ഏറ്റവും വിലകുറഞ്ഞ വളരെ സുരക്ഷിതമായ മെറ്റ്ഫോമിൻ നിരോധിച്ചു! നിരോധിച്ച ഗുളിക കഴിച്ച കോടിയേരിക്ക് ക്യാൻസർ വന്നു! ബ്ലഡ് ഗ്ലൂക്കോസിന്റെ നോർമൽ അളവ് 300ന് മുകളിലാണ്! ഡയബറ്റിസിനും ബീപിക്കും മരുന്ന് കഴിക്കേണ്ട കാര്യമില്ല; കോടിയേരി ബാലകൃഷ്ണന് ലൈഫ് സ്റ്റൈൽ മോഡിഫിക്കേഷൻ മതിയായിരുന്നു! ഇത് കേൾക്കുന്നതിൽ ഒരാളെങ്കിലും മരുന്ന് നിർത്തുകയോ ഉപേക്ഷിക്കുകയോ ചെയ്താൽ മരണം ഉറപ്പ്. ഇത്തരം കള്ള പ്രചരണങ്ങൾ നടത്തുന്നവർക്കെതിരെ നിയമ നടപടികൾ വേണമെന്ന് ഡോ.സുൽഫി നൂഹു.

അദ്ദേഹം ഫേസ്ബുക്കിൽ പങ്കു വച്ച കുറിപ്പിന്റെ പൂർണ്ണ രൂപം ഇങ്ങനെ; മറുപടി അർഹിക്കുന്നില്ല! ശ്രീ കോടിയേരി ബാലകൃഷ്ണന്റെ മരണവുമായി ബന്ധപ്പെട്ട് അപവാദപ്രചരണങ്ങൾ നടത്തുന്ന ഈ വീഡിയോയ്ക്ക് മറുപടി അർഹിക്കുന്നില്ല. ദുഃഖകരമായ സമയമായതു കൊണ്ടാകണം ധാരാളം ആൾക്കാർ ഈ ദുഷ്പ്രചരണ വീഡിയോ കാണുകയും അതിൽ അപൂർവ്വം ചിലരെങ്കിലും അത് വിശ്വസിക്കുകയും ചെയ്യുന്നുവെന്ന് തോന്നിയതുകൊണ്ടും,

ചില ഡോക്ടർമാർ ചില പ്രമേഹ രോഗികൾ മരുന്നുകൾ നിർത്തി കളയുന്നുവെന്ന് പരാതിപ്പെട്ടതുകൊണ്ടും ഇങ്ങനെയൊന്ന് കുറിക്കണമെന്ന് തോന്നുന്നു. സമൂഹമാധ്യമങ്ങളിൽ കറങ്ങി നടക്കുന്ന പ്രസ്തുത വീഡിയോയിൽ അസത്യവും നുണപ്രചരണവുമാണെന്ന് പ്രത്യേകിച്ച് പറയേണ്ടതില്ലല്ലോ! എന്നുമാത്രമല്ല ഇത്തരം വീഡിയോകൾ പ്രചരിപ്പിച്ച് അതിലൂടെയുള്ള, യൂട്യൂബ് ധനാഗമനം മാത്രം ലക്ഷ്യമിടുന്ന ആൾക്കാരെ പരമ പുച്ഛത്തോടെ തന്നെ കാണുന്നു. 

എന്തൊക്കെയാണ് പറഞ്ഞുവെയ്ക്കാൻ ശ്രമിക്കുന്നത്! ഏറ്റവും വിലകുറഞ്ഞ വളരെ സുരക്ഷിതമായ മെറ്റ്ഫോമിൻ നിരോധിച്ചു! നിരോധിച്ച ഗുളിക കഴിച്ച കോടിയേരിക്ക് ക്യാൻസർ വന്നു! അമ്പതിനായിരം കോടി കൈക്കൂലി ലഭിച്ചു! ബ്ലഡ് ഗ്ലൂക്കോസിന്റെ നോർമൽ അളവ് 300ന് മുകളിലാണ്! ഡയബറ്റിസിനും ബീപിക്കും മരുന്ന് കഴിക്കേണ്ട കാര്യമില്ല.! ട്യൂമർ മാർക്കർ പരിശോധിച്ച് നേരത്തെ ക്യാൻസർ കണ്ടെത്തിയത് തെറ്റായി പോയി! ശ്രീ കോടിയേരി ബാലകൃഷ്ണന് ലൈഫ് സ്റ്റൈൽ മോഡിഫിക്കേഷൻ മതിയായിരുന്നു!

നട്ടാൽ കുരുക്കാത്ത പുച്ഛിച്ചു തള്ളേണ്ട നുണ പ്രചാരണങ്ങൾ!!! ഇത്തരം കള്ള പ്രചരണങ്ങൾ നടത്തുന്നവർക്കെതിരെ നിയമ നടപടികൾ വേണം. ഇത് കേൾക്കുന്നതിൽ ഒരാളെങ്കിലും മരുന്ന് നിർത്തുകയോ ഉപേക്ഷിക്കുകയോ ചെയ്താൽ മരണം ഉറപ്പ്. ഇത്തരം വിഡ്ഢിത്തങ്ങൾ പുലമ്പിയ ചില നാട്ടുവൈദ്യന്മാരും ചില കപട ചികിത്സകരുമൊക്കെ ഇപ്പോൾ ആ പണി ഉപേക്ഷിച്ച മട്ടാണ്. അതിൽ ഒരാൾ സ്വയം ഇത്തരം അബദ്ധ ജടിലമായ കാര്യങ്ങളിൽ വിശ്വസിച്ച് മരിക്കുകയും ചെയ്തു. എന്നിട്ടും വീണ്ടും!