മലപ്പുറം എടക്കരയില്‍ മധ്യവയസ്‌കനെ ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തി. മലപ്പുറം ചുങ്കത്തറ പുളിമൂട്ടില്‍ ജോര്‍ജ്കുട്ടി (48) ആണ് മരിച്ചത്. ആളൊഴിഞ്ഞ പറമ്പിലെ തോടിനോട് ചേര്‍ന്നാണ് മൃതദേഹം കണ്ടെത്തിയത്. സമീപത്തായി ഒരു കാട്ടുപന്നിയുടെ ജഡവുമുണ്ട്.

ഒന്നാം തീയതി വൈകിട്ട് അഞ്ചിനാണ് ജോര്‍ജ്കുട്ടി വീട്ടില്‍നിന്നു പോയത്. ടൗണില്‍ പോയി വരട്ടെയെന്നാണ് പറഞ്ഞത്. കാണാതായതിനെ തുടര്‍ന്ന് രണ്ടാം തീയതി വൈകീട്ട് വീട്ടുകാര്‍ പൊലീസില്‍ പരാതി നല്‍കി.

തുടര്‍ന്നുള്ള തിരച്ചിലില്‍ രാവിലെ ആറോടെയാണ് മൃതദേഹം കണ്ടത്. സമീപത്തെ വൈദ്യുതിലൈനില്‍ നിന്ന് കാട്ടുപന്നിയെ വൈദ്യുതാഘാതമേല്‍പ്പിച്ച് കൊന്നതിന്റെ സൂചനകളുണ്ട്. കാട്ടുപന്നിയുടെ ജഡത്തിനടുത്തുനിന്ന് നീളമുള്ള കമ്പിയും കണ്ടെത്തിയിട്ടുണ്ട്.