യാത്രയ്ക്കിടെ ദേഹാസ്വസ്ഥ്യം അനുഭവപ്പെട്ട പതിനേഴുകാരിയെ ആശുപത്രിയിലെത്തിച്ച് സ്വകാര്യ ബസ് ജീവനക്കാർ. നിറയെ യാത്രക്കാരുമായി കോഴിക്കോട് നിന്നും തൃശൂരിലേക്ക് പോവുകയായിരുന്ന ഹോളി മരിയ സ്വകാര്യ ബസിലായിരുന്നു സംഭവം.

ദേഹാസ്വാസ്ഥ്യം അനുഭവപ്പെട്ട കുട്ടിയെ പെട്ടെന്ന് തന്നെ സ്വകാര്യ ബസ് ജീവനക്കാർ ആശുപത്രിയിലെത്തിക്കുകയായിരുന്നു. ചെങ്കുവെട്ടിയിലെ അൽമാസ് ആശുപത്രി വളപ്പിലേക്ക് അമിത വേഗത്തിലെത്തിയ സ്വകാര്യ ബസിനെ കണ്ടെല്ലാവരും പെട്ടെന്ന് അമ്പരന്നു.

അവശയായ പതിനേഴുകാരിയെ ചേർത്ത് പിടിച്ച് ബസ് ജീവനക്കാരും സഹയാത്രികരും തയ്യാറായി ഇരുന്നപ്പോൾ തന്നെ ഗൗരവം മനസിലാക്കി സ്ട്രെച്ചറെടുത്ത് ബസിനരികിലേക്ക് ജീവനക്കാരെത്തി. തുടർന്ന് അടിയന്തിര ശുശ്രൂഷ നൽകി. കേച്ചേരി സ്വദേശിയായ വിദ്യാർത്ഥിനി സുഖം പ്രാപിച്ചു വരുന്നു.