സിസിടിവി ഇല്ലാത്ത പരിശോധന മുറിയും പരിസരങ്ങളും. ഡോക്ടർക്ക് നാല് ചുറ്റും കുമിഞ്ഞു കൂടുന്ന രോഗികൾ. നാലു മണിക്കൂറിൽ 200 രോഗികളെ നോക്കുന്ന മാജിക്. അതായത് ഒരു രോഗിക്ക് ഏതാണ്ട് ഒരു മിനിറ്റ്! ഡോ സുൽഫി നൂഹു പങ്കു വച്ച കുറിപ്പിന്റെ പൂർണ്ണ രൂപം ഇങ്ങനെ;

തുല്യ വേതനം കിട്ടി . ഇതിപ്പോൾ തുല്യതയുടെ കാലഘട്ടമാണല്ലോ! പുരുഷ വനിത ക്രിക്കറ്റ് കളിക്കാർക്ക് ഒരേ വേതനം അങ്ങനെ സമസ്ത മേഖലയിലും തുല്യത! ഇന്നലെ തുല്യത കിട്ടിയത് ഡോ. ശോഭക്ക്. കേരളത്തിലെ തന്നെ ഏറ്റവും മികച്ച വനിത സർജൻമാരിൽ ഒരാൾ, ജനറൽ ആശുപത്രിയിലെ സർജൻ , അടുത്ത സുഹൃത്തിൻറെ ഭാര്യ, സഹപ്രവർത്തക !

ശനിയാഴ്ച ഉച്ചയ്ക്ക് തുല്യത കിട്ടി! സമയം ഉച്ചയ്ക്ക് രണ്ട് മണി! രാവിലെ എട്ടുമണിക്ക് തുടങ്ങിയ ഒ.പ്പി ,അനസ്യൂതം തുടരുന്നു. 4 മണിക്കൂർ കൊണ്ട് ഇരുനൂറിലേറെ രോഗികളെ പരിശോധിച്ചു തീർക്കുന്ന ചെറിയ ഒരു കലാപരിപാടി നടന്നുകൊണ്ടിരിക്കുന്നു. ഇനിയും പരിശോധിക്കാൻ നിരവധിപേർ. ഉച്ചയ്ക്കുള്ള ആഹാരം പതിവുപോലെ വൈകുന്നു. അപ്പോൾ ദാ വരുന്നു ഒരു തുല്യത!

രാവിലെ വയറുവേദനയുമായി വന്ന യുവാവിന്റെ പരിശോധനാ ഫലങ്ങൾ കണ്ട് ആശുപത്രിയിൽ അഡ്മിഷൻ നിർദ്ദേശിച്ചപ്പോൾ പെട്ടെന്ന് വളരെ പെട്ടെന്ന്
തീർത്തും അപ്രതീക്ഷിതമായി കിട്ടി കൈ നിറയെ തുല്യത! മുഷ്ടിചുരുട്ടി തലയ്ക്ക് നേർക്ക് വന്ന അടി ഒഴിഞ്ഞു മാറിയതുകൊണ്ട് കൈക്ക് കിട്ടി എല്ല് പൊട്ടലിന്റെ രൂപത്തിൽ. മഹത്തായ തുല്യത!

തുല്യത കൽപ്പിച്ചു നൽകിയ മഹാനെ അറസ്റ്റ് ചെയ്തിട്ടുണ്ട്. തുല്യത സമ്മാനിക്കാനുള്ള ക്രൈറ്റീരിയകൾ ഇങ്ങനെ പോകുന്നവത്രെ ഡോക്ടർമാരും ആശുപത്രി ജീവനക്കാരും സോഫ്റ്റ് ടാർജറ്റ്. കൊടുത്താൽ എന്തായാലും തിരിച്ചു കിട്ടില്ല. സിസിടിവി ഇല്ലാത്ത പരിശോധന മുറിയും പരിസരങ്ങളും. ഡോക്ടർക്ക് നാല് ചുറ്റും കുമിഞ്ഞു കൂടുന്ന രോഗികൾ. നാലു മണിക്കൂറിൽ 200 രോഗികളെ നോക്കുന്ന മാജിക്. അതായത് ഒരു രോഗിക്ക് ഏതാണ്ട് ഒരു മിനിറ്റ്!

മിക്കവാറും എല്ലാ പരിശോധന സ്ഥലങ്ങളിലും ഉണ്ടായിരിക്കേണ്ട സുരക്ഷാ ജീവനക്കാരുടെ അഭാവം. നിയമങ്ങൾ നിരവധി നിലവിൽ ഉണ്ടെങ്കിലും അത് കൃത്യമായി പാലിക്കപ്പെടാതെ പോകുന്ന ചില പതിവുകൾ. കഴിഞ്ഞ കൊല്ലം 140 ആക്രമണങ്ങൾ . ഈ കൊല്ലം ഏതാണ്ട് അര സെഞ്ചറിക്കടുത്ത്! തുല്യത എപ്പോ വേണമോ കിട്ടാമെന്ന പ്രതീക്ഷയിൽ ചില പുരുഷ വനിത ഡോക്ടർമാരും ആശുപത്രി ജീവനക്കാരും.