രക്ഷപ്പെട്ടത് ഭാഗ്യം കൊണ്ട്.... ലൈഫ് ഭവന പദ്ധതി പട്ടികയില്‍ നിന്നു പുറത്തായ വിധവയുടെ വീടിന്റെ മേല്‍ക്കൂര തകര്‍ന്നു വീണു

ലൈഫ് ഭവന പദ്ധതി പട്ടികയില്‍ നിന്നു പുറത്തായ പട്ടികവര്‍ഗ വിഭാഗത്തിലെ വിധവയുടെ വീട് ഇന്നലെ രാവിലെ ഉണ്ടായ മഴയിലാണ് തകര്‍ന്നുവീണത്.

നെടുംകുന്നം കറ്റുവീട്ടില്‍ സുമ ഗോപിയുടെ വീടിന്റെ മേല്‍ക്കൂരയാണു തകര്‍ന്നുവീണത്. ഇന്നലെ രാവിലെ എട്ടോടെയാണു സംഭവം. 2 മുറിയും അടുക്കളയുമുള്ള വീടിന്റെ അടുക്കളയുടെ ഭാഗമാണു തകര്‍ന്നത്. ഈ സമയം സുമ ഗോപി കിടപ്പുമുറിയിലായിരുന്നു. ''ഭാഗ്യം കൊണ്ടാണു ഞാന്‍ രക്ഷപ്പെട്ടത്. രാവിലെ നല്ല മഴയായിരുന്നു.

എഴുന്നേല്‍ക്കാതെ മുറിയില്‍ കിടക്കുമ്പോഴാണു വലിയ ശബ്ദത്തില്‍ അടുക്കളയുടെ മുകള്‍ഭാഗം തകര്‍ന്നത്. ശബ്ദം കേട്ട് അയല്‍ക്കാര്‍ ഓടിയെത്തി. മഴ പെയ്യുന്നതു കാരണമാണ് എഴുന്നേല്‍ക്കാന്‍ താമസിച്ചത്. സാധാരണ ഈ സമയത്ത് അടുക്കളയിലാണു ഞാന്‍ ഉണ്ടാകുക.''

സാമൂഹിക പെന്‍ഷനും റേഷന്‍ വിഹിതവും ലഭിക്കുന്നതു കൊണ്ടാണു ജീവിതം തള്ളിനീക്കുന്നതെന്നു സുമ ഗോപി പറയുന്നു. 2005ല്‍ വാഴൂര്‍ ബ്ലോക്ക് പഞ്ചായത്തിലെ പുറമ്പോക്ക് പുനരധിവാസ പദ്ധതി വഴിയാണ് 3 സെന്റ് സ്ഥലവും വീടും ലഭിച്ചത്.

തെങ്ങുകയറ്റത്തൊഴിലാളിയായിരുന്ന ഭര്‍ത്താവ് ഗോപി 5 വര്‍ഷം മുന്‍പു മരിച്ചു. ആകെയുള്ള 2 മക്കള്‍ വിവാഹിതരായി പാലാ ഭാഗത്താണു താമസിക്കുന്നത്. ബന്ധുവീടുകളില്‍ നിന്നു സഹായം ലഭിക്കുന്നുണ്ട്. കഴിഞ്ഞ തവണ ലൈഫ് ഭവന പദ്ധതിയില്‍ സുമ ഗോപി അപേക്ഷ നല്‍കിയിട്ടുണ്ടായിരുന്നു. പ്രാഥമിക പട്ടികയില്‍ ഉണ്ടായിരുന്നു. അവസാന പട്ടികയില്‍ നിന്നാണ് സുമ പുറത്തായത്.