ഭിന്നശേഷിക്കാര്‍ക്ക് സംവരണം ചെയ്ത തസ്തികയിലെ നിയമനത്തിന് പ്രഥമ പരിഗണന കാഴ്ചപരിമിതര്‍ക്കെന്ന് ഹൈക്കോടതി. കാഴ്ചപരിമിതര്‍ ഇല്ലെങ്കിലേ കേള്‍വി, ചലന പരിമിതികളുള്ളവരെ പരിഗണിക്കാവൂവെന്നും വ്യക്തമാക്കി ജസ്റ്റിസ് ദേവന്‍ രാമചന്ദ്രന്‍.

ഭിന്നശേഷിയുള്ളവര്‍ക്കുള്ള സംസ്ഥാന കമ്മിഷണര്‍ പുറപ്പെടുവിച്ച ഉത്തരവ് ചോദ്യം ചെയ്ത് കോഴിക്കോട് ചേന്ദമംഗലൂര്‍ സുന്നിയ്യ അറബിക് കോളജ് മാനേജര്‍ നല്‍കിയ ഹര്‍ജി പരിഗണിച്ചുകൊണ്ടാണ് കോടതി ഉത്തരവിട്ടത്.

കോളജിലെ അസി. പ്രഫസര്‍ നിയമനവുമായി ബന്ധപ്പെട്ട പരാതിയില്‍ ചലനപരിമിതി നേരിടുന്ന അപേക്ഷകയ്ക്ക് നിയമനം നല്‍കണമെന്നായിരുന്നു കമ്മിഷണറുടെ ഉത്തരവ്. ഭിന്നശേഷിക്കാര്‍ക്കായി നീക്കിവെക്കേണ്ട തസ്തികയില്‍ ഓപ്പണ്‍ കാറ്റഗറിയില്‍നിന്ന് നിയമനം നല്‍കിയെന്നായിരുന്നു പരാതിയുള്ളത്.

കമ്മിഷണറുടെ ഉത്തരവ് ചോദ്യം ചെയ്ത് നിയമനം ലഭിച്ച ഉദ്യോഗാര്‍ഥിയും കോടതിയില്‍ എത്തിയിരുന്നു. നിയമത്തില്‍ പറയുന്നത് വിശദമായി പരിശോധിക്കാതെ ചലനവൈകല്യമുള്ള അപേക്ഷകയെ പരിഗണിക്കാനായി കമ്മിഷണര്‍ ഉത്തരവിടുകയായിരുന്നുവെന്ന് കോടതി വിലയിരുത്തി.