മണ്ഡല മകരവിളക്ക് തീര്ത്ഥാടനകാലം മുതല് ചെറിയ വാഹനങ്ങള് പമ്പയില് പാര്ക്ക് ചെയ്യാനായി അനുവദിക്കണമെന്ന് തിരുവിതാംകൂര് ദേവസ്വം ബോര്ഡ്
മണ്ഡല മകരവിളക്ക് തീര്ത്ഥാടനകാലം മുതല് ചെറിയ വാഹനങ്ങള് പമ്പയില് പാര്ക്ക് ചെയ്യാനായി അനുവദിക്കണമെന്ന് തിരുവിതാംകൂര് ദേവസ്വം ബോര്ഡ്.
ഇന്ന് നടക്കുന്ന ശബരിമല അവലോകന യോഗത്തില് സര്ക്കാരിനോട് ഇക്കാര്യം ആവശ്യപ്പെടും. വൈകീട്ട് മൂന്ന് മണിയ്ക്ക് ദേവസ്വംമന്ത്രി കെ.രാധാകൃഷ്ണന്റെ അധ്യക്ഷതയിലാണ് അവലോകന യോഗം ചേരുന്നത്.
ശബരിമല തീര്ത്ഥാടന കാലം തുടങ്ങാന് രണ്ട് മാസം ബാക്കി നില്ക്കെയാണ് അവലോകന യോഗം ചേരുന്നത്. ദേവസ്വം മന്ത്രിയ്ക്ക് പുറമെ മറ്റ് വകുപ്പ് മന്ത്രിമാരും ഉദ്യോഗസ്ഥരും അവലോകന യോഗത്തില് പങ്കെടുക്കും. തീര്ത്ഥാടകര്ക്ക് ആവശ്യമായ സൗകര്യങ്ങള് വര്ധിപ്പിക്കണമെന്നാണ് ദേവസ്വം ബോര്ഡ് നിലപാട്.
നിലവിലിപ്പോള് ചെറിയ വാഹനങ്ങള് ഉള്പ്പടെ ബേസ് ക്യാമ്പായ നിലക്കലില് പാര്ക്ക് ചെയ്ത ശേഷം കെഎസ്ആര്ടിസി ബസില് ആണ് തീര്ത്ഥാടകര്ക്ക് പമ്പയില് എത്താനാകുക. ഇതിന് പകരം ചെറിയ വാഹനങ്ങള്ക്ക് പമ്പയില് പാര്ക്കിംഗ് അനുവദിക്കണമെന്നാണ് ദേവസ്വം ബോര്ഡിന്റെ നിലപാട്. കെഎസ്ആര്ടിസി ബസിലെ തിക്കും തിരക്കും കാരണം ഉണ്ണിയപ്പം, അരവണ തുടങ്ങിയ പ്രസാദങ്ങളുടെ വില്പ്പന ഗണ്യമായി ബോര്ഡിന് കുറഞ്ഞിട്ടുണ്ട്.
പമ്പ നിലക്കല് പ്രത്യേക സര്വ്വീസ് നടത്തുന്നതിലൂടെ കെഎസ്ആര്ടിസി അമിത ലാഭം കൊയ്യുന്നുവെന്ന ആക്ഷേപം നിലനില്ക്കെയാണ് ദേവസ്വം ബോര്ഡിന്റെ നിലപാട്. സന്നിധാനത്തും പമ്പയിലും നിലക്കലും തീര്ത്ഥാടകര്ക്ക് വിരി വയ്ക്കാനായി കൂടുതല് സംവിധാനങ്ങള് വേണമെന്ന ആവശ്യവും അവലോകന യോഗത്തില് ദേവസ്വം ബോര്ഡ് മുന്നോട്ട് വച്ചേക്കും. നിലക്കല് കുടിവെള്ള പദ്ധതി തീര്ത്ഥാടന കാലത്തിന് മുന്പ് പൂര്ത്തിയാക്കണമെന്നും ആവശ്യപ്പെടും.
പോലീസ് കൈകാര്യം ചെയ്തിരുന്ന ശബരിമല വെര്ച്വല്ക്യൂ സംവിധാനം പൂര്ണമായും തിരുവിതാംകൂര് ദേവസ്വം ബോര്ജിന്റെ അധീനതയിലായി. വെര്ച്ച്വല് ക്യൂ സംവിധാനം പൂര്ണമായി ദേവസ്വം ബോര്ഡിന് കീഴിലുള്ള ആദ്യ തീര്ത്ഥാടനകാലമാണിത്.
"
https://www.facebook.com/Malayalivartha
