കേരളത്തിൽ പോപ്പുലർ ഫ്രണ്ട് നടത്തുന്ന കോലാഹലം വലുതാണ്. പോപ്പുലർ ഫ്രണ്ട് നേതാക്കളെ അറസ്റ്റ് ചെയ്തതിനു പിന്നാലെ എൻഐഎയുടെ നിരവധി വെളിപ്പെടുത്തലുകൾ പുറത്ത് വരുകയാണ്. ഇപ്പോഴിതാ പോപ്പുലർഫ്രണ്ടിനെതിരെ നിർണായക വെളിപ്പെടുത്തലുമായി എൻഐഎ രംഗത്ത്. രാജ്യത്ത് താലിബാൻ മാതൃക നടപ്പിലാക്കാൻ പോപ്പുലർഫ്രണ്ട് ശ്രമിച്ചെന്നാണ് എൻഐഎ വ്യക്തമാക്കുന്നത്. ഇതിനുള്ള തെളിവുകൾ ലഭിച്ചതായും അന്വേഷണ ഏജൻസി അറിയിച്ചു.

അതേസമയം തന്നെ രാജ്യ വ്യാപകമായി നടത്തിയ പരിശോധനയിൽ മതതീവ്രവാദം വളർത്താൻ പോപ്പുലർഫ്രണ്ട് ശ്രമിച്ചതിനുള്ള തെളിവുകൾ ലഭിച്ചിട്ടുണ്ട്. മാത്രമല്ല റെയ്ഡിൽ പശ്ചിമ ബംഗാളിലെ കൊൽക്കത്തയിൽ നിന്നുമാണ് ഇതുമായി ബന്ധപ്പെട്ട കൂടുതൽ തെളിവുകൾ ലഭിച്ചിട്ടുള്ളത്. രാജ്യവിരുദ്ധ പ്രവർത്തനങ്ങൾക്കായി മറ്റ് സംസ്ഥാനങ്ങളിൽ നിന്നുള്ളവരെ കേരളത്തിൽ എത്തിച്ച് പരിശീലനം നൽകിയെന്നും അന്വേഷണ ഏജൻസി വ്യക്തമാക്കി.

ഇതുമായി സംബന്ധിച്ച കൂടുതൽ വിവരങ്ങൾക്കായി അറസ്റ്റിലായ പോപ്പുലർഫ്രണ്ട് പ്രവർത്തകരെ വിശദമായി ചോദ്യം ചെയ്തുവരികയാണ്. ഇതിനായി ഡൽഹി ആസ്ഥാനത്ത് എത്തിച്ചാണ് ഇവരെ ചോദ്യം ചെയ്യുന്നത്. വരും ദിവസങ്ങളിലും എൻഐഎയുടെ പരിശോധനയും അറസ്റ്റും തുടരുമെന്നാണ് സൂചനകൾ.