വൈക്കം തലയോലപ്പറമ്പിൽ കോട്ടയം ജില്ലാ പോലീസിന്റെ ഡെൻസാഫ് ടീം നടത്തിയത് ജില്ലയിലെ ഏറ്റവും വലിയ കഞ്ചാവ് വേട്ട. 25 ഓളം കേസുകൾ പ്രതിയായ കാപ്പ ചുമത്തിയ ക്രിമിനലിനെയാണ് കഞ്ചാവുമായി പോലീസ് സംഘം പിടികൂടിയത്. മുണ്ടക്കയം കോരുത്തുതോട് മാങ്കുഴയ്ക്കൽ രഞ്ജിത്ത് (26) നിരവധി ക്രിമിനൽ കേസുകളിൽ പ്രതിയായ ഞീഴൂർ ചിറയിൽതാഴെ കെൻസ് സാബു (28) എന്നിവരെയാണ് ജില്ലാ പൊലീസ് മേധാവിയുടെ ലഹരി വിരുദ്ധ സംഘം മുണ്ടക്കയം, തലയോലപറമ്പ്, വൈക്കം പോലിസിന്റ സഹകരണത്തോടെ പിടികൂടിയത്. ഇവരിൽ നിന്നും നൂറ് കിലോയിലധികം കഞ്ചാവും പിടിച്ചെടുത്തു.

കർണാടക രജിസ്ടേഷനിലുള്ള ഫോർഡ് കമ്പനിയുടെ നീല നിറത്തിലുള്ള എക്കോ സ്പോട്ട് കാറിലെത്തിയ യുവാക്കളെ ഇന്ന് രാവിലെ 6.30 ഓടെ വെട്ടിക്കാട്ടുമുക്കിൽ പോലിസ് തടയാൻ ശ്രമിച്ചെങ്കിലും പോലീസിനെ വെട്ടിച്ച് ഇവർ മുന്നോട്ടു പാഞ്ഞു. പിന്നാലെ എത്തിയ പോലീസ് വെട്ടിക്കാട്ട് മുക്കിനും തലപ്പാറയ്ക്കുമിടയിലുള്ള കൊങ്ങിണി വളവിൽ കാറിനു കുറുകെ വാഹനമിട്ടു ഇവരെ തടഞ്ഞു.

കാറിൽ നിന്നിറങ്ങി സമീപത്തെ റബ്ബർ തോട്ടത്തിലൂടെ ഓടിയ യുവാക്കളെ പോലിസ് പിൻതുടർന്ന് പിടികൂടുകയായിരുന്നു. കോട്ടയം ജില്ലാ പൊലീസ് മേധാവി കെ. കാർത്തിക് , പാലാ ഡി വൈ എസ് പി ഗിരീഷ് പി. സാരഥി , വൈക്കം ഡി വൈ എസ് പി എ.ജെ തോമസ് , നർക്കോട്ടിക് സെൽ ഡി വൈ എസ് പി സി ജോൺ എന്നിവരുടെ നേതൃത്വത്തിലുള്ള സംഘമാണ് പ്രതികളെ പിടികൂടിയത്.

കാറിന്റ ഡിക്കിയിലും പുറകിലെ സീറ്റിനടിയിലും ചാക്കുകളിലാക്കിയാണ് കഞ്ചാവ് സൂക്ഷിച്ചിരുന്നത്. ബാംഗ്ലൂരിൽ നിന്നാണ് ഇവർ കഞ്ചാവു കൊണ്ടുവന്നതെന്നാണ് പോലിസിന്റ നിഗമനം. എക്സൈസും സ്ഥലത്തെത്തി പോലിസുമായി സഹകരിച്ച് അന്വേഷണമാരംഭിച്ചു.  ജില്ലാ പോലിസ് മേധാവി കാർത്തിക്ക്, വൈക്കം ഡി വൈ എസ് പി എ ജെ തോമസ് എന്നിവരുടെ നേതൃത്വത്തിൽ പ്രതികളെ ചോദ്യം ചെയ്തു വരുന്നു.