തെരുവുനായയുടെ കടിയേറ്റ് വില്ലേജ് ഓഫീസറും വിദ്യാര്‍ഥികളും ഉള്‍പ്പെടെ 15 പേര്‍ക്ക് പരിക്ക്. നാട്ടുകാരെയാകെ ഭീതിയുടെ മുള്‍മുനയില്‍ നിര്‍ത്തിയ നായയെ നാല് മണിക്കൂറിനുശേഷം തല്ലിക്കൊന്നു.

സിവില്‍ സര്‍വീസ് മേളയുടെ ഭാഗമായി കായിക പരിശീലനത്തിനായി പോവുകയായിരുന്ന ചെറുകാട്ടൂര്‍ സ്‌പെഷല്‍ വില്ലേജ് ഓഫീസര്‍ പൂതാടി കൊല്ലിക്കല്‍ കുമാരനെ (45) രാവിലെ ആറോടെ കണിയാരത്ത് വച്ചാണ് നായ ആക്രമിച്ചത്. ആക്രമണം തടയാന്‍ ശ്രമിക്കുന്നതിനിടെ ഇദ്ദേഹത്തിന്റെ മുഖത്തും കടിയേറ്റു. പിന്നീട് അമ്പുകുത്തി, കണിയാരം, ഒണ്ടയങ്ങാടി, ചോയിമൂല, എടപ്പെട്ടി, കല്ലിയോട്ട്കുന്ന്, കല്ലുമൊട്ടംകുന്ന് എന്നിവിടങ്ങളിലും സ്‌കൂളിലേയ്ക്ക് പോവുകയായിരുന്ന വിദ്യാര്‍ഥികളെയും പാല് വാങ്ങാന്‍ പോയവരെയും തെരുവ് നായ ആക്രമിച്ചു.
നായയുടെ ആക്രമണത്തില്‍ കണിയാരം ടിടിഐയിലെ വിദ്യാര്‍ഥികളായ അമ്പുകുത്തി ചോയിമൂല കൂവ്വക്കാട്ട് അക്ഷയ് (ഏഴ്), ചോയിമൂല ഓടപ്പുറം ഷിഹാബുദീന്‍ (ഒമ്പത്), കല്ലുമൊട്ടംകുന്ന് പുത്തന്‍പുരയില്‍ പി.ആര്‍. നന്ദന (10), കല്ലുമൊട്ടംകുന്ന് കാരിക്കാമുകളില്‍ എബിന്‍ (11), കല്ലുമൊട്ടംകുന്ന് മുഹമ്മദ് നിസാര്‍ (ഒമ്പത്), സഹോദരി ഫാത്തിമ (ഏഴ്), കണിയാരം സാന്‍ജോ സ്‌കൂള്‍ വിദ്യാര്‍ഥി താന്നികുന്നേല്‍ അഭിനവ് (14), സെന്റ് തോമസ് കോളജ് ബിരുദ വിദ്യാര്‍ഥി കല്ലിയോട്ട് കരിമണ്ണില്‍ മുബിന (18), മാനന്തവാടി ഗവ. ഹൈസ്‌കൂള്‍ വിദ്യാര്‍ഥി എടപ്പെട്ടി വലിയ വീട്ടില്‍ ഷര്‍മി (16), കാട്ടിക്കുളം ജിഎച്ച്എസ്എസിലെ പ്ലസ് ടു വിദ്യാര്‍ഥി എടപ്പെട്ടി കൊല്ലിയില്‍ ശരണ്യ (17), കണിയാരം പുതുശേരി ശശീന്ദ്രന്‍ (55), എടപ്പെട്ടി കൊടിയംകുന്നേല്‍ അഗസ്റ്റിന്‍ (16) എന്നിവര്‍ക്കാണ് പരിക്കേറ്റത്.
നായയെ കണ്ട് പരിഭ്രമിച്ച് ഓടുന്നതിനിടെ വീണ് എടപ്പെട്ടി കിഴക്കേപീടികയില്‍ ജുബി(38)ക്കും പരിക്കേറ്റു. ജനങ്ങളെ ഭീതിയിലാഴ്ത്തിയ നായയെ ഒണ്ടയങ്ങാടി എടപ്പെട്ടിയില്‍ വച്ച് നാട്ടുകാര്‍ തല്ലിക്കൊന്നു. സബ് കളക്ടര്‍ ശീറാം സാംബശിവ റാവു വിവിധ രാഷ്ട്രീയ കക്ഷി നേതാക്കള്‍ എന്നിവര്‍ ജില്ലാ ആശുപത്രിയില്‍ ചികിത്സയില്‍ കഴിയുന്നവരെ സന്ദര്‍ശിച്ചു.

കാസര്‍കോട് തെരുവുനായകള്‍ ഓടിച്ച കുട്ടി വീണു തോളെല്ലൊടിഞ്ഞു. തൃക്കരിപ്പൂര്‍ ബീരിച്ചേരി കൂലേരിയിലെ മുഹമ്മദ് യാസിറിന്റെ മകന്‍ മുഹമ്മദ് ഇഹ്‌സാനെ(6)യാണ് നായകള്‍ പിന്തുടര്‍ന്നത്. സ്‌കൂളില്‍നിന്നു വീട്ടിലേക്കു വരികയായിരുന്ന ഇഹ്‌സാനെ റോഡരികില്‍നിന്ന നായകള്‍ ഓടിക്കുകയായിരുന്നു. രക്ഷപ്പെടാന്‍ അതിവേഗം ഓടിയ കുട്ടി കാല്‍തട്ടി വീണാണു പരിക്കേറ്റത്. പരിസരവാസികളും വീട്ടുകാരും കണ്ടതിനാല്‍ നായ്ക്കളുടെ കടിയേല്‍ക്കാതെ രക്ഷപ്പെട്ടു. മറ്റൊരു സംഭവത്തില്‍ പൂച്ചോലിലെ കെ.പി.അബ്ദുള്ളയുടെ മകള്‍ ലിബാബ(11)യെ തെരുവുനായകള്‍ ഓടിച്ചു. പൂച്ചോല്‍ ശ്മശാനം പരിസരത്തായിരുന്നു സംഭവം. കുട്ടി ഓടി വീട്ടില്‍ കയറിയതോടെ നായകള്‍ പിന്‍വാങ്ങുകയായിരുന്നു. നായകളുടെ ശല്യം കാരണം മുതിര്‍ന്ന കുട്ടികളെ പോലും ഒറ്റയ്ക്കു സ്‌കൂളില്‍ വിടാനാവാത്ത സാഹചര്യമാണു തൃക്കരിപ്പൂരിലും പരിസരങ്ങളിലുമുള്ളത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha