വര്ക്കല അയിരൂര് ഷാലു കൊലക്കേസ്... സാക്ഷി പറഞ്ഞാല് കൊല്ലുമെന്ന് ഭീഷണിപ്പെടുത്തിയെന്ന് കേസ്, വര്ക്കലയില് മാതൃ സഹോദരന്റെ വെട്ടേറ്റ് യുവതി മരിച്ച വര്ക്കല അയിരൂര് ഷാലു കൊലക്കേസില് റിമാന്റിലായ പ്രതി ഇങ്കി അനിലിന് ജാമ്യമില്ല
വര്ക്കലയില് മാതൃ സഹോദരന്റെ വെട്ടേറ്റ് യുവതി മരിച്ച വര്ക്കല അയിരൂര് ഷാലു കൊലക്കേസില് റിമാന്റിലായ പ്രതി ഇങ്കി അനിലിന് തിരുവനന്തപുരം ഏഴാം അഡീഷണല് ജില്ലാ സെഷന്സ് കോടതി ജാമ്യം നിരസിച്ചു. ജഡ്ജി പ്രസുന് മോഹനാണ് പ്രതിയുടെ രണ്ടാം ജാമ്യഹര്ജി തള്ളിയത്.പ്രതിയെ കസ്റ്റഡിയില് വിചാരണ ചെയ്യാനും കോടതി ഉത്തരവിട്ടു.
സാക്ഷി പറഞ്ഞാല് കൊല്ലുമെന്ന് ഭീഷണിപ്പെടുത്തിയതിന് കേസ് എടുത്ത സാഹചര്യത്തിലാണ് ജാമ്യം നിരസിച്ചത്. ഏപ്രില് 28 മുതല് റിമാന്റില് കഴിയുന്ന പ്രതിയും കൊല്ലപ്പെട്ട ഷാലുവിന്റെ മാതൃസഹോദരനുമായ ചെമ്മരുതി ചാവടിമുക്ക് വിളയില് വീട്ടില് ഇങ്കി അനില് എന്ന അനിലിനാണ് ജാമ്യം നിഷേധിച്ചത്. ആദ്യ ജാമ്യഹര്ജി തിരുവനന്തപുരം പ്രിന്സിപ്പല് സെഷന്സ് കോടതി ആഗസ്റ്റില് തള്ളിയിരുന്നു. തുടര്ന്ന് പോലീസ് കുറ്റപത്രം സമര്പ്പിച്ച ശേഷം വീണ്ടും ജാമ്യത്തിന് അപേക്ഷ സമര്പ്പിക്കുകയായിരുന്നു. പ്രതി ഈ കേസ് കൂടാതെ 2014ലും 2020 ലും 2021 ലും അയിരൂരില് ആയുധമുപയോഗിച്ച് പരിക്കേല്പ്പിച്ച കേസുകളില് പ്രതിയാണ്.
2022 ജൂലൈ 24 ന് ഷാലു കൊലക്കേസിലെ വാദിയായ ശശിധരനെ (68) പ്രതി ഇങ്കി അനിലിന്റെ ബന്ധുവായ സരോജിനി മകന് സന്തോഷ് എന്നയാള് വസ്തുവില് അതിക്രമിച്ചു കടന്ന് അസഭ്യം വിളിക്കുകയും അനിലിനെതിരെ സാക്ഷി പറഞ്ഞാല് ശശിധരന് ഉണ്ടാകില്ലെന്നും കൊന്ന് കുഴിച്ചുമൂടുമെന്നും ഭീഷണിപ്പെടുത്തിയെന്നാണ് അയിരൂര് പോലീസ് സ്റ്റേഷനില് കേസ് രജിസ്റ്റര് ചെയ്തിതിരിക്കുന്നത്..
ഗൗരവമേറിയ കുറ്റാരോപണം ആരോപിക്കപ്പെടുന്ന പ്രതിയെ ജാമ്യം നല്കി സ്വതന്ത്രനാക്കിയാല് സാക്ഷികളെ സ്വാധീനിക്കാനോ ഭീഷണിപ്പെടുത്താനോ തെളിവു നശിപ്പിക്കാനോ സാധ്യതയുണ്ടെന്ന് നിരീക്ഷിച്ചാണ് കോടതി ജാമ്യം നിരസിച്ചത്.
വര്ക്കല ചാവടിമുക്ക് തൈപ്പൂയം വീട്ടില് ഷാലു (36) ആണ് വെട്ടേറ്റ ശേഷം മെഡിക്കല് കോളേജ് ആശുപത്രിയില് ചികിത്സയിലിരിക്കെ മരണപ്പെട്ടത്. 2022 ഏപ്രില് 28 ന് ഉച്ചക്കാണ് സംഭവം നടന്നത്. അയിരൂരിലെ സ്വകാര്യ പ്രസ്സില് ജോലി ചെയ്യുന്ന ഷാലു ഉച്ചയോടെ വീട്ടില് എത്തി ഭക്ഷണം കഴിച്ചു തിരികെ മടങ്ങവെ ഷാലുവിന്റെ അമ്മയുടെ സഹോദരന് ഇങ്കി അനില് എന്നറിയപ്പെടുന്ന അനില് വെട്ടുകത്തി കൊണ്ട് വെട്ടിപ്പരിക്കേല്പ്പിക്കുകയായിരുന്നു.
ഷാലുവിന്റെ വീട്ടിലേക്കുള്ള നടവഴിയില് വെട്ടുകത്തിയുമായി നിന്ന് മരത്തില് വെട്ടിക്കൊണ്ടു നില്ക്കുകയായിരുന്നു അനില്. ഉച്ചഭക്ഷണം കഴിച്ചു തിരികെ പ്രസ്സിലേക്ക് പോകാന് സ്കൂട്ടിയില് എത്തിയ ഷാലുവിന്റെ സ്കൂട്ടി തടഞ്ഞു നിര്ത്തി കഴുത്തിലും ശരീരത്തിലും വെട്ടി പരിക്കേല്പിക്കുകയായിരുന്നു. ഷലുവിനെ വെട്ടിയ ശേഷം അനില് വെട്ടുകത്തി വീശി ഭീകരാന്തരീക്ഷം സൃഷ്ടിക്കുകയും ചെയ്തു.
ബന്ധുക്കള് പോലീസില് അറിയിച്ചതിനെ വിവരം തുടര്ന്ന് അയിരൂര് പോലീസ് എത്തി അനിലിനെ കീഴടക്കുകയായിരുന്നു. കടം കൊടുത്ത പണം ഷാലു തിര്യെ കൊടുക്കാത്ത വിരോധത്താല് കൊലപ്പെടുത്തിയെന്നാണ് കേസ്.
https://www.facebook.com/Malayalivartha
