ഏതൊരു സാധാരണ പ്രവർത്തകനും പാർട്ടിയുടെ അഖിലേന്ത്യ അധ്യക്ഷനാകുവാൻ കഴിയും എന്ന് തെളിയിക്കപെട്ട മറ്റൊരു അവസരം കൂടി ഉണ്ടായിരിക്കുകയാണെന്ന് ഖാർഗെയുടെ വിജയത്തിൽ പ്രതികരിച്ച് രാഹുൽ മാങ്കൂട്ടം. അദ്ദേഹം ഫേസ്ബുക്കിൽ പങ്കു വച്ച കുറിപ്പിന്റെ -പൂർണ്ണ രൂപം ഇങ്ങനെ;

ഏതൊരു സാധാരണ പ്രവർത്തകനും പാർട്ടിയുടെ അഖിലേന്ത്യ അധ്യക്ഷനാകുവാൻ കഴിയും എന്ന് തെളിയിക്കപെട്ട മറ്റൊരു അവസരം കൂടി.
മല്ലികാർജുന ഖാർഗേയെ കോൺഗ്രസ് അദ്ധ്യക്ഷനായി തിരഞ്ഞെടുത്തിരിക്കുന്നു. അനുഭവ സമ്പത്തിന്റെ തലപ്പൊക്കം കൊണ്ടാണ് ഗാർഗേ അദ്ധ്യക്ഷ പദമേറ്റെടുക്കുന്നത്. കന്നട മണ്ണിൽ ബൂത്ത് തലം മുതൽ പി.സി.സി അദ്ധ്യക്ഷ പദം വരെ നടന്നു കയറിയ ഖാർഗേ പ്രതികൂല ജീവിത സാഹചര്യങ്ങളോട് പടനയിച്ചാണ് രാഷ്ട്രീയ ജീവിതത്തിൽ മുന്നേറുന്നത്.

താനേറ്റെടുത്ത ഓരോ പദവിയിലും തന്റേതായ വ്യക്തി മുദ്ര പതിപ്പിച്ചാണ് ചുവടുകളോരോന്നും ചവിട്ടിയത്. കർണാടക സംസ്ഥാന വിദ്യാഭ്യാസ വകുപ്പ് മന്ത്രിയായപ്പോൾ നടത്തിയ പ്രവർത്തനങ്ങളിപ്പോഴും ജന മനസ്സിൽ മായാതെ നിൽക്കുന്നുണ്ട്. കർണാടക പ്രദേശ് കോൺഗ്രസ് അദ്ധ്യക്ഷ സ്ഥാനത്തിരുന്ന് പാർട്ടിയെ അധികാരത്തിലേക്ക് നയിച്ചപ്പോഴും മുഖ്യമന്ത്രി സ്ഥാനത്തിരിക്കാൻ കഴിയാതിരുന്നിട്ടും പ്രസ്ഥാനത്തെ നെഞ്ചോട് ചേർത്ത നിസ്വാർത്ഥ സേവനത്തിന്റേയും ആത്മാർത്ഥതയുടേയും പേരാണ് ഖാർഗെ, ആ നാമം കോൺഗ്രസ് പ്രസ്ഥാനത്തിന്റെ തേര് തെളിക്കുമ്പോൾ പുതിയ പ്രതീക്ഷയും മാറ്റവുമാണ് നൽകുന്നത്.

സംഘ പരിവാർ ഉയർത്തുന്ന വർഗീയതയെയും വിഭജനത്തേയും നേരിടാൻ ആശയ ദൃഢതയും വ്യക്തതയുമുള്ള ഗാർഗേക്ക് കഴിയുമെന്നതിൽ സംശയമേതുമില്ല. ദേശീയ രാഷ്ട്രീയത്തിലെ അദ്ദേഹത്തിന്റെ പ്രവർത്തന പാരമ്പര്യവും നയചാതുരിയും മുന്നണി രാഷ്ട്രീയത്തിന്റെ വഴക്കങ്ങളും കയ്യടക്കവും ഖാർഗേക്ക് ഏറെ വശമുള്ളതാണ്. ഒരു മനസ്സോടെ ഭരണകൂട ഹിംസയെയും വിഭജനത്തെയും എതിർക്കേണ്ട കാലത്ത് വിവിധ ആശയധാരകളായി നിൽക്കേണ്ടവരെ ചേർത്ത് നിർത്താൻ അദ്ദേഹത്തിന് കഴിയുമെന്നതിൽ തികഞ്ഞ ആത്മവിശ്വാസമുണ്ട്.