മലപ്പുറത്ത് പൊലീസുകാരന്റെ പോക്കറ്റടിക്കാൻ ശ്രമിച്ചയാൾ പിടികൂടി. സംഭവത്തിൽ തച്ചിങ്ങനാടത്തെ കരുവൻതിരുത്തി വീട്ടിൽ ആബിദ് കോയ (47) ആണ് പിടിക്കപ്പെട്ടത്. മമ്പുറം നേർച്ച മൈതാനത്ത് മഫ്തിയിൽ ഡ്യൂട്ടിയിലുണ്ടായിരുന്ന സമയത്താണ് സംഭവം നടന്നത്. ഡ്യൂട്ടിയിലുണ്ടായിരുന്ന താനൂർ സ്റ്റേഷനിലെ സിപിഒ എം.പി.സബറുദ്ദീന്റെ പോക്കറ്റടിക്കാൻ ശ്രമിക്കുന്നതിനിടെയാണ് കയ്യോടെ പൊക്കിയത്.

വലിയ തിരക്കുള്ള മൈതാനത്ത് പോക്കറ്റടിക്കും മറ്റും സാധ്യതയുള്ളതിനാൽ ഡിവൈഎസ്പിയുടെ പ്രത്യേക നിർദേശപ്രകാരമാണ് മഫ്തിയിൽ പൊലീസിനെ വിന്യസിച്ചത്. എന്നാൽ അതിനിടെയാണ് പൊലീസെന്ന് അറിയാതെ അബീദ് കോയ പോക്കറ്റടിക്കാൻ ശ്രമിച്ചത്. തുടർന്ന് ആൾക്കൂട്ടത്തിനിടയിൽ തന്നെ ഒരാൾ പിന്തുടരുകയും ചേർന്നുനിൽക്കുകയും ചെയ്യുന്നത് സബറുദ്ദീൻ ശ്രദ്ധയിൽപെട്ടിരുന്നു. പക്ഷേ അറിയാത്ത മട്ടിൽ നിന്നു.

തുടർന്ന് മോഷ്ടാവ് ബ്ലേഡ് ഉപയോഗിച്ച് പാന്റ്സിന്റെ പിന്നിലെ പോക്കറ്റ് കീറാൻ തുടങ്ങിയപ്പോഴാണ് കയ്യോടെ പിടികൂടിയത്. ഇതിനു പിന്നാലെ തിരൂരങ്ങാടി പൊലീസ് സ്റ്റേഷനിലെത്തിയശേഷമാണ് താൻ പൊലീസുകാരന്റെ പോക്കറ്റടിക്കാനാണ് ശ്രമിച്ചതെന്ന് ആബിദ് കോയയ്ക്കു മനസ്സിലായത്. ഇയാളെ പിന്നീട് സ്റ്റേഷൻ ജാമ്യത്തിൽ വിട്ടു.