ഒറ്റപ്പാലത്ത് ബൈക്കിടിച്ച് വീണ പശുവിന്റെ കൊമ്പ് യുവാവിന്റെ ശരീരത്തില്‍ തുളഞ്ഞുകയറി... സ്വകാര്യ ആശുപത്രിയില്‍ ഉടന്‍ എത്തിച്ചെങ്കിലും രക്ഷിക്കാനായില്ല.

ഒറ്റപ്പാലത്ത് വരോട്ടാണ് സംഭവം. ബൈക്ക് യാത്രികനായിരുന്ന പനമണ്ണ കുഴിക്കാട്ടില്‍ കൃഷ്ണപ്രജിത്താണ് (22) മരിച്ചത്. വാഹനമിടിച്ച പശു സംഭവ സ്ഥലത്തുതന്നെ ചത്തിരുന്നു. ശനിയാഴ്ച വൈകുന്നേരം ഏഴരയോടെ വീട്ടാമ്പാറ-പനമണ്ണ റോഡിലായിരുന്നു അപകടം നടന്നത്.

ഉടമകള്‍ മേയ്ച്ചുകൊണ്ടുപോകുകയായിരുന്ന പശുവിനെ ഇടിച്ച് ബൈക്ക് നിയന്ത്രണം വിട്ട് മറിയുകയായിരുന്നുവെന്ന് പോലീസ് . ബൈക്കില്‍ നിന്ന് തെറിച്ചുവീണ യുവാവിന്റെ നെഞ്ചില്‍ പശുവിന്റെ കൊമ്പ് തുളച്ചുകയറുകയാണുണ്ടായത് .


നാട്ടുകാര്‍ ചേര്‍ന്ന് കണ്ണിയംപുറത്തെ സ്വകാര്യ ആശുപത്രിയില്‍ എത്തിച്ചെങ്കിലും കൃഷ്ണപ്രജിത്തിനെ രക്ഷിക്കാനായില്ല. ഇന്ന് പോസ്റ്റ്മോര്‍ട്ടം നടത്തും.