നായയുടെ കടിയേറ്റ് ചികിത്സയിലായിരുന്ന യുവതി കുഴഞ്ഞുവീണ് മരിച്ചു. നെടുമങ്ങാട് ആനാട് മൂഴി പെരുംകൈത്തോട് വീട്ടില്‍ സത്യശീലന്റെയും സതീഭായി അമ്മയുടെയും മകള്‍ അഭിജ(24)ആണ് മരിച്ചത്.


ഒന്നര മാസത്തിന് മുമ്പാണ് അഭിജയെ നായ കടിച്ചത്. മൂന്ന് വാക്‌സിനും എടുത്തിരുന്നു. ചിങ്ങം ഒന്നിന് തിരുവനന്തപുരം മെഡിക്കല്‍ കോളേജില്‍ നിന്നാണ് ഏറ്റവും ഒടുവില്‍ വാക്‌സിന്‍ സ്വീകരിച്ചത്. ഇന്നലെ രാവിലെ തല പെരുക്കുന്നുവെന്ന് യുവതി അമ്മയോട് പറഞ്ഞെങ്കിലും ഗുരുതരമല്ലാത്തതിനാല്‍ അമ്മ കാര്യമായി എടുത്തില്ല.


പിന്നീട് പുറത്തുപോയ അമ്മ തിരികെ എത്തിയപ്പോഴേക്കും അഭിജ ബോധംകെട്ട നിലയിലായിരുന്നു. ഉടന്‍ തന്നെ തിരുവനന്തപുരം മെഡിക്കല്‍ കോളേജ് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. അഭിജ അവിവാഹിതയാണ്.