കണ്ണൂരിൽ നീന്തൽ പരിശീലനത്തിലേർപ്പെട്ട മകൻ അച്ഛന്‍റെ മുൻപിൽവെച്ച് മുങ്ങി മരിച്ചു. കുറുമാത്തൂര്‍ ഹയര്‍സെക്കണ്ടറി സ്‌കൂളിലെ പ്ലസ്ടു വിദ്യാര്‍ത്ഥി ജിതിന്‍ (17) ആണ് കടമ്പേരി ചിറയില്‍ ദാരുണമായി മുങ്ങി മരിച്ചത്. ഇന്ന് പുലർച്ചെ അഞ്ചരയോടെയായിരുന്നു സംഭവം.

തളിപ്പറമ്പ് തളിയില്‍ സ്വദേശിയാണ്. പിതാവ് ജയകൃഷ്ണനോടൊപ്പം നീന്തൽ പരിശീലനത്തിലേർപ്പെട്ടുകൊണ്ടിരിക്കെ ജിതിൻ ചിറയില്‍ മുങ്ങി താഴുകയായിരുന്നു. നാട്ടുകാര്‍ സ്വകാര്യ ആശുപത്രിയിലെത്തിച്ചുവെങ്കിലും ജീവൻ രക്ഷിക്കാനായില്ല. കുറുമാത്തൂർ സ്കുളിലെ എൻ.എസ്.എസ് ടീം ലീഡറാണ് ജിതിൻ.

ധർമ്മശാലയിലെ ഓട്ടോ ഡ്രൈവറാണ് പിതാവ് ജയകൃഷ്ണൻ. ചിറയിൽ നല്ല അടിയൊഴുക്ക് ഉള്ളതാണ് അപകടകാരണമെന്ന് സംശയിക്കുന്നു. മൃതദേഹം പരിയാരത്തെ കണ്ണൂർ ഗവ. മെഡിക്കൽ കോളേജാശുപത്രിയിലേക്ക് മാറ്റി.