മൂന്നാറില്‍ കനത്ത മഴ.... ഉരുള്‍പൊട്ടലില്‍ വിനോദസഞ്ചാരികളുടെ വാന്‍ ഒലിച്ചു പോയി, യുവാവിനെ കാണാതായി, തെരച്ചില്‍ ഊര്‍ജ്ജിതം.

മൂന്നാര്‍ മേഖലയില്‍ കനത്ത മഴയെത്തുടര്‍ന്ന് മൂന്നാര്‍-കുണ്ടള റോഡില്‍ പുതുക്കടിയില്‍ ഉരുള്‍പൊട്ടലുണ്ടായി. കോഴിക്കോട് വടകര സ്വദേശികളായ വിനോദസഞ്ചാരികളുടെ മിനിബസാണ് കൊക്കയിലേക്ക് ഒഴുകിപ്പോയത്.

വാഹനത്തിലുണ്ടായിരുന്ന ഒരാളെ കാണാതായി. ബാക്കിയുള്ളവര്‍ കഷ്ടിച്ചാണ് രക്ഷപ്പെട്ടത്. ബസില്‍ 11 പേരാണുണ്ടായിരുന്നത്. കോഴിക്കോട് അശോകപുരം കുന്നിയില്‍കാവ് കല്ലട വീട്ടില്‍ രൂപേഷി (40)നെയാണ് കാണാതായത്.

അഗ്‌നിരക്ഷാസേനയും പോലീസും നാട്ടുകാരും ചേര്‍ന്ന് നടത്തിയ തെരച്ചിലില്‍, ഒലിച്ചുപോയ ബസ് 750 മീറ്റര്‍ താഴെനിന്ന് കണ്ടെത്തി. നിശ്ശേഷം തകര്‍ന്നനിലയിലാണ് കാണപ്പെട്ടത്. ടോപ്പ് സ്റ്റേഷനും കുണ്ടള അണക്കെട്ടിനും ഇടയിലുള്ള പ്രദേശത്ത് ശനിയാഴ്ച വൈകുന്നരേം മൂന്നരയോടെയാണ് ഉരുള്‍പൊട്ടലുണ്ടായത്.


വടകരയില്‍നിന്ന് രണ്ട് വാഹനത്തിലെത്തിയ സംഘം ടോപ്പ് സ്റ്റേഷന്‍ സന്ദര്‍ശിച്ച് അണക്കെട്ട് കാണാനായി വരുകയായിരുന്നു. പെട്ടെന്ന് രണ്ട് പാറക്കഷണവും ചെളിയും റോഡിലേക്ക് വീണു. മുന്‍പില്‍ വന്ന മിനിബസ് ചെളിയില്‍ പുതഞ്ഞു. അപകടം മനസ്സിലാക്കിയ ഡ്രൈവര്‍ നികേഷ് സഞ്ചാരികളോട് പെട്ടെന്ന് ഇറങ്ങാനാവശ്യപ്പെട്ടു. അവര്‍ ഇറങ്ങി. കാണാതായ രൂപേഷാണ് പലരേയും ഇറങ്ങാന്‍ സഹായിച്ചത്. ഇതിനിടെ പുറകിലുണ്ടായിരുന്ന വാഹനം സുരക്ഷിതസ്ഥാനത്തേക്ക് മാറ്റി. അപ്പോഴാണ് ചെളിയും വെള്ളവും കൂറ്റന്‍പാറകളും മുകളില്‍ നിന്ന് ഒഴുകിയെത്തിയത്.

ആ സമയം ഡ്രൈവറും രൂപേഷും കൂടി വാഹനം തള്ളിനീക്കുകയായിരുന്നു. ഡ്രൈവര്‍ ഓടിമാറി. വാഹനം കൊക്കയിലേക്ക് ഒഴുകിപ്പോയി. പിന്നീടാണ് രൂപേഷിനെ കാണാനില്ലെന്നറിയുന്നത്. മൂന്നാര്‍ പോലീസും അഗ്‌നിരക്ഷാസേന സംഘങ്ങളും രക്ഷാപ്രവര്‍ത്തനത്തിനെത്തി. നാട്ടുകാരും ഉണ്ടായിരുന്നു. ഗ്രാന്റീസും മറ്റും വളര്‍ന്നുനില്‍ക്കുന്ന ഒറ്റപ്പെട്ട പ്രദേശമായതിനാലും, കനത്ത മഴ തുടരുന്നതിനാലും രക്ഷാപ്രവര്‍ത്തനം ദുഷ്‌കരമായിരിക്കുകയാണ്.

മണ്ണിടിച്ചില്‍ഭീതിയുമുണ്ടായിരുന്നു. എങ്കിലും രണ്ട് മണിക്കൂറിനുള്ളില്‍ വാഹനം കണ്ടെത്താനായി. വാഹനത്തിനുള്ളില്‍ വലിയൊരു തടി കുത്തിക്കയറിയിരുന്നു. കുണ്ടള ഭാഗത്തുണ്ടായിരുന്ന വാഹനങ്ങളെല്ലാം മൂന്നാര്‍ മേഖലയിലേക്ക്, ഇന്‍സ്‌പെക്ടര്‍ മനേഷ് കെ.പൗലോസിന്റെ നേതൃത്വത്തില്‍ കടത്തിവിട്ടു. അപകടത്തില്‍പ്പെട്ട വാഹനത്തിലെ സഞ്ചാരികളെ മറ്റൊരു വാഹനത്തില്‍ മൂന്നാറിലേക്ക് കൊണ്ടുപോയി. രാത്രി ഏഴുവരെ തിരഞ്ഞെങ്കിലും രൂപേഷിനെ കണ്ടെത്താനായിട്ടില്ല. തിരച്ചില്‍ ഇന്നും തുടരും.