പാലക്കാട് വാളയാറിൽ ലഹരിവസ്തുക്കളുമായി ബസ് ജീവനക്കാര്‍ അറസ്റ്റില്‍. വാളയാര്‍ ടോള്‍പ്ലാസയില്‍ വെച്ചാണ് സംഭവം നടന്നത്. ബംഗളുരുവില്‍ നിന്ന് എറണാകുളത്തേക്ക് വരികയായിരുന്ന ബസില്‍ നിന്നും 20 ഗ്രാം കഞ്ചാവും രണ്ട് ഗ്രാം ഹാഷിഷ് ഓയിലും പിടിച്ചെടുക്കുകയായിരുന്നു.

എന്നാൽ പകല്‍സമയത്ത് ബസ് നിര്‍ത്തിയിടുമ്പോള്‍ ഉപയോഗിക്കാനാണെന്നാണ് പ്രതികള്‍ പൊലീസിനോട് പറഞ്ഞത്.ഇന്ന് പുലര്‍ച്ചെ ആറ് മണിക്കാണ് ബംഗളരൂവില്‍ നിന്നും വന്ന ബസ് വാളയാര്‍ ടോള്‍ പ്ലാസയില്‍ പരിശോധന നടത്തിയത്.

തുടർന്ന്, ഈ പരിശോധനയിലാണ് ബസിലെ സഹ ഡ്രൈവര്‍ അനന്തു, ക്ലീനര്‍ അജി കെ നായര്‍ എന്നിവരിൽ നിന്ന് 20 ഗ്രാം കഞ്ചാവും രണ്ട് ഗ്രാം ഹാഷിഷ് ഓയിലും പിടിച്ചെടുത്തത്. മാത്രമല്ല ബംഗളുരുവില്‍ നിന്ന് സേലം വരെ ബസ് ഓടിച്ചത് അനന്തുവാണെന്ന് പൊലീസ് കണ്ടെത്തി.

അതേസമയം തന്നെ ഇവര്‍ക്ക് ബസ് വഴി ലഹരിക്കടത്തുണ്ടോയെന്ന സംശയിക്കുന്നതായും പൊലീസ് വ്യക്തമാക്കി. കേരളത്തെ നടുക്കിയ വടക്കാഞ്ചേരി ബസ് അപകടവുമായി ബന്ധപ്പെട്ട് പരിശോധന ശക്തമായി നടക്കുന്നതിനിടെയാണ് പൊലിസിനെ വെല്ലുവിളിച്ച് സ്വകാര്യബസ് ജീവനക്കാരുടെ ലഹരി ഉപയോഗം.