പെരുമ്പാവൂര്‍ എം.എല്‍.എ. എല്‍ദോസ് കുന്നപ്പിള്ളിലിനെതിരെ വീണ്ടും എടുത്ത മര്‍ദ്ദന- സ്ത്രീത്വത്തെ അപമാനിക്കല്‍ കേസില്‍ എല്‍ദോസ് സമര്‍പ്പിച്ച മുന്‍കൂര്‍ ജാമ്യഹര്‍ജിയില്‍ അറസ്റ്റ് വിലക്ക് ജില്ലാ കോടതി ഒക്ടോബര്‍ 31 വരെ നീട്ടി.

തിരുവനന്തപുരം ഏഴാം അഡീ. ജില്ലാ സെഷന്‍സ് കോടതി ജഡ്ജി പ്രസുന്‍ മോഹന്റെതാണുത്തരവ്. ജാമ്യഹര്‍ജിയില്‍ വഞ്ചിയൂര്‍ പോലീസ് വെളളിയാഴ്ച റിപ്പോര്‍ട്ട് ഹാജരാക്കിയില്ല. ഒക്ടോബര്‍ 31 ന് കേസ് ഡയറി ഫയലും റിപ്പോര്‍ട്ടും ഹാജരാക്കാന്‍ കോടതി ഉത്തരവിട്ടു.

പീഡന വധശ്രമക്കേസില്‍ ഇതേ കോടതി അനുവദിച്ച ജാമ്യത്തിലെ വ്യവസ്ഥകള്‍ പാലിക്കുന്നതായ സത്യവാങ്മൂലം എല്‍ദോസ് സമര്‍പ്പിച്ചു.അന്വേഷണ ഉദ്യോഗസ്ഥന്‍ മുമ്പാകെ ഇന്നും ഹാജരായതായി എല്‍ദോസ് ബോധിപ്പിച്ചു.മൊബൈല്‍ ഫോണുകള്‍ അന്വേഷണ ഉദ്യോഗസ്ഥന് കൈമാറി


പാസ്‌പോര്‍ട്ട് മജിസ്‌ട്രേട്ട് കോടതിയില്‍ കെട്ടിവച്ചു.താന്‍ മെഡിക്കല്‍ പരിശോധനക്ക് വിധേയനായി. കോവളം ഗസ്റ്റ്ഹൗസിലും ഹോട്ടലുകളിലും തന്നെക്കൊണ്ടുപോയിക്കൊണ്ടിരിക്കുകയാണ്.അന്വേഷണവുമായി പൂര്‍ണ്ണമായും സഹകരിക്കുകയാണെന്നും ബോധിപ്പിച്ചു.



മുന്‍കൂര്‍ ജാമ്യ ഹര്‍ജിയില്‍ വാദം കേള്‍ക്കും വരെ എല്‍ദോസിനെ അറസ്റ്റ് ചെയ്യരുതെന്ന് ജില്ലാ കോടതി വ്യാഴാഴ്ച ഉത്തരവിട്ടിട്ടുണ്ട്. ആ വിലക്കാണ് 31 വരെ നീട്ടിയത്. കേസില്‍ ഇന്ന് (വെള്ളിയാഴ്ച) വഞ്ചിയൂര്‍ പോലീസ് റിപ്പോര്‍ട്ട് ഹാജരാക്കാനും കോടതി ഉത്തരവിട്ടിരുന്നു.

വക്കീല്‍ ഓഫീസില്‍ വച്ച് പരാതിക്കാരിയായ ആലുവ സ്വദേശിനിയായ തലസ്ഥാന സ്‌കൂള്‍ അധ്യാപികയെ എല്‍ദോസ് ഒത്തുതീര്‍പ്പ് രേഖകളില്‍ ഒപ്പിടാന്‍ വിസമ്മതിച്ചതിന് മര്‍ദിച്ചെന്നും കൈയ്യേറ്റവും ബലപ്രയോഗവും നടത്തി സ്ത്രീത്വത്തെ അപമാനിച്ചുവെന്നുമുള്ള മൊഴിയിലാണ് ഒക്ടോബര്‍ 25 ന് കേസെടുത്തത്.

സ്ത്രീത്വത്തെ അപമാനിച്ചതടക്കമുള്ള ജാമ്യമില്ലാ വകുപ്പുകള്‍ ചുമത്തിയാണ് കേസ് എടുത്ത് എഫ്. ഐ.ആര്‍ തിരുവനന്തപുരം പതിനൊന്നാം ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേട്ട് കോടതി മുമ്പാകെ വഞ്ചിയൂര്‍ പോലീസ് ഹാജരാക്കിയത്.

അതിനിടെ എല്‍ദോസിന്റെ മുന്‍കൂര്‍ ജാമ്യം റദ്ദാക്കണമെന്ന് ആവശ്യപ്പെട്ട് ഹൈക്കോടതിയില്‍ സര്‍ക്കാരും പിന്നാലെ യുവതിയും ഹര്‍ജി സമര്‍പ്പിച്ചു. എംഎല്‍എയെ കസ്റ്റഡിയിലെടുത്ത് ചോദ്യം ചെയ്യണമെന്ന് ചൂണ്ടിക്കാട്ടിയാണ് സര്‍ക്കാര്‍ ഹൈക്കോടതിയെ സമീപിച്ചത്.