ഇടപ്പള്ളി മണ്ണുത്തി ദേശീയപാതയില്‍ (എന്‍എച്ച് 544) നെടുമ്പാശേരിയിലെ കുഴിയില്‍ വീണുണ്ടായ അപകടത്തില്‍ മാഞ്ഞാലി സ്വദേശി ഹാഷിം മരിച്ച സംഭവത്തില്‍ പൊലീസ് ദേശീയപാത അധികൃതര്‍ക്കും കരാറുകാരനും എതിരെ കേസ്.

ഹാഷിമിനെ ഇടിച്ച വാഹനം കണ്ടെത്താന്‍ ശ്രമം തുടരുന്നു. അപകടമുണ്ടാക്കുന്ന വിധത്തില്‍ വാഹനമോടിച്ചെന്ന ഐപിസി 279, മറ്റൊരാളുടെ അനാസ്ഥ മൂലമുണ്ടായ മനഃപൂര്‍വമല്ലാത്ത നരഹത്യ 304(എ) എന്നീ വകുപ്പുകള്‍ പ്രകാരമാണ് പൊലീസ് കേസെടുത്തിട്ടുള്ളത്.

കേസുമായി ബന്ധപ്പെട്ട് പൊലീസ് തയ്യാറാക്കിയ പ്രഥമ വിവര റിപ്പോര്‍ട്ടില്‍ ഗട്ടറില്‍ വീണ് റോഡിലേക്ക് തെറിച്ചു വീണ ഹാഷിമിനെ മറ്റൊരു വാഹനം ഇടിച്ചതായാണ് രേഖപ്പെടുത്തിയിട്ടുള്ളത്. ഇതു തെളിയിക്കാനായി വാഹനം ശാസ്ത്രീയ പരിശോധനയ്ക്ക് വിധേയമാക്കിയേക്കും. പ്രദേശത്തെ സിസിടിവി ക്യാമറ ദൃശ്യങ്ങള്‍ പരിശോധിച്ച് ഇടിച്ച വാഹനം കണ്ടെത്താനുള്ള ശ്രമവും പൊലീസ് തുടരുന്നു



അതേസമയം ദേശീയപാതയില്‍ കറുകുറ്റി, അരീക്കല്‍, നെടുമ്പാശേരി ഭാഗത്ത് ഇന്നലെ കുറച്ചു കുഴികള്‍ നികത്തിയിട്ടുണ്ട്. കരയാംപറമ്പിലെ കുഴികള്‍ നികത്താനുണ്ട്. ദേശീയപാതയില്‍ തൃശൂര്‍ ജില്ലയിലെ ഭാഗങ്ങളിലും എറണാകുളം ജില്ലയിലുള്‍പ്പെട്ട അങ്കമാലി, നെടുമ്പാശേരി, കറുകുറ്റി, ചിറങ്ങര, മുരിങ്ങൂര്‍, പോട്ട തുടങ്ങിയ സ്ഥലങ്ങളിലൊക്കെ വന്‍കുഴികള്‍ രൂപപ്പെട്ടിരിക്കുകയാണ്. കുഴികളില്‍ ചാടുന്ന ഇരുചക്രവാഹന യാത്രക്കാര്‍ നിയന്ത്രണം വിട്ടു റോഡിലേക്കു വീഴാനുള്ള സാധ്യതയേറെയാണ്.