മദ്യം കഴിച്ചിട്ടുണ്ടെങ്കിലും അത് അപകടത്തിന് കാരണമായിട്ടില്ലെന്ന് കോടതി വിലയിരുത്തി. നഷ്ടപരിഹാരം നല്‍കണമെന്ന ഓംബുഡ്‌സ്മാന്‍ ഉത്തരവ് ഹൈക്കോടതി ശരിവെച്ചു. മദ്യപിച്ച് ബൈക്കോടിച്ചയാള്‍ ടൂറിസ്റ്റ് ബസ് ഇടിച്ച് മരിച്ച സംഭവത്തില്‍ ആശ്രിതര്‍ക്ക് നഷ്ടപരിഹാരം നല്‍കണമെന്ന് ഹൈക്കോടതി. ജലസേചന വകുപ്പിലെ ഉദ്യോഗസ്ഥന്‍ 2009 മെയ് 19നാണ് എതിരെ വന്ന ടൂറിസ്റ്റ് ബസിടിച്ച് മരിച്ചത്.

അപകടത്തിന് കാരണം ടൂറിസ്റ്റ് ബസ് ഡ്രൈവറുടെ അശ്രദ്ധയാണെന്ന പൊലീസ് റിപ്പോര്‍ട്ട് ചൂണ്ടിക്കാട്ടിയാണ് ഹൈക്കോടതി ഉത്തരവ്. രക്തപരിശോധനയില്‍ അളവില്‍ കൂടുതല്‍ മദ്യം കണ്ടെത്തിയതിനാല്‍ നിയമപരമായ ബാധ്യതയില്ലെന്ന് കാണിച്ച് ഇന്‍ഷുറന്‍സ് കമ്പനി നഷ്ടപരിഹാരത്തുക നിഷേധിച്ചു. ഇതിനെതിരെയാണ് മരിച്ചയാളുടെ ഭാര്യ ഓംബുഡ്‌സ്മാനെ സമീപിച്ചതും, അനുകൂല ഉത്തരവ് നേടിയതും.

ബൈക്ക് യാത്രികന്‍ മരിച്ച അപകടത്തിന് കാരണം ടൂറിസ്റ്റ് ബസ് ഡ്രൈവറുടെ അശ്രദ്ധയും അപകടകരമായ ഡ്രൈവിങ്ങുമാണെന്നായിരുന്നു പൊലീസ് റിപ്പോര്‍ട്ട്. ഈ റിപ്പോര്‍ട്ട് പ്രകാരം മരിച്ചയാളുടെ ആശ്രിതര്‍ക്ക് 7 ലക്ഷം രൂപ നഷ്ടപരിഹാരം നല്‍കാന്‍ ഓംബുഡ്‌സ്മാന്‍ ഉത്തരവിട്ടു. ഇതിനെതിരെ ഇന്‍ഷുറന്‍സ് കമ്പനിയാണ് ഹൈക്കോടതിയെ സമീപിച്ചത്.

നിയമപരമായതില്‍ കൂടുതല്‍ മദ്യം കഴിച്ചിട്ടുണ്ടെങ്കിലും, അയാള്‍ അപകടത്തിന് കാരണമായിട്ടില്ലെന്ന് കോടതി വിലയിരുത്തി. മദ്യലഹരിയിലായിരുന്നു എന്നത് ഓരോ വ്യക്തികളുടെയും ആരോഗ്യ ശേഷിയെ ആശ്രയിച്ചിരിക്കും. ചിലപ്പോള്‍ കുറച്ചു മദ്യം കഴിച്ചയാള്‍ കൂടുതല്‍ കഴിച്ചയാളെക്കാള്‍ ലഹരിയിലായിരിക്കും.

ഇക്കാര്യത്തില്‍ കൃത്യമായ മാനദണ്ഡങ്ങള്‍ പറയാനാവില്ല. ബൈക്ക് ഓടിക്കാനോ നിയന്ത്രിക്കാനോ സാധിക്കാത്ത അവസ്ഥയിലായിരുന്നു മരിച്ചയാളെന്നും, അപകടത്തിന് കുറച്ചെങ്കിലും ഇത് കാരണമായെന്നും ഇന്‍ഷുറന്‍സ് കമ്പനിക്ക് വാദമില്ല. ഇക്കാര്യങ്ങള്‍ ചൂണ്ടിക്കാട്ടിയാണ് ജസ്റ്റിസ് ഷാജി.പി. ചാലി ഹര്‍ജി തള്ളിയത്.