‘ഭാരത് ജോഡോ യാത്ര’യിൽ കടന്നുകൂടി പോക്കറ്റടിസംഘം. കോൺഗ്രസ് എംപി രാഹുൽ ഗാന്ധിയുടെ നേൃത്വത്തിലുള്ള ‘ഭാരത് ജോഡോ യാത്ര’യിലാണ് തമിഴ്നാടുനിന്നുള്ള സംഘം കടന്നുകൂടിയത്. ഇന്ന് വൈകിട്ട് 5ന് തിരുവനന്തപുരം നഗരത്തിൽ ഓണംവാരാഘോഷ സമാനപഘോഷയാത്ര തുടങ്ങും മുൻപ് ഇവരെ പിടികൂടാനാണു ശ്രമം. തമിഴ്‌നാട് അതിര്‍ത്തി കടന്ന് ഭാരത് ജോഡോ യാത്ര കേരളത്തിലെത്തിയതിന് പിന്നാലെ പോക്കറ്റടി സംഘത്തെക്കുറിച്ചുള്ള ചില പരാതികള്‍ ഉയര്‍ന്നുവന്നിരുന്നു.

ഈ പരാതിയുടെ അടിസ്ഥാനത്തില്‍ തിരുവനന്തപുരം ജില്ലയിലെ മുഴുവന്‍ പൊലീസിനും മോഷണസംഘത്തെക്കുറിച്ച് പരിശോധിക്കാന്‍ നിര്‍ദേശം ലഭിച്ചിരുന്നു. തുടര്‍ന്ന് തിരുവനന്തപുരം സിറ്റി പൊലീസ് നടത്തിയ അന്വേഷണത്തിലാണ് തമിഴ്‌നാട്ടില്‍ നിന്നുള്ള നാലംഗ മോഷണസംഘത്തെ തിരിച്ചറിഞ്ഞത്.

ഇവര്‍ മോഷണം നടത്തുന്ന സിസിടിവി ദൃശ്യങ്ങള്‍ ഉള്‍പ്പെടെ പൊലീസിന് ലഭിച്ചു. രാഹുൽഗാന്ധിയെ കാണാനായി വഴിയരികിൽ കാത്തുനിൽക്കുന്നവരെയാണ് സംഘം ലക്ഷ്യമിടുന്നത്. തമിഴ്നാട്ടിൽനിന്നാണ് യാത്രയുടെ ഒപ്പം സംഘം കേരളത്തിലേക്കെത്തിയതെന്നാണ് പൊലീസ് പറയുന്നത്. ഇന്നലെയാണ് രാഹുൽഗാന്ധിയുടെ യാത്ര കേരളത്തിൽ ആരംഭിച്ചത്.