ആശയക്കുഴപ്പത്തിനൊടുവില്.... സര്വകലാശാലകളുടെ ചാന്സലര് പദവിയില് നിന്നു ഗവര്ണറെ നീക്കിക്കൊണ്ടുള്ള ഓര്ഡിനന്സ് മൂന്നുനാളത്തെ ആശയക്കുഴപ്പത്തിനൊടുവില് രാജ്ഭവനിലേക്കയച്ചു, ഇനി ഗവര്ണര് തീരുമാനിക്കും
സര്വകലാശാലകളുടെ ചാന്സലര് പദവിയില് നിന്നു ഗവര്ണറെ നീക്കിക്കൊണ്ടുള്ള ഓര്ഡിനന്സ് മൂന്നുനാളത്തെ ആശയക്കുഴപ്പത്തിനൊടുവില് രാജ്ഭവനിലേക്കയച്ചു.
ഗവര്ണര് ഒപ്പിടാതെ രാഷ്ടപതിക്കയച്ചാലും സമാനവിഷയത്തില് നിയമസഭയില് ബില് കൊണ്ടുവരാന് തടസ്സമില്ലെന്നു നിയമോപദേശം ലഭിച്ചതിനാലാണ് സര്ക്കാര് നടപടിയെടുത്തത്.
ഇന്നലെ രാവിലെ ഓര്ഡിനന്സ് രാജ്ഭവനില് ലഭിക്കുന്നതിനുമുമ്പേ ചീഫ് സെക്രട്ടറിയുടെ മകളുടെ വിവാഹത്തില് പങ്കെടുക്കാനായി തിരുവല്ലയ്ക്കു തിരിച്ച ഗവര്ണര് പിന്നീട് ഡല്ഹിക്കുപോയി. 20-നേ മടങ്ങിയെത്തുകയുള്ളൂ. ഗവര്ണറുടെ നിര്ണായക തീരുമാനമനുസരിച്ചാവും ഓര്ഡിനന്സിന്റെ ഭാവി. തന്നെ ലക്ഷ്യമിട്ടാണെങ്കില് ഓര്ഡിനന്സ് രാഷ്ട്രപതിക്കയക്കുമെന്നായിരുന്നു ഗവര്ണര് വ്യക്തമാക്കിയത്.
ഗവര്ണര് ഒപ്പിടാതെ രാഷ്ട്രപതിയുടെ പരിഗണനയ്ക്കുവിട്ടാല് അനിശ്ചിതമായേക്കാവുന്ന ഓര്ഡിന്സ് നിയമസഭ വിളിച്ചുചേര്ക്കുന്നതോടെ അപ്രസക്തമാവും. അതുകൊണ്ടുതന്നെ, ഇതേ വിഷയത്തില് സര്ക്കാരിനു നിയമസഭയില് ബില് കൊണ്ടുവരാം.
രാഷ്ട്രപതിയുടെ നിര്ദേശത്തോടെ ഏതൊക്കെ ഓര്ഡിനന്സ് ഗവര്ണര് ഒപ്പിടണമെന്നതു ഭരണഘടനയുടെ 213-ാം വകുപ്പില് വ്യക്തമായി വ്യവസ്ഥ ചെയ്തിട്ടുണ്ട്.
മറ്റു സംസ്ഥാനങ്ങളില് നിന്നും വരുന്ന ഉത്പന്നങ്ങള്ക്ക് നികുതി ചുമത്തുന്നതു പോലുള്ള അന്തസ്സംസ്ഥാന ബന്ധങ്ങളുമായി ബന്ധപ്പെട്ട വിഷയങ്ങളിലോ ഏതെങ്കിലും കേന്ദ്രനിയമത്തിനു വിരുദ്ധമായിട്ടുള്ളതോ ആയ ഓര്ഡിനന്സുകളിലേ രാഷ്ട്രപതിയുടെ നിര്ദേശം വാങ്ങി ഗവര്ണര് തീരുമാനമെടുക്കേണ്ടതുള്ളൂ.
അതേസമയം ഗവര്ണറെ ചാന്സലര് പദവിയില്നിന്നു നീക്കുന്നതടക്കമുള്ള വിഷയങ്ങളില് നിയമനിര്മാണത്തിനായി ഡിസംബറില് നിയമസഭ ചേരാനാണ് സാധ്യത. ഈയാഴ്ചത്തെ മന്ത്രിസഭായോഗം ഇതില് തീരുമാനമെടുത്തേക്കും.
https://www.facebook.com/Malayalivartha
