ശശി തരൂര് ഇന്ന് തിരുവനന്തപുരത്ത്..... പൊതു പരിപാടികള്ക്ക് പുറമെ കത്ത് വിവാദത്തില് കോര്പറേഷന് മുന്നില് നടക്കുന്ന യുഡിഎഫ് സമര വേദിയിലും തരൂര് എത്തും
ശശി തരൂര് ഇന്ന് തിരുവനന്തപുരത്ത് എത്തും. വിവിധ പരിപാടികളില് അദ്ദേഹം പങ്കെടുക്കും . എംപി എന്ന നിലയിലെ പൊതു പരിപാടികള്ക്ക് പുറമെ കത്ത് വിവാദത്തില് കോര്പറേഷന് മുന്നില് നടക്കുന്ന യുഡിഎഫ് സമര വേദിയിലും തരൂര് എത്തും. രാവിലെ പത്ത് മണിക്കാണ് തരൂര് കോര്പ്പറേഷന് മുന്നിലെ സമരവേദിയിലെത്തുക.
വിഭാഗീയ പ്രവര്ത്തനങ്ങള് അനുവദിക്കില്ലെന്ന വി ഡി സതീശന്റെ മുന്നറിയിപ്പ് അവഗണിച്ചാണ് ശശി തരൂര് മുന്നോട്ട് നീങ്ങുന്നത്. മലബാര് സന്ദര്ശനത്തിന് പിന്നാലെ മറ്റു ജില്ലകളിലും സമാനമായ രീതിയില് പരിപാടികള് സംഘടിപ്പിക്കാനാണ് നീക്കം.
അടുത്ത മാസം മൂന്നിന് കോട്ടയത്തും നാലിന് പത്തനംതിട്ടയിലും തരൂര് വിവിധ പരിപാടികളില് പങ്കെടുക്കും. അതേസമയം, വിഭാഗീയതയെ കുറിച്ചുള്ള ചോദ്യങ്ങളോട് കെപിസിസി പ്രസിഡന്റ് കെ സുധാകരന് പ്രതികരിച്ചില്ല. ശശി തരൂരിന്റെ മലബാര് സന്ദര്ശന വിവാദത്തില് പരസ്യ പ്രതികരണങ്ങള് അവസാനിപ്പിക്കണമെന്നായിരുന്നു കെപിസിസി അധ്യക്ഷന്റെ നിര്ദ്ദേശം.
പിന്നാലെ വിഭാഗീയത അനുവദിക്കില്ലെന്ന വി ഡി സതീശന്റെ ശാസന രൂപത്തിലുളള മുന്നറിയിപ്പും വന്നു. മാധ്യമങ്ങള് ഊതി വീര്പ്പിച്ച ബലൂണുകള്ക്ക് അധികം ആയുസ്സില്ലെന്ന പരിഹാസവും ഉണ്ടായി. എല്ലാം ചിരിച്ചുതളളി തരൂര് തന്റെ പര്യടന പരിപാടികളുമായി മുന്നോട്ട് നീങ്ങുകയാണ്.
ശക്തമായ പിന്തുണയുമായി എം കെ രാഘവന് പിന്നാലെ കെ മുരളീധരനും രംഗത്തെത്തി. വടക്കന് കേരളത്തിലെ നാലു ദിവസത്തെ സന്ദര്ശനം പ്രതീക്ഷിച്ചതിലേറെ പിന്തുണ നേടുകയും വലിയ ചര്ച്ചകള്ക്ക് വഴിതുറക്കുകയും ചെയ്ത സാഹചര്യത്തില് മറ്റു ജില്ലകളിലും സമാനമായ പരിപാടികള്ക്കാണ് തരൂരിന്റെ നീക്കം. മൂന്നിന് കോട്ടയത്ത് കെഎം ചാണ്ടി അനുസ്മരണത്തില് പങ്കെടുക്കുന്ന തരൂര് അന്നു തന്നെ പാല ബിഷപ്പുമായും കൂടിക്കാഴ്ച നടത്തും. നാലിന് പത്തനംതിട്ടയിലാണ് പരിപാടി. തരൂരിന്റെത് വിഭാഗീയ നീക്കം തന്നെയെന്നാണ് ഐ ഗ്രൂപ്പിന്റെ വിലയിരുത്തല്.
"
https://www.facebook.com/Malayalivartha
