വേലിയിലിരുന്ന തരൂരിനെ എടുത്ത് മലബാറില്‍ വച്ച അവസ്ഥ പോലെയായി കോണ്‍ഗ്രസ് നേതാക്കളുടെ കാര്യം. വിഡി സതീശന്‍, രമേശ് ചെന്നിത്തല, കെസി വേണുഗോപാല്‍ എന്നിവര്‍ പഠിച്ച പണി പതിനെട്ടും നോക്കിയിട്ടും ശശി തരൂരിന്റെ ജനപ്രീതി കൂടുകയാണ്.

കോണ്‍ഗ്രസില്‍ വിലക്ക് വിവാദത്തിന് പിന്നാലെ ശശി തരൂര്‍ എം.പിയ്ക്ക് വേദി ഒരുക്കാന്‍ കോട്ടയത്തെ എ ഗ്രൂപ്പ്. ഡിസംബര്‍ മൂന്നിന് ഈരാറ്റുപേട്ടയില്‍ നടക്കുന്ന യൂത്ത് കോണ്‍ഗ്രസ് മഹാ സമ്മേളനത്തില്‍ തരൂര്‍ പങ്കെടുക്കും. യൂത്ത് കോണ്‍ഗ്രസ് കോട്ടയം ജില്ലാ കമ്മിറ്റിയാണ് പരിപാടി ആസൂത്രണം ചെയ്തിരിക്കുന്നത്.

അതേസമയം ശശി തരൂരിനെ പങ്കെടുപ്പിച്ചുകൊണ്ടുള്ള യൂത്ത് കോണ്‍ഗ്രസ് പരിപാടിയെ തള്ളി കോട്ടയം ഡിസിസി. തരൂര്‍ മുഖ്യാതിഥിയായുള്ള യൂത്ത് കോണ്‍ഗ്രസ് പരിപാടിയെ കുറിച്ച് ഡിസിസി അറിഞ്ഞില്ലെന്നും ജില്ലാ പാര്‍ട്ടി നേതൃത്വവുമായി ആലോചിച്ച് ഇത്തരമൊരു പരിപാടി നടത്തുന്നതാണ് സംഘടനാ രീതിയെന്നും ഡിസിസി പ്രസിഡന്റ് നാട്ടകം സുരേഷ് പറഞ്ഞു.

അതേസമയം വിഭാഗീയ പ്രവര്‍ത്തനമാണു നടക്കുന്നതെന്ന ആരോപണം ഒരു വിഭാഗം നേതാക്കള്‍ ഉയര്‍ത്തുന്നതിനിടെ മലബാറിലെത്തിയെ ശശി തരൂര്‍ എംപിയെ ആവേശത്തോടെ വരവേറ്റ് കോണ്‍ഗ്രസ് പ്രവര്‍ത്തകരും നേതാക്കളും. പാര്‍ട്ടി പരിപാടികള്‍ ഉണ്ടായിരുന്നില്ലെങ്കിലും തരൂര്‍ പങ്കെടുത്ത ചടങ്ങുകളിലെല്ലാം നേതാക്കളുടെയും പ്രവര്‍ത്തകരുടെയും സജീവ സാന്നിധ്യം പ്രകടമായി. തരൂരിന്റെ പരിപാടികളോട് എതിര്‍പ്പു പ്രകടിപ്പിക്കേണ്ടതില്ലെന്ന നിലപാട് സ്വീകരിച്ച കെപിസിസി പ്രസിഡന്റ് കെ.സുധാകരന്റെ തട്ടകത്തിലേക്കു ശശി തരൂരിനെ വരവേല്‍ക്കാന്‍ ഡിസിസി പ്രസിഡന്റ് മാര്‍ട്ടിന്‍ ജോര്‍ജ് തന്നെ മുന്നിട്ടിറങ്ങി. സുധാകരന്‍ സ്ഥലത്തുണ്ടായിരുന്നില്ല.

തരൂരിന്റെ മലബാര്‍ സന്ദര്‍ശനത്തിനു ചുക്കാന്‍ പിടിക്കുന്ന കണ്ണൂര്‍ ജില്ലക്കാരന്‍ കൂടിയായ എം.കെ.രാഘവന്‍ എംപിക്കൊപ്പം ഡിസിസി പ്രസിഡന്റും തരൂരിനെ പരിപാടികളില്‍ അനുഗമിച്ചു. ഔദ്യോഗികമായി പാര്‍ട്ടി ക്ഷണിച്ചിരുന്നില്ലെങ്കിലും തരൂരിനെ കേള്‍ക്കാന്‍ ഗ്രൂപ്പ് വ്യത്യാസമില്ലാതെ അതിശയിപ്പിക്കുന്ന തരത്തില്‍ ആള്‍ക്കൂട്ടമുണ്ടായി.

രാവിലെ തലശ്ശേരി ബിഷപ്‌സ് ഹൗസില്‍ ആര്‍ച്ച് ബിഷപ് മാര്‍ ജോസഫ് പാംപ്ലാനിയ്‌ക്കൊപ്പമായിരുന്നു പ്രഭാത ഭക്ഷണം. തരൂരിന്റെ സന്ദര്‍ശനം കോണ്‍ഗ്രസിനു ഗുണം ചെയ്യുമെന്നു പിന്നീടു വ്യക്തമാക്കിയ മാര്‍ ജോസഫ് പാംപ്ലാനി, കൂടിക്കാഴ്ചയില്‍ രാഷ്ട്രീയം വിഷയമായില്ലെന്നും പ്രതികരിച്ചു.

താന്‍ കോണ്‍ഗ്രസില്‍ വിഭാഗീയത സൃഷ്ടിക്കുന്നുവെന്ന ആരോപണത്തിനെതിരെ തരൂര്‍ തലശ്ശേരിയില്‍ മാധ്യമങ്ങളോടു പ്രതികരിച്ചു. ആരോപണം വിഷമമുണ്ടാക്കുന്നതാണെന്നു പറഞ്ഞ അദ്ദേഹം രണ്ടു കോണ്‍ഗ്രസ് എംപിമാര്‍ പൊതുപരിപാടികളില്‍ പങ്കെടുക്കുന്നതില്‍ ആര്‍ക്കാണു വിഷമമെന്ന ചോദ്യവുമുയര്‍ത്തി. ഊതി വീര്‍പ്പിച്ച ബലൂണെന്ന വി.ഡി.സതീശന്റെ പ്രതികരണത്തിനെതിരെ എം.കെ.രാഘവനും തലശ്ശേരിയില്‍ പ്രതികരിച്ചു.

കുത്തിയാല്‍ പൊട്ടുന്ന ബലൂണിനെയും സൂചിയെയും അതു കുത്താന്‍ ഉപയോഗിക്കുന്ന കൈകളെയും ഒരു പോലെ ബഹുമാനിക്കുന്നുവെന്നായിരുന്നു രാഘവന്റെ പ്രതികരണം. ഡിസിസി ഓഫിസില്‍ തരൂരിനെ സ്വീകരിക്കാന്‍ ഗ്രൂപ്പിനതീതമായി നേതാക്കളെത്തി. അന്തരിച്ച മുന്‍ ഡിസിസി പ്രസിഡന്റ് സതീശന്‍ പാച്ചേനിയുടെ വീടും തരൂര്‍ സന്ദര്‍ശിച്ചു.

സംസ്ഥാന കോണ്‍ഗ്രസിലെ ചേരി തിരിവിനും ശീതപ്പോരുകള്‍ക്കുമിടെ ശശി തരൂര്‍ ഇന്ന് തിരുവനന്തപുരത്ത് എത്തും. വിവിധ പരിപാടികളില്‍ അദ്ദേഹം പങ്കെടുക്കും. എംപി എന്ന നിലയിലെ പൊതു പരിപാടികള്‍ക്ക് പുറമെ കത്ത് വിവാദത്തില്‍ കോര്‍പറേഷന് മുന്നില്‍ നടക്കുന്ന യുഡിഎഫ് സമര വേദിയിലും തരൂര്‍ എത്തും. രാവിലെ പത്ത് മണിക്കാണ് തരൂര്‍ കോര്‍പറേഷന് മുന്നിലെ സമരവേദിയിലെത്തുക. ഇത്രവലിയ സമരപരിപാടികള്‍ തലസ്ഥാനത്ത് നടന്നിട്ടും ഇക്കാര്യത്തില്‍ രാഷ്ട്രീയ പ്രതികരണമോ പങ്കാളിത്തമോ തരൂരിന്റെ ഭാഗത്ത് നിന്ന് ഉണ്ടായിട്ടില്ലെന്ന വിമര്‍ശനം പ്രതിപക്ഷ നേതാവ് തന്നെ പരോക്ഷമായി സൂചിപ്പിച്ച സാഹചര്യത്തില്‍ കൂടിയാണ് തരൂര്‍ സമര വേദിയിലെത്തുന്നതെന്നതും ശ്രദ്ധേയമാണ്. മാസങ്ങളായി തുടരുന്ന വിഴിഞ്ഞം സമരത്തിലും നേതൃത്വത്തില്‍ നിന്ന് ഭിന്നമായ നിലപാടാണ് തരൂരിനുള്ളത്. ഇക്കാര്യങ്ങളെല്ലാം ഇന്ന് ചര്‍ച്ചയിലേക്ക് വരാനാണ് സാധ്യത.