ചുരുളഴിഞ്ഞത് കൊള്ളസംഘത്തിന്റെ ഒത്തുചേരല്‍ രഹസ്യങ്ങള്‍...മൊഗ്രാല്‍ പുത്തൂരില്‍ കാര്‍ തടഞ്ഞ് സ്വര്‍ണവ്യാപാരിയുടെ ഡ്രൈവറെ തട്ടിക്കൊണ്ടുപോയി 1.65 കോടി രൂപ കവര്‍ന്ന സംഭവത്തില്‍ ഒന്നാം പ്രതി അറസ്റ്റിലായി. കണ്ണൂര്‍ മാലൂര്‍ സ്വദേശി സിനില്‍ (39) ആണ് എറണാകുളത്ത് പിടിയിലായത്.

കാസര്‍കോട് ടൗണ്‍ ഇന്‍സ്‌പെക്ടര്‍ പി. അജിത്ത് കുമാറിന്റെ നേതൃത്വത്തിലുള്ള സംഘമാണ് ഇയാളെ അറസ്റ്റ് ചെയ്തത്. ആര്‍.എസ്.എസ്. നേതാവ് കതിരൂര്‍ മനോജ് വധക്കേസിലെ ഒന്‍പതാം പ്രതിയാണ് സിനില്‍ ഇപ്പോള്‍ ജാമ്യത്തിലാണ്. 2021 സെപ്റ്റംബര്‍ 22-നാണ് 11 അംഗ സംഘം മഹാരാഷ്ട്ര സാംഗ്ലിയിലെ രാഹുല്‍ മഹാദേവ് ജാവിറിനെ തട്ടിക്കൊണ്ടുപോയി പണം കവര്‍ന്നത്.

ഡ്രൈവറെ കത്തികാട്ടി ഭീഷണിപ്പെടുത്തി കാറുള്‍പ്പെടെ തട്ടിയെടുത്ത് പയ്യന്നൂരിലെ ആളൊഴിഞ്ഞ പറമ്പിലെ കുറ്റിക്കാട്ടില്‍ എത്തിക്കുകയായിരുന്നു. അവിടെനിന്നാണ് ഇവരുടെ വ്യാജനമ്പര്‍ പതിപ്പിച്ച കാറിലേക്ക് പണം മാറ്റിയത്. ഈ പ്രദേശത്ത് മണ്ണെടുക്കുന്നവരെ കണ്ടെത്താനായി സ്ഥലമുടമ കാട്ടില്‍ സ്ഥാപിച്ച നിരീക്ഷണക്യാമറയിലെ ദൃശ്യങ്ങളാണ് കേസില്‍ നിര്‍ണായക വഴിത്തിരിവായത്. ഇതോടെ കേസിലെ മുഴുവന്‍ പ്രതികളും അറസ്റ്റിലായി. പുല്‍പ്പള്ളി പേരിക്കല്ലൂരിലെ സുജിത്ത് (27), അനു ഷാജു (29), പനമരം കായക്കുന്നിലെ അഖില്‍ ടോം (25), ജോഷിബ് ജോസഫ് (24), തൃശ്ശൂര്‍ എളംതുരുത്തിയിലെ ബിനോയ് സി. ബേബി (26), കൊടശ്ശേരി താഴൂരിലെ എഡ്വിന്‍ തോമസ് (25), ആലുവ പാദുവപുരത്തെ ആന്റണി ലൂയിസ് (24), കുമ്പള ശാന്തിപ്പള്ളത്തെ എ.ജി. ഷാഹിര്‍ (35), മൊഗ്രാലിലെ അബ്ദുള്‍ അസീസ് (36), കണ്ണൂര്‍ പുതിയതെരുവിലെ മുബാറക് (28) എന്നിവരാണ് കേസില്‍ നേരത്തെ അറസ്റ്റിലായത്.

സിനിലാണ് കവര്‍ച്ച ആസൂത്രണം ചെയ്തതെന്ന് പോലീസ് . കതിരൂര്‍ മനോജ് വധക്കേസില്‍ ജയില്‍ ശിക്ഷ അനുഭവിക്കുന്നതിനിടെ കണ്ണൂര്‍, വിയ്യൂര്‍ സെന്‍ട്രല്‍ ജയിലുകളില്‍െവച്ചാണ് സിനില്‍ മറ്റു പ്രതികളെ പരിചയപ്പെട്ടത്. ദേശീയപാതയില്‍ കവര്‍ച്ച നടത്തിയതിന് മലപ്പുറത്തുള്‍പ്പെടെ മൂന്നിടങ്ങളില്‍ സിനിലിന്റെ പേരില്‍ കേസുണ്ട്.

അതേസമയം മൊഗ്രാല്‍ പുത്തൂര്‍ ദേശീയപാതയില്‍ കാര്‍ തടഞ്ഞ് തട്ടിക്കൊണ്ടുപോയി നടത്തിയ കവര്‍ച്ചയിലെ മുഖ്യസൂത്രധാരനായ സിനില്‍ (39) അറസ്റ്റിലായപ്പോള്‍ ചുരുളഴിയുന്നത് കൊള്ളസംഘത്തിന്റെ ഒത്തുചേരല്‍ രഹസ്യങ്ങളാണ് ആര്‍.എസ്.എസ്. നേതാവ് കതിരൂര്‍ മനോജ് വധക്കേസില്‍ ജയില്‍വാസം അനുഭവിക്കുന്നതിനിടെയാണ് കണ്ണൂര്‍, വിയ്യൂര്‍ സെന്‍ട്രല്‍ ജയിലുകളില്‍ നിന്നായി പ്രതികള്‍ പരസ്പരം പരിചയപ്പെടുന്നത്. അതുവരെ മറ്റു സംഘങ്ങളില്‍ ഒരാളായി പ്രവര്‍ത്തിച്ചിരുന്ന സിനില്‍ ആദ്യമായി നേതൃത്വം നല്‍കിയ കൊള്ളയായിരുന്നു ഇത്.

മിക്കവരും ആഡംബരജീവതം നയിക്കാനാണ് പണം ഉപയോഗിച്ചത്. സംഭവം നടന്ന് ഒരുവര്‍ഷം പൂര്‍ത്തിയാകുന്നതിന് മുന്‍പാണ് പോലീസിന്റെ അന്വേഷണ മികവില്‍ മുഴുവന്‍ പ്രതികളും വലയിലായത്.