കണ്ണൂര്‍ നെല്ലിക്കുന്നില്‍ കാര്‍ വീട്ടുമുറ്റത്തെ കിണറ്റില്‍ വീണ് ഗൃഹനാഥന് ദാരുണാന്ത്യം. സംഭവത്തിൽ അറുപത് കാരനായ താരാമംഗലത്ത് മാത്തുക്കുട്ടി ആണ് മരിച്ചത്. വീഴ്ചയിൽ മകന്‍ ബിന്‍സിന് ഗുരുതരമായി പരിക്കേറ്റു.

ഇന്ന് രാവിലെയാണ് അപകടം ഉണ്ടായത്. അപകടത്തെ തുടർന്ന് പരിക്കേറ്റ 18 കാരനായ മകൻ ബിൻസ് പരിയാരം മെഡിക്കൽ കോളജ് ആശുപത്രിയിൽ ചികിത്സയിലാണ്. മകനെ ഡ്രൈവിങ്ങ് പഠിപ്പിക്കുന്നതിനിടെയാണ് അപകടമുണ്ടായത്. നിയന്ത്രണം വിട്ട കാര്‍ കിണറ്റിലേക്ക് വീഴുകയായിരുന്നു.

അതേസമയം മകൻ ബിൻസിന് ഡ്രൈവിംഗ് പഠിക്കാനായി വീട്ടിൽ നിന്നും കാർ പുറത്തിറക്കുന്നതിനിടെയാണ് അപകടമുണ്ടായത്. തുടർന്ന് നിയന്ത്രണം നഷ്ടമായി ആൾമറ തകർത്താണ് കാർ കിണറിലേക്ക് വീണത്. അപകടത്തെ തുടർന്ന് തളിപ്പറമ്പില്‍ നിന്ന് ഫയര്‍ഫോഴ്സ് സംഘമെത്തിയാണ് ഇരുവരെയും പുറത്തെടുത്തത്. മാനന്തവാടി രൂപത മെത്രാൻ ബിഷപ്പ് അലക്സ് താരാമംഗത്തിൻ്റെ സഹോദരനാണ് മരിച്ച മാത്തുക്കുട്ടി.