ഇത് ഫാസിൽ, മലപ്പുറം ജില്ലയിലെ വട്ടംകുളം പഞ്ചായത്തിലെ ചുമട്ടു തൊഴിലാളിയായ മുഹമ്മദിൻ്റെ മകൻ; ജന്മനാൽ  കിട്ടിയ പരിമിതികളെ ഇച്ഛാശക്തി കൊണ്ട് മറികടന്ന മിടുമിടുക്കൻ; കാൽപന്ത് കളിയിൽ കേമത്വം തെളിയിച്ച് നാടിൻ്റെ അഭിമാനമായ ഫുട്ബോളർ; തോൽക്കാനും മൂലക്കിരുന്ന് വിലപിക്കാനും തയ്യാറാകാത്ത ഫാസിലിൻ്റെ പ്രകൃതം ആരിലും അൽഭുതമുളവാക്കും; കെ ടി ജലീൽ കുറിക്കുന്നു

മലപ്പുറം ജില്ലയിലെ വട്ടംകുളം പഞ്ചായത്തിലെ ചുമട്ടു തൊഴിലാളിയായ മുഹമ്മദിൻ്റെ മകൻ. ജന്മനാൽ  കിട്ടിയ പരിമിതികളെ ഇച്ഛാശക്തികൊണ്ട് മറികടന്ന മിടുമിടുക്കൻ. കാൽപന്ത് കളിയിൽ കേമത്വം തെളിയിച്ച് നാടിൻ്റെ അഭിമാനമായ ഫുട്ബോളർ. നിർണായകമായ കാര്യം പങ്കു വച്ച് ഫേസ്ബുക്ക് കുറിപ്പ് പങ്കു വച്ചിരിക്കുകയാണ് എംഎൽഎ കെ ടി ജലീൽ. അദ്ദേഹത്തിന്റെ
ഫേസ്ബുക്ക് കുറിപ്പിന്റെ പൂർണ്ണ രൂപം ഇങ്ങനെ; ഇത് ഫാസിൽ. മലപ്പുറം ജില്ലയിലെ വട്ടംകുളം പഞ്ചായത്തിലെ ചുമട്ടു തൊഴിലാളിയായ മുഹമ്മദിൻ്റെ മകൻ.

ജൻമനാൽ കിട്ടിയ പരിമിതികളെ ഇച്ഛാശക്തികൊണ്ട് മറികടന്ന മിടുമിടുക്കൻ. കാൽപന്ത് കളിയിൽ കേമത്വം തെളിയിച്ച് നാടിൻ്റെ അഭിമാനമായ ഫുട്ബോളർ. തോൽക്കാനും മൂലക്കിരുന്ന് വിലപിക്കാനും തയ്യാറാകാത്ത ഫാസിലിൻ്റെ പ്രകൃതം ആരിലും അൽഭുതമുളവാക്കും. സ്കൂളിലെ തൻ്റെ കൂട്ടുകാരുടെ നിർലോഭ പിന്തുണയിൽ പന്ത് തട്ടിത്തുടങ്ങിയ ഫാസിൽ ഇന്ന് എഫ്.സി കേരളയുടെ മധ്യനിര കളിക്കാരനാണ്.

ഫാസിലിലെ പ്രതിഭയെ കണ്ടെത്തിയ എഫ്.സി കേരള മാനേജർ സ്റ്റീഫൻ ചാലിശ്ശേരിക്ക് പ്രത്യേക അഭിനന്ദനം. മകൻ്റെ ആഗ്രഹങ്ങൾക്കൊപ്പം ഇല്ലായ്മകൾക്കിടയിലും കൂടെ നിന്ന പിതാവ് മുഹമ്മദിനെയും മാതാവ് റംലയേയും കൂടപ്പിറപ്പുകളെയും എത്ര പ്രശംസിച്ചാലും മതിയാവില്ല. കൈരളിയുടെ ഫീനിക്സ് പുരസ്കാര വിതരണത്തോടനുബന്ധിച്ച് നൽകുന്ന വാർത്തകളിലെ വ്യക്തിക്കുള്ള "പത്മശ്രീ മമ്മൂട്ടിയുടെ പ്രത്യേക പുരസ്കാര"ത്തിന് ഫാസിൽ അർഹനായത് യാദൃശ്ചികമല്ല.

വികാരനിർഭരമായ അവാർഡ് ദാന ചടങ്ങിൽ മലയാളത്തിൻ്റെ മഹാനടൻ മമ്മൂട്ടി ഫാസിലിനെ നെഞ്ചോട് ചേർത്ത് സ്നേഹം പങ്കിട്ടു. ജോൺ ബ്രിട്ടാസ് എം.പി ഫാസിലിനുമേൽ അനുമോദനപ്പെരുമഴ തീർത്തു. നിറഞ്ഞു കവിഞ്ഞ സദസ്സ് കയ്യടിച്ച് ഫാസിലിനെ പ്രോൽസാഹിപ്പിച്ചു. രംഗം വീക്ഷിച്ചവരെല്ലാം ഫാസിലിന് അനുഗ്രഹങ്ങൾ ചൊരിഞ്ഞു, കേട്ടവർ കേട്ടവർ ഫാസിലിനായി പ്രാർത്ഥിച്ചു. ഫാസിൽ വളരും, ഉയരും, അസാദ്ധ്യമായത് സാദ്ധ്യമാക്കും. ഫാസിലിന് എല്ലാ ഭാവുകങ്ങളും.