന്‍ അധ്യക്ഷ പി.സതീദേവി. വിരമിച്ച ശേഷമുള്ള പ്രതികരണം ദുരൂഹമാണ്. ഇത് പൊലീസ് അന്വേഷിക്കണം. ഇത്തരം വെളിപ്പെടുത്തലുകള്‍ ഉന്നതപദവികളില്‍ ഇരുന്നവര്‍ക്ക് ഭൂഷണമല്ലെന്നും അവര്‍ മാധ്യമങ്ങളോട് പറഞ്ഞു.

അതിജീവിതയ്ക്ക് നീതി ലഭിക്കണമെന്നാണ് ജനങ്ങള്‍ ആഗ്രഹിക്കുന്നത്. ഇത്തരം വെളിപ്പെടുത്തലുകള്‍ ആരെയാണ് സഹായിക്കുകയെന്ന് ശ്രീലേഖ ആലോചിക്കട്ടെയെന്നും സതീദേവി കൂട്ടിച്ചേര്‍ത്തു.

നടിയെ ആക്രമിച്ച കേസില്‍ ദിലീപ് അറിഞ്ഞോ അറിയാതെയോ പ്രതിയാണെന്ന് കരുതുന്നില്ലെന്നും കേസില്‍ തെളിവുകള്‍ വ്യാജമായി കെട്ടിച്ചമച്ചതാണെന്നുമായിരുന്നു യൂട്യൂബ് ചാനലിലൂടെ മുന്‍ ജയില്‍ ഡിജിപി ആര്‍. ശ്രീലേഖയുടെ വെളിപ്പെടുത്തല്‍. സംഭവം വിവാദമായതോടെ ഈ യൂട്യൂബ് വിഡിയോ പരിശോധിക്കുമെന്നും പ്രാഥമിക അന്വേഷണത്തിന് ശേഷം കേസെടുക്കുമെന്നും പൊലീസ് വ്യക്തമാക്കിയിട്ടുണ്ട്.

അതേസമയം മുന്‍ ജയില്‍ ഡിജിപി ആര്‍.ശ്രീലേഖയുമായി നടന്‍ ദിലീപ് ഒരു വര്‍ഷം മുന്‍പു നടത്തിയതെന്ന് ആരോപിക്കപ്പെടുന്ന വാട്‌സാപ് സന്ദേശം പുറത്തുവന്നു. ശ്രീലേഖയുടെ നിലപാടു വിവാദമായ സാഹചര്യത്തില്‍ ഇവര്‍ തമ്മിലുള്ള മുന്‍പരിചയം വ്യക്തമാക്കുന്ന മട്ടിലുള്ള ആശയവിനിമയമാണു പുറത്തുവന്നത്.

2021 മേയ് 23 നുള്ള സന്ദേശങ്ങളാണിവ. തന്റെ യുട്യൂബ് ചാനലിനെക്കുറിച്ച് ശ്രീലേഖ സംസാരിക്കുന്നതും സമയം കിട്ടുമ്പോള്‍ കാണണമെന്ന് ദിലീപിനോട് നിര്‍ദേശിക്കുന്നതും ഇതിലുണ്ട്. ശ്രീലേഖയോട് സംസാരിക്കാന്‍ കഴിഞ്ഞതില്‍ ദിലീപും സന്തോഷം പ്രകടിപ്പിക്കുന്നു.

നടിയെ ആക്രമിച്ച കേസില്‍ മുന്‍ ജയില്‍ ഡിജിപി ആര്‍. ശ്രീലേഖയുടെ ആരോപണങ്ങള്‍ക്ക് അധികം പ്രാധാന്യം കൊടുക്കേണ്ടെന്ന് സിപിഐ സംസ്ഥാന സെക്രട്ടറി കാനം രാജേന്ദ്രന്‍ പറഞ്ഞു. സര്‍വീസില്‍ ഇരിക്കുമ്പോള്‍ എന്തു കൊണ്ട് ഇക്കാര്യം പറഞ്ഞില്ലെന്നും കാനം രാജേന്ദ്രന്‍ ചോദിച്ചു. അന്നു പറയാന്‍ പറ്റാത്തതാണ് എന്ന് അറിയാവുന്നതു കൊണ്ടല്ലേ പറയാതിരുന്നത്. വിരമിച്ചു കഴിഞ്ഞ ഉദ്യോഗസ്ഥര്‍ക്ക് ഉള്ള ഒരു രോഗമാണു വെളിപ്പെടുത്തല്‍. അത് അവര്‍ ചെയ്‌തെന്നേ ഉള്ളൂവെന്നും കാനം പറഞ്ഞു.